Read Hrangkhol THUVÂRHAI 28 Bible Online

THUVÂRHAI 28 - Hrangkhol bible

THUVÂRHAI 28

¹Mi siahai chu tûte’n irzûl loiin laizâm an tho ngaia, mi felhai rêk chu kâmkeibaknei angin an hâi ngai.

²Ramin a tho’nsualin chu hruaitu an irthûl zut zut ngai. Hruaitu, inhriatna nei le inhriat thiamna nei an omin chu ram an ding insôt ngai.

³Irchamnei mi, inrianghai dengintheitir ngai chu chîmu tinrêng insiat irhmang zit ngai ro pheikôi hrât ang a ni.

⁴Dân ngaisak loihaiin chu mi siahai an inzôk ngaia; dân zômhai rêkin chu an indôp ngai.

⁵Mi saloihai khan dikna inhre thiam ngai mahaia, RENGPA chubai mûktuhai vaiin an inhriat thiam ngai.

⁶Irchong, omlam dik loia om nêkin chu inriang omlam dik taka om chu a sa ual.

⁷Ruatharte, dân zômtu chu mi vâr a nia; tukhom nuamninga om ngaihai ruala siam chu a mualinphoina an tung pe ngai.

⁸A pung irzûl le a sum inpungtu chu, mi inriang inrentu hrangin a irtik pe a ni.

⁹Dân zôm nuam loi chu a chongchaina khom intirom a ni.

¹⁰Mi sa sual sin hranga lam dikloia hruai irhmangtu chu mâni châng kamna nâka khit a ti. Mi satirkiphai rêk chu lômman satak dong a ti.

¹¹Irchonghai chu vârin an irbe ngaia, khannisian inriang inhriatna inthûk nei rêkin chu a’rthît hlet ngai.

¹²Mi sahai ircham an hong neiin chu mi tinrêng an lôm ngaia, mi siahai an inlal rêkin chu mihai an irbîk khak ngai.

¹³An siatna irthuphai chu tuanintung ngai mahai. Ip loia inpuanga irlettuhai chu Pathian lungkhamna dong an ti.

¹⁴RENGPA thu zôm mai mi chu an râlvân a sa. a tukullian ngaitu chu irhmang a ti.

¹⁵Hruaitu siathai kuta chu inrianghai hi mi’nvâi tak tak an ni ngai; ama kha kâmkeibaknei inrung le savom inhuk irvâk rêi ruai anga ichiom a ni.

¹⁶Hruaitu, inhriatna nei loi chu hruaitu nunter ni a ti. Dik loina hnôltu chu inlal sôt a ti.

¹⁷Mi thisen chunga mophurtu chu ama thân an rang thei dôra a ichoi a ni. Tûte’n san no ri sehai.

¹⁸Dikin lân, sansuakin om ni ti. Ni dik no’n chu inrîl zôi ni ti.

¹⁹Takirtâi taka sintho mi khan fa hrang nei intam a ta, chanlamboia zoro’n hek ngai mihai chu inriang mai an ti.

²⁰Mi dikhai chu raifân le irngum takin hring an ta, irchong ringot tuma irhnothai chu tôkhmol faloiin suak no ni.

²¹Theibîk nei hi dik mah. Roirêltu senkhat chu a chînte thilpêk inrûk hmûna hrang sikin tho’nsual an ti.

²²Mi tiksiahaiin chu irchon an irzûla, an chunga irsamna a hong tung hrang inhre phâk ngai mahai.

²³Bâi ringota mi’npâk ngaitu nêkin chu mi ngotu chu inhnunga inpâk a hlo tam ual ngai.

²⁴Tukhom a nu mani a pa mani, neinun inrua, “Ite a siatna om ma, tihtu chu inru leh a danglamna om mah.

²⁵Huatirham khan buaina vai an kêlsua ngaia; RENGPA iamna irnghattu chu satvurin om a ti.

²⁶Mâni irngaidân vai zuitu chu intô a nia; mi vârhai irchutirna zuitu rêk chu zôk riamin om a ti.

²⁷Inrianghai changpuitu chu irsam viat no nia. Inrianghai tianga mit insîng petu rêk chu mi tin khuasâl tong a ti.

²⁸Mi siahai an inlalin chu mihai an irbîk ngai. An inrîl tena chu mi felhai an inlal nôk ngai.