Read Hrangkhol HLAHAI HLA 5 Bible Online

HLAHAI HLA 5 - Hrangkhol bible

HLAHAI HLA 5

¹O ki lungdi le ki rualnu, ki’rhuan sûnga ki lûta, rimhoi le mura-hai chu ki’rkhôma; Ki uain tui le ki sehrât irhnutui chu ki ina. Rual lungthung takhaio! fa unglân, in unglân, lungkhamna nin inrui mâsenga chu.

²Ki zâl lai khomin, ki milung chu a harkanga, Ki lungthung tak khan a hong intôk e! Ni hon hong pe ro, ki irngaiinnat ki lungthung, ki vasu sêlna boi, Ki lu irdo’n an duia, ki samhai chu zân irzilin a’rdap zoi ta, tiin.

³Ki sil le kai ki khek tâka, itin mo ki innghâk nôk ta hrang? Ki ke khom ki sôp tâk sikin, Itho mo inbaltir nôk ki ta?

⁴Ki lungdi khan inkhâr ir-ônga a kut a hong rola, a ni hong nâi tâk sikin, ki lungrîl a châng tâka.

⁵Khanchu, ki lungdi inhong pe hrangin ki thoia, ki kuthai chu mura tuiin a zunga, Inkhâr kalna chunghaia khan, ki kutpâr ata mura rimhoihai a zunga.

⁶Khanchu ki lungdi ta hrangin, inkhâr chu kin hong pea; Khannisianlân a lei fe tâka; O, a’rhâi ki irngai nuam lam dân chu o! Ama ki zonga, hmu ta ma unga, Khanchu kin sama, khannisianlân ite ni don ta maka.

⁷Khanchu khopui hrungtuhaiin an ni hmua, an ni vîka, an nin phoptira, khopui hrungtuhaiin ki puanhai an ni lâkpai pea.

⁸O Jerusalem nâinuhai, nangni ki ngên, chonginkungna nei roi, ki lungdi kha nin hmu’n chu lungkhamnain a na a ni, ti hi ama kha ni hril pe roi.

⁹O nupanghai laia hmêl satak, ni lungdi kha mi danghai nêka imo a danglamna a om uala? Imo ama khan kha do dôra irkhêl a iom, ni kuang chong kin inkungtir hrang?

¹⁰Ki lungdi chu a hmêl a sain a sen iai iaia, sîngkhat laia khan a satak a ni.

¹¹A lu chu rângachak irthiangtak ang a nia, a sam khom vaâk anga duk zon zon a ni.

¹²A mithai khom ivatedung kôla vasutehai anga omin, irhnutuia sôp infâi taka om a ni.

¹³A bianghai chu mirimhoi bil, rimhoi vuang ang a ni, a hnerhai chu lili pârhai mura tui leh indui ang chu a ni.

¹⁴A kutpâr chu rângachak intuan, topaz lunghlua siam kutsabi a irbuna; a takpum chu sâihaa siam, Safir lunga tuam ang a ni.

¹⁵A kehai chu sâilungvâr chopuihai ang, rângachak irthianga phun ang a ni, a mal lâng dân chu Lebanon tânghaia Sidar thing irsâng tak ang chu a ni.

¹⁶A ni, O Jerusalem nâinuhai, ki lungdi chu inditom tak a nia, chong tin laia ama chongbâi vai hi a thum tak a nia, ama hi ki lungdi omdânhai chu a ni.