Read Hrangkhol ISAIA 21 Bible Online

ISAIA 21 - Hrangkhol bible

ISAIA 21

¹Babulon chung thu chu: kêllaiherin ramchârna a inher angin ram chiom tak ata siatna hong tung a ti.

²Intângna in ichiom tak a ni’rhmutira, kâng inzôina tui a’rsok but buta, inrûk ngaituhaiin an inrûka, Elam sipaihai, imo nin la ien mai, Media sipaihaio, kulhai kha doi ta roi ba, mi dang charindongtirtuhai chu inhek paihai ki ti.

³Khasikin kin thinga nâiha isê angin ki konghai hi a na zoi ta, kûn pumin ki oma, ite inhre ta ma ung. A ni sirpha saa ite inhre thei ta ma ung.

⁴Ki lu a inhnâi zoi ta, ki ibuai ok a ni ta, ki nghâkhmo lungdâi ni sûn chu, keima hrangin ichiom zoro a ni.

⁵Khalâi an lei irfûka, toina hrangin zâmpher an lei dâpa, fâkin an in tâka, nin phûk insum unglân, hruaituhaio, nin phohai siam irfûk roi.

⁶RENGPA’N ki kuang hiang hin a ti: “Fe’n lân, râl hrung hrang mi sehai ro, ni ihmu murdi hril pehai roh.

⁷Sakor chungchuang a bopa honghai chu, sakuartunga chuanghai, satakin enhai roh.”

⁸Râl hrungtu a khêka “Ka pu irpuk irsânga ki ngîra, a sûn a zân zâl loiin ki hrung mai,” tiin.

⁹Sakor chungchuang a bopa honghai, an hong tung thuta! “Babulon khua a siat ta, a siat ta. An millim pathianhai an irtantir pehai rem rum ta,” râl hrungtu’n a ti.

¹⁰Ki mi Israel hruaia khit thunghaio, Israelhai Pathian Itinrêng RENGPA’N Thurchi a nin hriattir ta, nin kuanga khom ki inpuang a ni ta.

¹¹Duma chung thu: Edom ram ata an ni hon sama, “Râl hrungtu, zân mo an sang ta? Râl hrungtu zân mo an sang ta? iti’n.

¹²Râl hrungtuin, “Khua a vâr hrang a ni ta, zân hong thûl hrang a ni ta, an hriat ni nuamin chu hong nôkin lân, ni hor don nôk ro,” a lei tia.

¹³Arabia chung thu: Dedana mi, sahai le Arabia rama riakhai chu,

¹⁴Tema khuaa mihaio, tuiinhrâlhai hrang tui dâi hong la unglân, râl irzûlhai hi bu leh lei donhai roi.

¹⁵Khandaihai le khandai kêlsua sai pumin, thal ngul sia raka irdoina ichiom tak ata hong an ni.

¹⁶RENGPA’N ki kuang hiang hin a ti: “Irhlo ngai mi a sûn tepa kum khat a kâi tena Kedara inlalna chu hek a ti.

¹⁷Kedara mi huaisen thalkâp mihai chu, tômte vai a thi zoi loi om an ti,” RENGPA, Israelhai Pathianin a ti.