Read Hrangkhol ISAIA 13 Bible Online

ISAIA 13 - Hrangkhol bible

ISAIA 13

¹Babulon chungchâng chu, Amoza nâipa Isaia ihmu chu:

²Tâng irsângna hmuna irsinsiana târ unglân, sipaihai koisamhai unglân, kho lârirpâk tak kul mikot chu doi hrangin nin kut leh inthem roi.

³Keima ngêtin ki mi indanghai thu ki pêka, ki mihriam songhai, a hrâthai chu, ki ningmur insumna hrangin ki ikoi a ni.

⁴Tânga irhâi omhai khi irngai roi, ram tin ata nam tinrêng honghai, irhâi a ni duah; itinrêng RENGPA’N a sipai râl doi hranga a ibukhai a ni.

⁵Kôlkil ata hong an nia, irvân irsângna ata zuang chum an ni, RENGPA’N a ningmurna hriamhreiin ram pumpui insiat a ti.

⁶Khêk sup sup unglân, RENGPA nikhua chu anai ta, itinrêng thotheiin siatna intungtir a ti.

⁷Khasikin, mi tinrênghai hrâtna tôm a ta, an phûk inthing a ti.

⁸Irtha’nvâiin intakna tuang an ti, nâiha ise angin inhrûm an ti; an ichina an hmuin chu irzakpui irhlôm an ti.

⁹RENGPA nikhua hong tung a ta, a ningmurna an lang tena chu, ramhai chu inthim a ta, a sûnga om mi sualhai chu irhmang an ti.

¹⁰Irvâna ârsi le sikhovârhai khi, an vârna tôm a ta, misa suak khom inthim a ta, tha khom vâr ta no ni.

¹¹Hnuai hi a sual sikin hrem ki ta, mi sualhai khom an sual sikin hremhai ki ti; mi lârirpâkhai irsongna chu inboi ki ta. Mi nunsia le irpâkhai chu irhnuai an ta.

¹²Rângachak hlutak a ivâng angin a thi khom tôm an ta, Ofir rângachak a itôm angin, mihriam irhniamtir ki ti.

¹³A ningmur a hong tung tena chu Itinrêng RENGPA’N irvân khi inhnîngtir a ta, irnêng khom nok a ta, a omna hmun ata nok a ti.

¹⁴Sakhi intân le belra ensui loi an indarh ang hin, mâni mi omna hmuna panin an rama fe zit an ti.

¹⁵An ihmu murdi invithai an ta, an ichel theihai chu khandai leh thathai an ti.

¹⁶An nâitesenhai an mithmuin vîk that pehai an ta, an inhai khom ram zoi a ta, an dôngmahai siatpui pehai an ti.

¹⁷Babulon doi hrangin Media mihai kin phûthaia, sum irzuk loiin, rângachak khom lôm no nihai.

¹⁸An thal chôihai leh ruathartehai kâp thathai an ta, nâitesen inrenna nei no nihai, nâipang inrenna hlek khat khom nei mahai.

¹⁹Reng ram khua roiinpui tak, Babulon kho hoitak, Kaldaihai irsorpui ngai chu RENGPA’N irhniamtir a ta, Sodom le Gomora khua ang khan!

²⁰Tûte om ta no nihaia, sat lam hong panhai khomsian, tûte lût ngam no nihai. Arab mikhual inzinhai khomin puan in sung no nihai. Belra entuhai khomin an belrahai irngampui ta no nihai.

²¹Ramchâra ramsahai om an ta, chînribukin sip zoi a ti, suitililhai om an ta, ram kêlhai irdâina hmun ni a ti.

²²Kul binga khan sihal inrung an ta, rêng in hoitak sûnga khan ine inhrâm an ti. Babulon siatna zoro a hong nâi ta, a sûn a hong tung vâng ta.