Read Hrangkhol HLAHAI HLA 2 Bible Online

HLAHAI HLA 2 - Hrangkhol bible

HLAHAI HLA 2

¹Saron rama rose pâr le phâizôla lili pâr chu ki ni.

²Ki lungdi chu nupang murdi laia, ilhling kâra lili pâr ang a ni.

³Ram hnuaia thing tin laia apple thing angin, ki lungdi chu ruathartehai laia a ni; a dâihlîm hnuaia ki toi nuama, a rahai khom ki bâi ta hrangin thum tak a ni.

⁴Khanchu a hruaithena hmuna a ni hruaia, Ki chunga lungkhamna puanzâr chu a târa.

⁵Ki hrâtna chu grep em inchârhai leh khan siam intharin lân, apple rahai leh nin hartir ro, Lungkhamna chu donsûl angin ki thêm tâk sikin.

⁶Ki lungdi vei kut chu ki lu hnuaia a oma, a chang kutin a nin kuaa.

⁷O, Jerusalem nâinuhai nangni ki ngên, Sarza le sazuktuaihai irhmingin chong inkung roi; kin irditna nin buai loi hrangin.

⁸Ki lungdi hla inhnina irhâi ki inhriata, keima tianga hongin, mualpui lianpahai khom paltanin a ni hong pana.

⁹Ki lungdi chu sarza le sazuktuai ang a nia, irngai roh, bang kôla khan a ngîr chiana, tukver rengata a hong thîra, Khuangpuiirhuan bang kâr ata a ni hong vênga.

¹⁰Ki indit takin hiang hin a tia. Hong roh ki indittak ki lungthung, ki kuang hong roh.

¹¹En ta, phalbi chu a hong hek ta, rotho khom a hong mong tâka.

¹²Rama pârhai an hong irmuam tâka, hla sak zoro a hong tung ta, vasuhai inkur irhâi rama inhriat thei a ni ta.

¹³Theipuihai khom a hong hmin irphut thiai tâka, phâivua chu grep pârvâng mirimin a sipa, Khasikin o, ki indit tak ki lungdi, hong roh ki kuang hong roh.

¹⁴Nang chu lungpui kâra vasu irbîk ni anga, ni hmêl inditom tak ni’rhmutirin lân, ni hnuk hoitak nin hretir ta roh.

¹⁵Sihalhai, sihal chînhai chelpaihai roh, ei grep irhuan pâr vâng lai tak hi an insiat mân hin.

¹⁶Ki lungdi chu ki ta a nia, kei khom ama ta ki ni, a belra pâlhai chu lili pâr bila an lêngtirhai ngai.

¹⁷Zîng khorthi dâi a hong thoa, zân a hong inthim nôk mâka chu, Ki lungdi chu sarza le sazuktuai ang dênin Bether tâng chunga khan kîr nôk roh.