Read Hrangkhol THUVÂRHAI 25 Bible Online

THUVÂRHAI 25 - Hrangkhol bible

THUVÂRHAI 25

¹Hi mihai khom hi Solomona thuvâr, Juda rêng Hezekia roirêlna hmuna mihai irziak nôk chu a ni.

²Thil irthup hi Pathian roiinpuina a nia; rênghai roiinpuina rêk chu thil zong suak hi a ni.

³Reng khan imo a ingaitua inhre thei viat no chi ni; a ngaituanahai chu irvân irsâng angin a’rsânga, tuikhanglian inthûk tak angin a inthûk a ni.

⁴Sumtaka irthokin a êk la paiin lân, an luan ngaitu’n thil satak inluantir thei a ti.

⁵Reng makunga irthokin lungvâr saloi phua ngai mi kha khaipaiin lân, a rêng ram chu dikna’n indet ni a ti.

⁶Reng makunga ni ngîrin nang inpâk hrangin phut no’n lân, mi lian khomin irbe no ro.

⁷Ni toihmun kha mi lianhai inkenhai roh an iti nêkin chu, “Toihmun sa uala hin hong intoitirhai ro” nang an iti chu a sa ual.

⁸Thil ni mita ni ihmuhai kha roirêl hmuna fepui zôi zel no ro. Nakana inhriatpuitu dangin ni dik loina an langtir itinin, tho hrang lam inhre no chi ni.

⁹Ni urêng le thubuai nin neiin chu nin ruaiin insîr infel unglân, ite thu irthuphai inlangtir no ro.

¹⁰khano’nchu mi tinin thu irthuphai ip thei mak che ti inhria an ta, nir hming siatna chu boi ta no ni.

¹¹Tum dân fel tak insîrin lân, hi sumtak bêla rângachak ang hi a ni.

¹²Thu zôm nuamtu hrangin chu mi inhriatna irzat nei mi’n irningna chong a ipêk kha rângachak kut sabi le rângachak irthei nêkin khom a hlu ual.

¹³Palai iamom chu a tîrtu hrangin bu ât laia ivurtui dâiriam ang kha a ni. A tîrtu hringna an hartir ngai.

¹⁴Thilpêk hrang inkunga pe viat ngai loi mihai chu rua tholoi sûm le phâivua ang an ni.

¹⁵Tuangdiar taka ngênna hin sêlna ngar tak a khiak ngai. Chong irnêmin roirêltuhai lua an kûk ngai.

¹⁶Khopinter rakin khuaihlutui in no ro; khano’nchu ni ningsia a ta, inluak nôk zit ni ti.

¹⁷Ni urêng ina chai intam hrai no ro; nang hnôngin nang khôkmâkna a ti.

¹⁸Hnôlna dikloi chu hêmvuakhai, khandaihai le thal ngaihai anga thi theina a ni.

¹⁹Milung inzîng laia mi iamom loi tûng chu, ha inhnîng zit puma thil insoi le ke kiak puma fe ang kha a ni.

²⁰Mi beiindong kuanga hla sak chu rammual dâi nikhuaa sûna a puansil lâkpai pe le a sâbea chang-altui buak pe ang kha a ni.

²¹Ni râl a phîng a châmin chu fa hrang pe’n lân; a tui an hrâlin chu tui in hrang pe ro.

²²Ama chu inzakin a hmâi inmôk pe ni ta, khanchu RENGPA’N lômman nang pe a ti.

²³Hmâr phâivua’n rua a zuang intung ngai ang takin, irdemna’n ningmurna an tungtir ngai.

²⁴Dôngma hrângsia leh in hoi taka om nêkin chu bokrop hnuaia om a sa ual.

²⁵Ram hlatak ata thurchi sa inhriat chu tui inhrâl dangchâr lai taka tui dâizan in ang kha a ni.

²⁶Mi fel, mi saloi makunga irpelût chu tuikuang milui tâk le tuihnâr innimtir ang kha a ni.

²⁷Khuaihlutui in intam a isaloi ang khan mâni roiinpuina hrang ringot zong hi sa mah.

²⁸Mâni lungrîl sep zoi theiloi mi chu khopui chim kulpui nei ta loi, râlin an rûnna hrang ir-ông chiana beiindong om tak ang kha a ni.