Read Hrangkhol THUVÂRHAI 7 Bible Online

THUVÂRHAI 7 - Hrangkhol bible

THUVÂRHAI 7

¹Ki nâipa, ki thuhai hi inhre maiin lân, ki thupêkhai hi irtik mai roh.

²Ki thupêkhai zômin lân, hring damin om ni ti. Ki dân chu ni mitlailên ni hrung dôra irdînin vong roh.

³Nang ki’rchûna chu zoro tina inkolin lân; ni lungrîl phêka irziak roh.

⁴Vârna chu ni farnu angin bê’n lân, inhriatna kha ni rual lungthungtak angin bê mai roh.

⁵Khanchu mi dang dôngmahai ata ni nupang sualhai inthêmnaa irthokin nang inzôk an ti.

⁶Voikhat chu ki tukvera irthokin ki thîra,

⁷ruatharte inmôl tamtak laia ruatharte inhriatna irsam bîk hi ki hmua.

⁸Nupang inkhat omna kil tianga lampuia khan a fea. An in kôla a thenga,

⁹khohloi misa tâk hnung zân zîng bupa khan.

¹⁰Kha, notizuar irvoa irvo le vârirlet nupang khan a’rtongpuia.

¹¹Nupang inzakboi le tumna inthûk, kil tina chai vêl ngai,

¹²hmun kilkhôra ngîra, lampuihai le bazar hmunhaia mi irdîp vêl ngai a lei nia.

¹³Khanchu, ruatharte kha an kuaa, a tuma, ngam takin a ena, a kuang,

¹⁴“A vuan hin irngeina thilinhlan ki neia, irbôlna hmêhai ki fâka.

¹⁵Khasikin, nangma irtongpui hrangin ki ihong a ni. Nang hmu ki nuama, hin kêng ni lei iom na!

¹⁶Ki zâlhmun chu Aigupta ram patzâi irhmi ki’rkhua.

¹⁷Ki puantha khom bero hai, aloe hai le thingzungthum haiin a mirim kin hoitira.

¹⁸Tho hong ro! zânkhovârin lungthungna pâr lei khiak rei. Ei rôpsuama irpom irhlômin lei lôm rei.

¹⁹Ki pasal lak ina om maka, khual ram hlataka an zina.

²⁰Sum tamtak a chôia, hapta hni hnunga kêng la hong suak a ti” a tia.

²¹Khanu hmêl satna khan an thêm inhnêa, a inriamna chong thum khan a hruai irhmang tâka.

²²Voikhat rengin a zui zel tâka; sechal, an ithatna hmun tianga pan angin le sakhi thalin a milung a sunna hranga chânga irchôm ang khan.

²³Va’n a thina hrang a nih ti inhre loia châng a ipan ngai ang kha a ni.

²⁴Khasikin, ki nâipahai, atûn hin ki thuhai irngai unglân, ki bâia thu suakhai hi pom roi.

²⁵Khaanga nupang kha nin lungrîl inhnê hrangin phal no unglân; a lampuia khan fe irhmang no roi.

²⁶Pasal tamtak siatna a nia, tep zoiloi thina bi tak a ni.

²⁷A ina ni fe’n chu mithi khua pan ang kha ni ni. Thina lampui nâitak chu a ni.