Read Hrangkhol THUVÂRHAI 5 Bible Online

THUVÂRHAI 5 - Hrangkhol bible

THUVÂRHAI 5

¹Ki nâipa, irngaiin lân, ki vârna le ki inhriatna tiang ni mikuar sung ro.

²Khanchu, omlam sa hong inhriat ni ta, ni chongbâi suak khan inhriatna nei mi ni nih ti inlang a ti.

³Nupang sual hmûr kha khuaihlutui ang dôra thumin, a dang khom oliv hriak angin irnâl a ti,

⁴khannisian a hnungkhôn taka chu ngaisiatna le dengintheina tih no chu nang mâk pe no ni.

⁵Thina ram tiang nang hruai a ta; a lampui fena chu thina lampui a ni.

⁶Hringna lama khan fe maka; khannisian ite inhre loiin a invâi a ni.

⁷Khasikin ki nâipa, ki thu irngaiin lân, ki bâia thu suakhai hi irnghil viat no ro.

⁸Khaanga nupang kuang ata irkiangin lân! A in mikot kôl khom va nâi no ro.

⁹khano’nchu ni roiinpuina kha mi danghaiin nei an ta, ni vânglaiin mi nunsiahai kuta irhmang ni ti.

¹⁰A ni, ram dang mihai khan nir chon murdi lapai an ta, ni sinsôlna ra kha mi dangin dong an ti.

¹¹Ni sûn hnungkhôna chu ni zâlhmuna chap ni ta, ni taksa le ni takpumhai fâk irhmang a ni tâk sikin,

¹²Khanchu “Itho mo ki lei irchutir loi? Itho mo mi danghai ni hrilna ki lei ipom loi?

¹³Ni’rchutirtuhai thu lak lei zôm ngai ma unga. An irchutirna tiang lak ki mikuar lei sung ngai ma unga.

¹⁴Khasikin voikhat rengin mipui laia mualinphoiin ki iom tâk a ni hi”, la ti ni ti.

¹⁵Ni dôngma chunga iamomin lân, ama kuang vai ni lungthungna pe ro.

¹⁶Nupang dang ata nâi ni inei khan ite satna nang insua pe no ni.

¹⁷Khual mihai hrang ni loiin, ni ta hrang vaiin ni nâihai kha an iseilian hrang a ni.

¹⁸Ni dôngmaa khan lômin lân, ni vânglai dôngma kuang vaia khan lômna zong ro,

¹⁹sazuk tuai le inditom tak angin. A inditomna khan nang inlômtir sian; a lungthungna khan nang hual mai ri se.

²⁰Ki nâipa, itho mo nupang dang kuang ni lungthungna ni ipêk hrang? Itho mo mi dang dôngmahai inditomna chu ni inthang ual hrang?

²¹RENGPA’N ni sintho tinrêng a hmu zita. Ni fena tina nang a ien chian ngai a ni.

²²Mi pualoi sualnahai kha châng a ni. Ama sualnahai ngeia khan a khit ngai.

²³Mâni irsep thei loina sikin thi a ta; an vêtna hrai sikin irhmang a ti.