Read Hrangkhol THUVÂRHAI 22 Bible Online

THUVÂRHAI 22 - Hrangkhol bible

THUVÂRHAI 22

¹Irchongna nêkin irhming satna hi a sa ual, irhming satna hi inthang ro.

²Irchong le inriang an om senga, RENGPA isiam ru ruai an ni.

³Mi bengvârin chu siatna hong tung hrang a lei hmua, a lôi ngaia; inmôl rêkin chu ar chôm duma, a tuangna kai a ni ngai.

⁴RENGPA china le irngaiintômna neiin lân, hring sôtna, chôiirsângna, irchongnahai dong ni ti.

⁵Ni hringna lung ni thungin chu mi siahai in-ôkna ngai châng ata irkêm ro.

⁶Nâipang chu a fena hrang lam irhoia khan irchûtirin lân, a hring sûngin inthâ no ni.

⁷Inrianghai chu irchonghai suak an ni. Lâkai ni lâkin chu nin tângnapu suak ni ni.

⁸Dikloina chi tûtu’n chu siatna ât a ta, a ningmurna hnukirhâi chu hlosam a ti.

⁹Mi tikhoi chu satvurin a om ngai, a fâk hrang inrianghai a sem ngai sikin.

¹⁰Mi hmusit ngai kha hêkpaiin lân, khanchu irngo irkhal irkiang a ti; a ni, irsualnahai, irsêlnahai boi a ti.

¹¹Lungrîl irthiang le lungkhamna chong thum nin hlutin chu rêng khom ni rual ni thei a ti.

¹²RENGPA mit khan inhriatna nei mi chu a vong insa ngaia, vârirletnahai thu chu a pai zit ngai.

¹³Mi thaboiin in sûnga a om chiana; “Pên tiang ki fe’n chu kâmkeibakneiin ni sê that a ti,” a ti ngai.

¹⁴Nupang sual hmûr porche chu châng a ni; ama khan RENGPA ihnôlhai chu in-ôk an ti.

¹⁵Nupanghai lungrîla khan intona a kop ngita, khannisian irchutirna hnukirhâi sa khan siam insa a ti.

¹⁶Irchonghai lunghoi tuma thilpêk pêk le irchong hrang nuama inrianghai hnuaisia chu mâni irsamna vai tung a ti.

¹⁷Ni mikuar sungin lân, mi vârhai thu irngai roh.

¹⁸Ni lungrîl chu ar chutirnahai dongna’n hmang ro. Ni lungrîla ni vonga, ni bâia ni hmang sa theiin chu lôm ni ti.

¹⁹Ni iamna kha RENGPA chunga ni’rnghat theina hrangin; atûn hin ni kuang nang ki insîr pe hrang a ni.

²⁰Nangma hrangin thuvâr sômthum ki irziak a ni. Inhriatna le irchutirna sahai a oma,

²¹thutak imo a ini nang irchutir a ti. Khanchu thutak hmu suak hranga itîrin ni omin, sâmna dik tak hong kîrpui thei ni ti.

²²Inriang chu an riang sikin rot pe no’n lân, roirêl hmuna milung indonghai chu nêpsiahai sa no ro.

²³An chungchâng chu RENGPA’N a ithop hrang a ni, anni roktuhai hringna chu in-ôk a ti.

²⁴Ningmur ol mi chu rualin siam no’n lân, mi nunsia chu irpôlpui no ro.

²⁵Anni omdân irchû ni ta, ni nunchan thûl thei loiin châng nang chang pe a ti.

²⁶Mi dang lâkai chunga mophurtu hrangin chonginkung no ro.

²⁷Ni thuan thei no’n chu ni zâlhmun ten khom nang lapai pe an ti.

²⁸Pi le puhaiin ramri an lei ikhang kha phêt no ro.

²⁹Takirtâia sin sa sin mi nir hmutirin lân, mi narân nêka sa, rênghai rual irnghatpui thei mi chuk nang irhmutir ki ti.