Read Hrangkhol THUVÂRHAI 27 Bible Online

THUVÂRHAI 27 - Hrangkhol bible

THUVÂRHAI 27

¹Nangtûka thil hong om hrang song no roh. Kha nikhua khan imo a hong itung hrang inhre mak che.

²Ni bi bingin irpâk loiin mi’n nang inpâk ri sehai; a ni, khual mi’n nang inpâk ri sehai.

³Lung le bâli hi a rik oka, khannisianlân, into’n mi a inbuai leh hin irkhi’n chu ite ni ma.

⁴Ningmur chu a nunrôngin a siata, khannisian hnarsâna le irkhi’n chu ite ni ma.

⁵Ni iuksak viat loi anga a ibe hrang nêkin chu inlanga halirchûna a sa ual.

⁶Rualin chu nang an natir le khom a sa. khan, nir doipuiin nang an kua’n chu irdîn ta ro.

⁷Mi khophai hrangin chu khuaihlutui khom ningsia a iom a ni, mi phîngchâm hrang rêkin chu thil khâ tinrêng khom a tui ngai.

⁸Mi, a in sûng ata suak chu vate ar bu ata suak ang kha a ni.

⁹Hriak mirimhoi le mirimhoi dang danghaiin ni lungrîl inlômtir an ta, buaina rêkin chu ni lungrîl dam riam inkhoi a ti.

¹⁰Nangma rual sahai le ni pa rual sahai irnghil viat no ro. Ni vânduaiin nang changpui hrangin ni’rzirpuitu hmun danga om ina fe no ro; ram hla vita om ni’rzirpuitu nêkin chu ni kôla ni tualbômhaiin nang san thei ual an ti.

¹¹Ki nâipa, vârin lân, khanchu ki raifân a ta; ni hrilsiat ngaituhai sâmna hrang nei ki ti.

¹²Mi vârin chu buaina hong tung hrang chu thengthaiin a tonga, intak a tongpui ngai.

¹³Tukhom khual mi lâkai chunga mophur hranga chonginkungtu chu ama neinun ngei khom bândaa intung pe zit inruk a ni.

¹⁴Zînga thoia satvurna chong hring taka a rual kaithoi chu khuasâlna anga bê thei a ni.

¹⁵Dôngma hrângsia chu ro chîng nia ro tho hmer hmer ang kha a ni.

¹⁶Khaanga nu kha itin mo ni indâihrektir thei hrang? Phâivua tho irngam tum le sahriak kut zaphaa infûn tum ang kha a ni.

¹⁷Thîr inngaihtirna hrangin thîr ngêt a inang ang dên hin, mihai khom mi dang ata an irchutir irhlôm ngai.

¹⁸Theipui kung donsuiin lân, a ra fa hrang nei ni ti. Suak khom a pu donsui chu chôiirsângin om a ti.

¹⁹Tuia mâni hmêl a inlang angin mihriam lungrîl chu mihriama an lang ngai.

²⁰Mihriam irzukna chu thânbâi ang kha a nia, ruktôk zel nei mah.

²¹Meiin rângachak le sumtak a fiaa; mihriam khom mihai inpâk dâna irthokin fia thei a ni.

²²Intô chu thi vâng vângin zêm khomin lân, an tona chu zêm inboi pe thei no chi ni.

²³Ni belrahai le ni mihriamhai theidôra enkolin donsui ro,

²⁴irchon chu kumkhua’n dâi hrang ni maka, rênglukhum khom hi suanpâr murdi tena hrang ni ma.

²⁵Hloisûl chu âtin lân, hloi tharhai chu mông nôk a ta, tânga hloisûlhai chu ât ro.

²⁶Ni belra mulhaia irthokin puanhai siam ni ta, ni kêlhai man leh khan loihmun irchô ni ti.

²⁷Nin fâk khop hrang kêl dûthai om a ti, nin in sûngkua fâk hrang, nin siahlo dôngmatehai enkolna hrang le.