Read Hrangkhol THUHRILTU 8 Bible Online

THUHRILTU 8 - Hrangkhol bible

THUHRILTU 8

¹Mi vâr vaiin kêng thil omzia takhai chu an hriat thei ngai, vârna’n a hmêl an vârtira, a hmêl inhripna khom an dang ta.

²Pathian makunga chong ni inkung tâk ang khan, rêng thupêk chu zôm roh.

³A makung ata fe suak hrangin irhnot no’n lân, thilsual chu ngîrpui ngai no ro; ama’n chu a nuam nuam a tho thei sikin.

⁴Reng thu chu a’rsângtak sikin, tu’n mo a kuang, “Imo ni itho tâk hi?” ti thei hrang?

⁵A thupêkhai ni zôm sûng chu lungthi takin om ni ta, khan milung vârin thil tinrênga a zoro diktak le a dânhai chu an hriat ngai.

⁶Thil tinrêng hin zoro le dân diktakhai an nei senga, khannisian eini’n chu a chînte kêng ei inhriat!

⁷Thil la hong tung hrang chu inhre maka, a hong ni hrang lam chu tu’n mo hril thei a ta?

⁸Irtha chel theina le thi nî chunga ircham nei tûte om mahai; irdoi sûngin irngam om maka, pualoina’n ama chu sansuak no ni.

⁹Kha thil murdihai kha ki hmu tâka, khanchu misa hnuaia thil tung murdihai hi a sân ki ngaituaa; khanchu mi inkhatin mi dang chunga ama le ama dengtheina hrang pialin irchamneina a nei zoro hi a oma.

¹⁰Khan, mi pualoi an iphûm lai tak ki hmua, khannisian thân ata an kîrin chu mipuihai khan sual an ithôna khopuihai kha an inpâka, hi khom hi chanlamboi a ni.

¹¹Sin siat chunga hremna intung zôi loi a ni ngai sikin, mihriamhai milunga chu thilsual tho hrangin a ingam tâk a ni.

¹²Mi sualin sinsiat voi irzakhat thoin, a hring sûng nikhuahai chu lei sôt khom sianlân, Pathian mahrip thoa zôm ngêt hi a sa ual ti hi ki inhriat a ni:

¹³khannisian mi pualoi ta hrangin chu sa no nia, an dam sûng nikhuahai khom kha misa a tâka irhlîm ang a nia, Pathian chitna an nei no sikin.

¹⁴Khanchu irnêng chunga hin thil fel nia inlang loi hi a tung saa, a kâra chu mi sualhai chunga hremna chu mi felhai chunga a tung ngaia, mi felhai lômman khom chu mi sualhaiin an dong ngaia; hi khom hi keiin chu chanlamboi a nih ki iti a ni.

¹⁵Khasikin nunkhonhoi taka hringnun hmang hi a poimo a nih ti kin hriata, i sika mo ei tia ni’n chu mihriamin hi hring sûnga, a ta hranga satak le a itho theisun chu fâk le nêka nunkhonhoi hmang hi a ni sikin. Kha kha irnêng chunga Pathianin an sin hrang a ipêkhaia khan raifânna’n zuihai ta a ti.

¹⁶Vârna inhre hrang le hnuai chunga sintho tâk murdi inhre hrangin, sûn le zân meng khom inlân, Pathian sinthotheihai chu itiklai khom inhriat suak thei ni mah ti kin hriat suak tâka,

¹⁷Pathian sintho chu inhresuak thei viat ni ma, ni thei dôr khomin tumin lân, hmusuak viat no chi ni. Mi vârhaiin chu inhriatin an irti theia, khannisian inhre mahai.