Read Hrangkhol THUVÂRHAI 31 Bible Online

THUVÂRHAI 31 - Hrangkhol bible

THUVÂRHAI 31

¹Reng Lemuela kuang a nu irchutirna chong, thuvârhai kha an ni:

²ki nâipa, o ki rîla ra, ki chonginkung nâi, irngai ro.

³Ni hrâtna hi nupang kuang pe no’n lân; ni hringna khom rêng insiat ngaituhai kuang pe no ro.

⁴O Lemuel, irngai roh. Rengin zu a in hrang ni ma.

⁵An inin chu dân irnghil an ta, dengtheihai chunga roirêlna dik hmang thei no ni.

⁶Zu chu mi beiindonghai le a’rhmang chianhai hrang a ni.

⁷In sianlân, an inriangna le an beidongna irnghil ri se.

⁸“Mi, mâni ta hranga hmûrbâi nei thei loihai hrangin chongin lân, changpui innanghai chungchâng thuhaia khan.

⁹An ta hrangin chongin lân, fel takin roirêl ro. Inriang le irsamhai chunga dik takin roirêl roh.

¹⁰Nupang fel tu mo hmu thei hrang? Lunghlu tamtak nêk khomin a hlu ual.

¹¹A pasal lungrîl khan a iam zoia, irsamna rêng rêng nei no ni.

¹²A hring sûngin a pasal hrangin siatna tiang ni loiin satna tiang inzen sin a tho pe ngai.

¹³Samul le pathai a zonga, irthafân takin a kutin a sin ngai.

¹⁴Bepâr mi irkuang ang kha a nia, ram hlatak ata fâkrua a hong chôi ngai.

¹⁵Âr a khuangin a thoia, a in sûng mihai hrang bu anh a thoa; a siahlo nupanghai kuang an sin hrang a hril ngai.

¹⁶Loimân hrang a ngaituaa, ar chôka; khanchu a kut ngeia a sum insuaka khan grep irhuan a siam ngai.

¹⁷Takirtâi takin sin a thoa, a kuthai an hrâttir ngai.

¹⁸Ama thilsiamhai hlutzia an hriata, zân insang ra rakin sin a tho ngai.

¹⁹A kutin pathai a khera, puanhai a không ngai.

²⁰Inrianghai tiang a tik an hoitira, a ni, changpui innanghai tiang a kut an zar ngai.

²¹A in mihai murdi puan lum an siltirhai ngai.

²²Puantha irkhu enhoi tak a siama, a silkai chu patzâi irhmi le puan senduk a ni.

²³a pasal chu mipui kâra ram dang ulianhai leh an toi lai khomin mi imahrip tak a ni ngai.

²⁴Puan sahaiin silkai le kongkhithai a siama, bepâr mihai kuang a zuar ngai.

²⁵A silkai chu hrâtna le roiinpuina a nia, sûnmaton tiang la hong tung hrang khom chi ngai ma.

²⁶Lungrîl ir-ial takin vârna’n a chong suak ngai.

²⁷An in sûng lêng dân en a hoia, ar tha rêng rêng inboi ngai ma.

²⁸A nâihaiin an irngaiinnatzia an inlangtira, a pasal khomin an pâk ngai.

²⁹“Nupang tamtak dôngma sa an oma, khannisian nangma dôra sa chu om mah,” a ti ngai.

³⁰Inditomna hi huangna a nia, hmêl satna khom hi chanlamboi a ni; RENGPA chitu nupang rêk chu inpâkin om a ti.

³¹A kut sin ra chu pe’n lân, a sintho sika khan mi tin tinin inpâk ri sehai.