Read Hrangkhol ISAIA 2 Bible Online

ISAIA 2 - Hrangkhol bible

ISAIA 2

¹Judai ram le Jerusalem chungchânga Amoza nâipa Isaia’n RENGPA Thu a idong chu:

²Zoro hnungkhôna chu RENGPA in omna tâng chu, tâng roiinpui tak ni a ta, tâng tinrênghai khêl a ta, Nam tinrêng hong nuam an ti.

³Mi tamtak hong an ta, hiang hin ti an ti, “Tho RENGPA tânga son fe ei ti, Jakoba Pathian in omna son, a lam ni le’rhmu an ta, a lampuia khan fe ei ti,” Zion ata dân hong suak a ta, Jerusalem ata hi, RENGPA’N thu a ihril ngai a ni.

⁴Nam tin chunga roirêl a ta, Irngeitirhai a ti, an khandaihai bu tûna hrangin incher an ta, an ufeihai khom theipui ôn tanna hrangin sin an ti. Nam dang chunga nam danghaiin chem hrei inlek ta no nihaia, irdoi dân khom irchu ta no nihai.

⁵Jakoba irchihaio, RENGPA vâra om ta ei ti.

⁶Ni mi Jakoba nâihai hih ni mâkhaia, nisua tianga mihai le, Filistia mihai dôi an hmanga, nam danghai an kop tâk sikin.

⁷Annihai ram chu tangka le rângachakin a sipa, an sum nei dân khom inhre phâk zoi loi a ni. An ram sûnga sakor in an bita, an tâli nei dân khom tep zoi zât ni maka.

⁸An rama khan millim a bita, An kuta an isinhai chubai an mûka.

⁹Mi tinin an ibiak hrang a nia, ite tûng hrang dang nei loiin.

¹⁰RENGPA inzôkna roiinpui le ichiomna khêl loi hrangin, lung ir-ônga lût unglân, pilvûnga irbi roi.

¹¹Mihriamhai mualphoina hong dâi a ta, an irngaiirsângnahai hor hnuai a ti. Kha ni tena chu RENGPA vai hi chôiindôm ni a ti.

¹²Kha ni tena chu itinrêng RENGPA’N, lârirpâkhai, irngaiirsânghai, le mi huang hmang murdihai, irhnuaitirhai a ti.

¹³Lebanon tânga sidar thing irsâng murdihai, Basan rama sesua thinghai tanpaihai a ti.

¹⁴Tâng tin le mual tin, a’rsângnahai irhniamtir a ta,

¹⁵Râl hrungna irsâng le kulbanghai inchimtir a ti;

¹⁶Tarsis-a irkuang, a lian le a sa murdi, a rêngin ngîm zoi a ti.

¹⁷Mihriam irpâkna om ta no nia, An irngaiirsângna khom irhniamtir ni a ti.

¹⁸Kha ni tena chu RENGPA vai hi chôiindôm ni a ti. Millimhai chu om ta no nih.

¹⁹Irnêng nok inhnîng hranga a zuang tena chu, RENGPA inzak omna roiinpui le chiomna khêl hrangin, rôl ir-ônghaia lût an ta, khurpadopa irbi zoi an ti.

²⁰Kha nikhua kha a hong tungin chu, an ibiak tangkaruaa siam millim le rângachak millim, an isiamhai chu a bong a bûiin pai suakhai an ti.

²¹Irnêng nok inhnîng hranga a zuang tena chu, RENGPA inzakna roiinpui le ichiomna khêl hrangin rôl le lung ir-ônga irbi zoi an ti.

²²A thi thei mihriamhai chunga irnghat no roi. Ite lua ni mahai.