Read Hrangkhol THUHRILTU 1 Bible Online

THUHRILTU 1 - Hrangkhol bible

THUHRILTU 1

¹Hihai hi Davida nâipa, Jerusalema rêng thuhriltu thuhrilhai chu a ni.

²Chanlamboi, chanlamboi, thil tinrêng hi chanlamboi inzen a ni, thuhrilpu’n a ti.

³Sintho hranga hringnun hmanga hin imo an lâpna ni hmu?

⁴Irlo khat chu a liama, irlo dang a hong om nôka, khannisian rammual hi chu a om balamin kumtuangin a oma.

⁵Misa khom hi a suaka, a tâk nôka, a suakna hmun ngêta suak nôk hrangin a kîr nôka.

⁶Phâivua khom sim tiang a hrânga, hmâr tiang irvêlin a hong hrâng nôka, a’rvêl a’rvêla, khan, a fena pangaia a kîr nôk ngai.

⁷Tuidung murdihai khom chu tuipuia an luang lûta, khannisian tuipui chu sip ual hliak maka, tuidunghai chu an luangna dêna khan an luang maia.

⁸Thil tinrêng hi hril thei bana sôlna vai kêng a ini, mit hin a thil hmua hin ruk pe maka, mikuar khom hi inhriatnaa hin sip tik nei ngai no ni.

⁹Thil lei om tâk kha, thil la hong om hrang chu a nia, thil thoa om tâk kha, thil thoa la om hrang chu a nia, misa hnuaia hin thil thar ti rêng rêng hi om mah.

¹⁰Mi’n, “En ta, hi hi thil thar chu a ni,” an iti thei hrang ngân mo a oma? Ei suak mân khan khahai kha chu a lei om sai ving kha a lei ni tâka.

¹¹Atûn lai thil hi tûte’n inhre mahaia. Nakana khom atûn lai thil hi inhre no nihai.

¹²Kei, thuhrilpu hi Jerusalema Israelhai rêng ki lei ni tâka.

¹³Khan, vân hnuaia thil thoa lei om tâk murdi chu vârnaa zong suak hrangin ki milung ki lei hmang tâka; Pathianin mihriam nâihai kuanga buaipui hranga a ipêk hi sin intak tak a ni.

¹⁴Misa hnuaia sin thoa lei om tâk murdi chu ki lei hmu tâka; khanchu irngai ta, thil murdi chu chanlamboi le a korong irzûl ang chu a ni.

¹⁵A lei kôi sai tâk chu intûn thei ni ta maka, khan a om loi chu tep thei ni ta ma.

¹⁶“Keima mâna Jerusalema roi lei rêltuhai nêkin kei chu ki vâr uala, ki milung khomin vârna le inhriatna a nei intam a ni,” ki’rtia.

¹⁷Khan, inhriatna le intona, vârna le invêtna danglamnahai khom chu inhriat ki lei tuma, khannisian hi khom hi chanlamboi chian a nih ti kin hriat tâka.

¹⁸Vârna tamtak a omin buaina a tama, inhriatna a pung le chardongna khom a pung ngai a ni.