Read Hrangkhol THUHRILTU 10 Bible Online

THUHRILTU 10 - Hrangkhol bible

THUHRILTU 10

¹Thoivâi thi sai khomin mirimhoi satak khom a mirim an siat ngai, khaang dênin, invêtna chînte hin vârna le mahripomna irsângtak an siat ngai.

²Mi vâr chu a ngaituanahaiin lampui dika a hruai ngaia, khannisian invêt chu a ngaituanahaiin lampui dik loia a hruai ngai.

³Invêt chu lampuia a fe lai khomin an vêtna chu an langtir ngaia, khasikin mi tinin invêt a nih ti an inhriat ngai.

⁴Roirêltu chu ni chunga a ning an murin, ni sin kha irpai zel no ro, ni dâihrekin chu ni inchâina liantak khom ngaidam ni thei a ti.

⁵Khan, misa hnuaia hin thil saloi ki ihmu chu a oma, roirêltuhaiin dikloi taka roi an rêl sika a ni.

⁶Intohai chu hmun poimo takhai pêkin an oma, irchonghai chu irhnuai takin an toia.

⁷Siahlohai chu sakor chunga an chuanga, rênghai chu hnuaia siahlo anga kea kalchôiin ki hmua.

⁸Khur ni choia ni’n chu nang chu tâ ni ta; dâi ni seta ni’n chu, mirûlin nan chuk a ti.

⁹Lung lâkna hmuna sin ni thoa ni’n chu, lungin pop ni ta, thing ni phûra ni’n chu chitna’n sip ni ti.

¹⁰Ni hrei chu a môla, a bêhai intâta a om noa ni’n chu, irnak tamtak song a nanga. Khannisian, vârna’n chu hlochukna an tungtir ngai.

¹¹Mirûlin an chuk baka ni’n chu, mirûl indôi theina kha ite a’rfêna om no ni.

¹²Mi vâr chu a thuhrilnahaiin chôiindômna an tungtir pe ngaia. Khannisian invêt chu ama ngei thuhrilnahaiin insiatpai a ni ngai.

¹³A phuta a thuhrilhai chu intona a nia, a thuhril mongnahai chu invêtna a ni.

¹⁴Invêtin chu thuhai an pungtira, tukhomin imo a hong itung hrang ti inhre mahai, ama hnunga imo a hong itung hrang ti, tu’n mo ama chu hril thei hrang?

¹⁵Invêt chu a in lampui ten lua an hriat no sikin, a hring sûngin a sân sintho’n om ri se.

¹⁶Reng chu ruatharte a nia, hruaituhai chu zân sôt hruaithenaa an omin chu, ram chu a buai ngai.

¹⁷khannisian, rêngin a bingin thutûknahai a siama, roirêltuhai khoma a zoro taka fâk nêk an zonga ni’n chu, ram chu vânnei tak a ni.

¹⁸Mi thaboi sin tho nuamloi chu, a in chunghai zung a ta, a in chung chu chim a ti.

¹⁹Hruaithena hi raifânna hranga a nia, uainin nunchan chu irthafân takin a siama. Khannisian sum le puan boiin chu an ruai khan nei thei ni mah.

²⁰Reng chu ni lunginchong khomin sêl no ro, khan mi irchong khom ni zâlhmun tentan sûnga khom sêl no ro; chunglêng vahaiin ni thuhai chu chôi an ta, va mitha neihaiin ni thuhrilhai chu van tungna an ti.