Read Hrangkhol ISAIA 10 Bible Online

ISAIA 10 - Hrangkhol bible

ISAIA 10

¹Dân ihnôngom tak siamin, thupêk ngar tak insuaktuhai nin lu chung la rik a ti.

²Inrianghai lampui nin danhaia, diktaka roirêl pe ni ngai mahai; meithâihai huangin, farahai nin inrûk pehai ngai.

³Ram hlatak ata siatna a hong tung zoro, thuan nôkna nikhuaa khan itin mo nin itho ta hrang? Tu kuang mo changpuina nin la izong hrang, khôn mo nin irchon nin isia ta hrang?

⁴Sala om hranga an ichelhai laia om nin ta, an ithathai laia om nin ta, kha dôr khom khan RENGPA ningmur chum pe maka, a kut a la’rlek maia.

⁵Assuria rêng chunga ningmurin that ki itum mai a ni, ki ningthik insumna’n ki hmanga.

⁶Pathian inhre loihai nam doi hrangin ki tîra, ki ninginmurtirhai thatpaihai hrangin, va huanga van ru pe hrangin, kholâi dialdôk anga sirpol hrangin.

⁷Kha vai khan a ruk ti loiin, nam dang omhai irhmangtir a tuma, hôi viat loia thathai ving a inuam a ni.

⁸“Ki milian neihai hi rêng hmangrua an nia.

⁹Karkhemis khua angin Kalno khuahai khom ki inhnê mo ni ma? Hamath khua angin Arpad khua khom? Samari khua chu Damaska khua angin ki soisakhai kha.

¹⁰Millim biakna rama chu ki kut kin lek maia, Samari le Jerusalem khua nêka millim tamnahai khan,

¹¹Samari khua le an millim biakhai kha chu, kin siat zoi tâka, Jerusalem le an millim biakhai khom, ki isoisakhai loi hrang mo?” a la ti maia.

¹²RENGPA’N hiang hin a ti, “Zion tâng le Jerusalem khua chunga ki itho nuam ki tho zoi tika chu, Assuria chu a lârirpâkna le a’rsongna sikin soisak ki ti,” a tia. Assuria rêngin:

¹³“Ki hrât le ki vâr sikin, keima itho a ni. Nam tin an ramri ki thon pehai ngaia, an irchon thuphai ki suthaia, sehrât bu chîl angin an rênghai ki chîlhaia,

¹⁴Vâ a om no zoro’n artui an ilâkpai pe angin, ram tinrênga irfangin an irbuhai chu, kin pûr pehaia, an irchonhai ki lâk pehaia, an mitha ni không khum ngam om mahaia, a ni khorâi thei zel om mahai,” a tia.

¹⁵Hrei hi a hlektu nêkin mo roiinpui ual ni? thing âtna khom hi a âttu nêkin mo poimo ual ni? Mi that tumna ringot hin irlektu hi mo nang ual ma? Hmol khom hin a chôitu mo vîk theina ni.

¹⁶Khasikin, itinrêng RENGPA ngêtin mi mar takhai khom kôngna hri irveitirhai a ta, mei angin an phîng inlumtir pehai a ti.

¹⁷Israelhai invârtu chu mei chang pehai a ta, an mi irthiang chu meiri-al chang a ti. Sûn khat khomin tinrêng kâng zoi thei a ni. Hloitharpa le ilhlingnei sûl khom kâng zoi a ti.

¹⁸A rampui le sa hlutna neihai chu siat ving a ta, Irtha le taksa tenin hmu hrang om no ni.

¹⁹Rampuia thing la om sunhai khom, nâipanghai itep thei ni ta a ti.

²⁰Kha ni tena Israel la dam sunhai le Jakoba irchi a thi zoi loi la omhaiin, anni soisaktuhai iam ngam zoi ta no nihaia, RENGPA Israel mi irthiang chu iam mai thei ta an ti.

²¹Jakoba irchi a thi zoi loi, la omhaiin, an Pathian hrât tak kuanga hong kîr an ta.

²²Israel mihai chu tuikhanglian kôla chiai nêkin tam khomhai sian, tômte hong kîr an ti. Irhmang hranga inkung an nia, an irhoipui.

²³Itinrêng RENGPA Pathianin a lei iti tâk angin a ram pumpuiin siatna tung a ti.

²⁴Khasikin, itinrêng RENGPA Pathianin hiang hin a ti: “Zion-a om ki mihai, Aigupta mihai itho angin, Assuria’n khianghrol leh nangni vîk khom sianlân, chi no roi.

²⁵Zoro sôtnotea chu ki ningmurna hek a ta, an chunga thuanhai ki ti.

²⁶Itinrêng RENGPA’N Horeb lungpui kôla Midian mihai laia a itho ang khan nin chunga a ivîkna hmol leh tônhai a ta, tuipuia Aigupta mihai a itho pehai ang khan Assuria mihai chu vîk phiarhai a ti.

²⁷Kha ni tena chu Assuria thuhnuaia nin omna chu nangni insua ki ti, nin ringa a ringkol chu inkhiak ki ti,” a ti.

²⁸Aiath khua an hong tunga, Migron khua an hong khêla, Mikmas khua an hong incheltir ta.

²⁹Lamchum an hong khêla, Geba khua an riak ta, Rama khuaa mihai chu chipumin an inthinga. Reng Saula khua Geba mihai an rot zoia,

³⁰Galim khua mihaio, chipumin khêk unglân, Laisa khua mihaio, irngai roi, Anathot mihaio, lei hor son roi,

³¹Madmen mihai chu an rot zoia, Gebin khua mihai chu irbîkna hmun zongin an intân.

³²A vuan hin Nob khua vai hi a la inding a ni, Zion tâng Jerusalem khua chu, kuttum ar hmutira.

³³Irngai ro, RENGPA itinrêng RENGPA’N thing ôn tuk thâk angin ta duai a ta, a la’rsâng ualhai chu tan irkitin irhmang an ti.

³⁴Hrei leh rampui an seta, Lebanon tânga thing lianpahai an itan angin, Assuria chu irkittir a ti.