Read Hrangkhol THUHRILTU 5 Bible Online

THUHRILTU 5 - Hrangkhol bible

THUHRILTU 5

¹Pathian ina ni fe laiin a sân irdîn ro, mi’ntohai irbôlna nêkin chu irchû hranga va fe hi a sa ual: anni chu thil saloi an tho ti inhre mahai.

²Ni hril mânin ngaitua bak ro, irhnotpasotin Pathian kuang chonginkung no ro; ama chu irvâna om a nia. Nangma chu irnênga om ni ni sikin, khasikin ni hril hrang ban chu hril viat no roh.

³Ni char nin dong dôr, irmang saloi ni nei intam dôr, ni chong intam dôr, chong insual ni nei intam dôr.

⁴Khasikin, Pathian kuang thu nin kunga ni’n chu, inrang takin sua tum ro; mi invêt chu lômna rêng rêng nei ngai ma, ni chonginkung chu irkiptir lat roh.

⁵Chonginkungna neia sua loi nêkin chu, inkungna nei loi lolo hi ni ta hrangin a sa ual.

⁶Ni bâiin suala nang hruai inlût no sianlân, Pathian ochai kuang, “Ki ihril kha, kha lua kha ki ihrilna ni mah kha te,” ti no roh. Itho mo Pathian chu a ninginmurtirin, ni sintho murdi chu inboipaitir ni ta?

⁷Irmang tamtak phan le thu tamtakhai hril khom hi chanlamboi dên a nia, khasikin nangin chu Pathian chu chi roh.

⁸Inrianghai chu sorkârin dengintheitirhaiin felna le dikna chu an chunga tho pehai loia an iom ni hmu khomin, ni charindong no roh. Ram hruaitu murdihai chu anni nêka irsâng ualhaiin an en zuihai maia, khan anni nêka irsâng ualhai khom chu an la oma.

⁹Khan, irnêng inpâkna kha mi murdi hrang a nia, rêng khom chu loimâna irnghat a ni.

¹⁰Tangka sum irngaiinnattu’n chu a milung chuk no nia, irchong irngaiinnattu khomin a milung chuk ual no ni: hi khom hi chanlamboi dên a ni.

¹¹Ni’rchonga ni’n chu fâk hrang mi an tama, a neitu ta hrangin a mithai leh a hmu ti bana chu imo a’rfêna a oma?

¹²Sinthotu chu a fâk intôm khomin, a fâk intam khomin a inmu ar dêna, khannisian irchong chu ar chongna khan in intir thei no ni.

¹³Misa hnuaia hin thil saloi tak ki hmua; kha kha mi’n irchon a binga dengtheina hrang ngota a inei hi a ni.

¹⁴Kha irchonhai kha vânduai nikhuahai a hong tunga, an hek vinga; khanchu nâipasal a hong neia, khannisian a ta hrangin a kuta ite ma pe hrang om ta maka.

¹⁵A nu phîng sûng ata a zuang isuak ang khan, korong ngêtin a fe nôk tâka; a sin sôlna ra khom chu a kuta a ichôi thei ite om mah.

¹⁶Khan hi khom hi thil saloi tak chu a ni, mihriam chu a zuang isuak lam ang takin, a kîr nôka, a korongboi ta hrang ngota lei sôl a ni sikin imo an lâpna?

¹⁷A dam sûng murdia khan inthim hnuaia a fâka, lungni loi takin, natna tuang le ningmur takin a oma.

¹⁸Irngai ta, mihriamhai ta hranga satak ki ihmu chu, Pathianin an hring sûng sôtnote a ipêk sûnga an sintho suakhai fâk le nêka, nunkhonhoi taka an ihmang hi a ni; kha kha mihriamhai tong hranga om chu a ni.

¹⁹Khan, Pathianin mi tin irchongna le neinungna a pêka, a sinsôlnaa khan raifânna khom a pêk saa, hi hi Pathian ata thilpêk chu a ni.

²⁰Khan, Pathianin lôm taka om hrang a phal pe sikin, a hringnun bongzia ngaitua’n a charindong ta no ni.