Read Hrangkhol THUHRILTU 12 Bible Online

THUHRILTU 12 - Hrangkhol bible

THUHRILTU 12

¹Ni vânglai hin nang a siamtu chu inhre mai ro, nikhua saloihai a hong tung mân le, ‘Lômna rêng rêng nei ma ung e,’ ni tihna hrang kumhai a hong nâi mânin;

²Kha kha misa vâr le tha vâr le ârsi vârhai khi nangma ta hranga an inthim mân le rotho zoia sûm a hong kîr mân hin.

³Khanchu ni kut, nang a hrungtu chu inthing tah a ti, ni ke, atûna hrâthai hi hong duai ta a ta, bu nêkna hrang khomin ni ha chu a tômte vai hong ni ta a ta; ni mithai khom inthimin ite fel takin hmu thei ta no ni.

⁴Ni mikuarhai chu kholaia irhâi le irhâihoi irfûk irhâihai chu inhre thei ta no chi nia, khannisian vate inhrâm khomin ni zâlhmun ata chu nang la kaithoi a ti.

⁵Hmun irsânghai chu chi ni ta, ni lampuia thil chînte khom irfûi hrangin chi ni ta, ni samhai chu almond thing pârhai angin hong ngoi ta a ta, kal ni chôi tika khom khâisor angin lôn ni ta, hring ni irzukna murdihai chu irhmang ving ta a ti, khanchu ni kumtuang ina fe ta ni ta, ni ruak chu thâna an chôi laiin, nang a sûntuhai chu kotsuahaia irbuk an ti.

⁶Sumru hrui chu a chata, rângachak khuri chu a koia, pilbêl chu tuikuanga a koia, sakor tâli chu rungtuia a tâk mân hin.

⁷Ni taksa chu irnêng pila suak a nia, ni thi tika khom ni taksa chu irnêng pila ngêt kîr nôk a ta, nir tha chu Pathian kuang kîr nôk a ti.

⁸Thuhriltu’n chu, “Chanlamboi, chanlamboi, thil tinrêng hi chanlamboi ving a ni,” a ti.

⁹Thuhriltu chu a sân a vâra, a vârna chu mihai irchûtirna’n a hmanga. Thuhriltu hin irdîn takin a suia, thuvâr tamtakhai a sinsiama.

¹⁰Thuhriltu’n chu thudikhai hmusuak hrangin a sân a tuma, khanchu irchutirna le irnghatna thuhai chu a’rziak suaka.

¹¹Mi vâr thuhai chu khianghrol irzum mihaiin an ramhai lam dika an ifepui ngai ang hi a ni. Kha irchutirnahai kha hêmvuak det takhai ang an nia, khahai kha irhnêlin lân, sataka hringnun hmang dân lampui dik chu nang irhmutir thei a ti. kha irchutirna vâr murdihai kha Pathian, ei rênga Belrapu ata suak ving a ni.

¹²Khasikin ki nâipa, kha irchutirnahai kha irchu’n lân, khannisian lekhabu danghai ata chu irdîn ro, lekhabu tamtak siam hin hek nî nei maka; irchu tam khom hi taksa sôlna vai a ni.

¹³Hihai murdi zoia hin chu, thil inkhat vai hi hril hrang a om tâka; Pathian chin lân a thupêkhai zôm ro, kha hrang piala mihriam hi siam ei ni sikin.

¹⁴Pathianin sintho murdihai chunga roi a la rêl hrang a nia, thil irthup tinrêng, a siat mani, a sa mani tihai khom hi.