Read Hrangkhol THUVÂRHAI 21 Bible Online

THUVÂRHAI 21 - Hrangkhol bible

THUVÂRHAI 21

¹Reng lungrîl chu RENGPA’N a zêka; tui luangna iva korong a isiam angin a nuamna tiang tak an kôitir ngai.

²Mi tinin an omlam tinrêng hi anni mita chu a dikin an bê zit ngaia, RENGPA’N chu lungrîla tum dân kêng a ivarh ngai.

³Irbôlna nêkin dikna le felna sin hi RENGPA lôm lam a ni.

⁴Mi siahai chu an irpâkna le an irsongna khan an lungrîl a zêka, kha kha sual a ni.

⁵Mi takirtâi ngaituana khan neinungna tiang a pana; mi thaboi rêk chu irsamna tiang vai a pan ngai.

⁶Dikloi taka irchon buk chu irhmang zôi zel a ta, a zongtu hrangin thina a ni.

⁷Mi siahai chu an nunsiatna khan irhmang an ta; thil sa sin an nuam no sikin.

⁸Thiamloi changhai lampui chu a kôi ngaia; mi sahai lampui rêk chu a tûnthai ngai.

⁹Dôngma hrângsia le hmun khata inhoi taka om nêkin chu, in sûng kilkhôra om a sa ual.

¹⁰Mi siahai lungrîl khan thil saloi a’rzuk mai ngaia; tûte chunga lungkhamna nei ngai ma.

¹¹Mi hmusit ngaihai dengintheitira an omin chu mi’nmôlhai an lei vâr ngai; khan, mi vârin chu irchutirna a idong kha an hriat mai ngai.

¹²Pathian, mi fel khan mi siahai in sûnga thil om an hriata, khasikin mi siahai chu irhmangtir a ti.

¹³Inrianghai chapna nir ngai no’n chu, nang khom changpui innangin ni chapna irngaiin om no ni.

¹⁴Mi chunga a ning an murin chu dâihreka thilpêkin a milung insuai a ti.

¹⁵Roirêl dikin chu mi felhai an lômtir ngaia, mi saloihai hrangin chu irhmangna a ni.

¹⁶Mi tukhom inhriatna dik ata invâi chu thina’n a nghâk chian ngai.

¹⁷Hringkhonhoi vai irzuk chu mi’nriang ni a ta; zu le sa irngaiinna mi chu irchong no ni.

¹⁸Mi siahai chu mi felhai dengintheina hrang an châng kama khan an irpal ngai.

¹⁹Dôngma hrângsia, chiar chian chian le hmunkhata om nêkin chu ramchâra om a sa ual.

²⁰Mi vâr chu irchong tak le hoi takin a oma, intô rêkin chu poisa a hmu le chu a hmang lat ngai.

²¹Dikna le lungkhamna neiin lân, ni hring sôt a ta; mihai mahrip le chôiirsângna dong ni ti.

²²Hruaitu vârin chu mi hrâthai khopui a lâka, an kulbang irnghatna khom an simtir ngai.

²³Buaina ata irken ni nuamin chu ni milei vêng insa ro.

²⁴Irpâk le irsong mi chu ar hming hmusittu a ni; mi liana irbein irpâk takin sin a tho ngai.

²⁵Mi thaboi, sin zong nuam loi chu ama vai a irthat a ni.

²⁶Mi thaboi khan sûn misa tâkin a inu nuamhai ngaituana vaiin kêng zoro a inhek ngai, mi fel rêkin chu a pêka, inhroi loi takin a pêk ngai.

²⁷RENGPA’N mi siahai irbôlna thilpêk chu a hnôla, a bîkin lungrîl sual irputa an hong inhlana ni’n chu a hnôl ual ngai.

²⁸Inhriatpuitu dik loihai thu’nsîr chu tûte’n iam no nia, khannisianlân inhriatpuitu dikhai chong chu pom ni a ti.

²⁹Mi pualoihai chu a sa anga inlang hi an theitôk a nia, mi felhai rêk chu an lampui an rêl infel ngai.

³⁰Mihriam vârnahai, inhriatnahai le thiamnahai hi RENGPA doina a niin chu chanlamboi a ni.

³¹Sakor chu râl buala hmang hrangin le irsiam chian thei a ni ngai, Khannisian inhnêna chu RENGPA ta a ni.