Read Hrangkhol THUHRILTU 2 Bible Online

THUHRILTU 2 - Hrangkhol bible

THUHRILTU 2

¹Khan ki lungrîlin nunkhonhoia om hi lei hmang rong ki tia, a hoi ngân mo ki tia, khannisian hi khom hi chanlamboi dên a nih ti ki hmusuak tâka.

²Innuina khom hi intona a nih ti ki hmusuaka, lômna khom hi ite a satna om mah.

³Ki lungrîl taksa chu uain leh raifân taka dam sûng sôtnote hmang hrangin ki tuma, khannisian ki milungin vârna chu a zongin, ki ngaidânin kha kha mihaiin irnêng an ihmang lam hranga satak angin ki bêa.

⁴Sin roiinpui tak ki thoa, inhai ki sina, grep irhuanhai ki thoa.

⁵Irhuanhai le lêngna hmunhai ki siama, khataka khan theikung chi tinrêng ki phuna.

⁶Ki thing phunhai buakna hrangin dîlhai ki choia.

⁷Siahlopahai, siahlonuhai ki’rchôka, khabana ki ina irzir suakhai khom ki nei saa; keima mâna Jerusalema lei om murdihai nêk khomin belra pâlhai le se pâlhai khom ki nei uala.

⁸Rângachak le tangka le rênghai irchon le ram sa bîkhai ki bukkhôma. Pasal hlasakpu le nupang hlasaktuhai, pasal nâihai irzuk, meithâi khom tamtak ki neia.

⁹Khasikin, ki roiinpuia, keima mâna Jerusalema om murdihai nêk khan ki roiinpui uala; ki vârna khomin ni maka.

¹⁰Khan, ki mit irzuk murdihai, kha thilhai ata kha inthâ ma unga, raifânna chi tinrêng ata ki milung chu insumtir viat sa ngai ma unga, ki sin thôna murdia khan ki milung chu a sân a râi a fâna; kha kha ki sin sôlnahai rengata lômman a ni.

¹¹Khan, ki kutin sin a lei itho murdihai chu ki ena, kha thilhai thoa ki lei isôlnahai kha, irngai ta, khahai murdi kha chanlamboi le, milung sôlna vai a lei nia, misa hnuaia hin ite inlâpna rêng om ma.

¹²Khanchu rêng khom hin matona rênghaiin an lei ithohai bana khan chu ite tho thei hi om ual maka, khasikin vâra om mani, intoa om mani, invêta om mani khom hi imo a inih ti ki ngaitua nôka.

¹³Khanchu, vâr hi inthim nêkin a sa ual angin, into nêkin vâr a sa ual tih kin hriat tâka.

¹⁴Mi vârin chu a fena hrang an hriata, mi into’n chu inhre ma, khannisian mi’ntohai le mi vârhai mongna chu hmunkhat a ni.

¹⁵Khan ki milungin, “Mi’ntô chunga thil tung ang dênin ki chunga khom hin a la itung hrang a nia, khasikin i sika mo ki lei ivâr bîk ki’rtia. Khan ki bingin ki lungrîl khom hin ite ni mah ki tia.

¹⁶Mi vâr le mi’nto khom chu mihaiin mi vâr khom kha inhre mai ta no nihaia, into khom kha inhre mai ual ta no nihai, mihaiin an sintho murdi chu irnghil ta an ta. Khasikin, mi vâr le into khom hmunkhat an ni.

¹⁷Khasikin keima ta hrangin chu hringnun hi ite ni loia lunginzîngna vai a ni, khasikin thil tinrêng hi chanlamboi a lei nia.

¹⁸Khan, ki hnunga mi la hong om hranghai kuang ki imâksan hrang a nih ti ki hmu sikin, misa hnuaia dengthei taka ki sintho murdihai hi ki ikhôkmâk a ni.

¹⁹Ama chu mi vâr mani, into mani ti tu’n mo inhre thei hrang? Khannisian hi rammuala ki vârna hmanga ki lei itho, thil tinrêng chu ama’n a la hong ichang hrang a nia, khasikin chanlamboi ving a ni.

²⁰Khanchu, ki thîrvêla misa hnuaia ki sintho sikin a sân ki lungrîl a bei a dong tâka.

²¹Mi, vârna le inhriatna le theithiamnahai murdi leh sin a lei thoa, mi sintho viat loi kuanga ar chon hrangin a imâk pe hrang a ni. Hi khom hi chanlamboi le thil saloi tak a ni.

²²Misa hnuaia ni sin thôna murdia hin le hi hringnuna ni dengtheina murdia hin i tak mo ni hmua?

²³Ni hring sûnga ni sintho murdihai kha tuangna vai a nia, a sin thôna chu lungkângna vai kêng a ni. A ni, zâna khom a milung chu irngam ual hliak maka, hi khom hi chanlamboi chian a ni.

²⁴Mihriam ta hranga satak chu fâk le nêka raifân taka a ihmang hi a ni. Khannisian hi khom hi Pathian ata a nih ti kin hriat suaka.

²⁵Ama boiin tu’n mo fa theiin, raifânna hmu thei a ta?

²⁶Ama lunginchuktu kuanga Pathian vârna, inhriatna chu a pêk ngaia. Khannisian mi sualhai chu Pathian lungdo sintuhai ta hrangin irchon an buk khômtirhai ngai. Hi khom hi chanlamboi chian a nia, thil korongboi chian a ni.