Read Hrangkhol ISAIA 26 Bible Online

ISAIA 26 - Hrangkhol bible

ISAIA 26

¹Kha zoiin chu hi hla hih Judai rama sak an ti: “Khopui iamom taka ei lênga, ei zôkna hrangin kul bang a ni siam pea.

²Kul mikothai inhong unglân, nam iamomhai hong lût ri sehai. Thil dik tho ngai namhai chu.

³Dettaka nangma kuanga irnghathai chu irtharngam takin nin omtira.

⁴RENGPA chu kumtuangin iam mai roi, RENGPA chu kumtuanga zôkna lungpui a ni,

⁵irsâng taka omhai khom a kai irhniamtir theia, an omna kho iamomhai an siata, an kul bang vâiphin an changtir ngai.

⁶Ama khan ke’nbâihai an irvâka, an inuamna tiang an pan ngai.

⁷Mi dikhai lampui ni siam nuama, an fena hrang nin tûn pehai ngai.

⁸RENGPA khasikin ni nuam lam anga fe hrangin lampui zongin nang ki nghâk. Ni’rhming inhriat mai hi ki inuamtak a ni.

⁹Zân a hong ni’n, nang kin nang ual uala, a ni ki’rtha hin nang a irzuk a ni, irnêng chunga ni roirêl hrang hi, a sûnga omhaiin roirêlna dik inhre ta an ti.

¹⁰Mi sualhaiin inren hlo ngai khom sianlân, thil dik tho irchu nuam ual mahai, dikna rama khom hin thil sual an tho maia, RENGPA roiinpuina chu hmu nuam mahai.

¹¹Ni kut nir lek khomin hmu nuam ngai mahai, ni mihai ni inren lam hi irhmutirhai roh. Hmuhai sian mualphoi irla ri sehai, ni râlhai hranga meiri-al laia khan, kâng irhmang ri sehai.

¹²RENGPA’N lungirngamna a ni pêka, kin sinthohai khom hi, nangma ni itho pe ving a ni,

¹³O, RENGPA kin Pathian, rêng dang kin chunga hin an inlal ngaia, khannisian nang vai hi kin rêng chu ni nih.

¹⁴An thia, hring thei nôk ta ngai mahai, an irtha khom thoi nôk ta no ni. Anni chu ni hremhaiin inhriat theiin om ta mahai,

¹⁵RENGPA’N ei nam a nin pungtira, a nin liantira, ei omna ramri a ni’rzatir pea, nangma chôiindômin ni iom a ni ta.

¹⁶RENGPA hi an chardong zoro’n nang an pana, anni chu ni hrema, khannisian anni’n nang an koi mai ngaia.

¹⁷Nupang nâihâ isê anga tuangin, RENGPA ni makunga kin om.

¹⁸Nâi vong angin kin oma, nei thei ual loiin. Kin ram khom sûnghual thei ma unga, ite tho thei nei ma ung.

¹⁹Ni mi lei thihai chu thoi nôk an ta, an takpumhai thoi nôk a ti. Nêngpila zâl tâkhai har nôk an ta, râifân takin zâi an ti. Hnâ chuai tâk, irdo’n a inhartir nôk ngai ang hin, a thi tâkhai khom RENGPA’N zuan harhai nôk a ti.

²⁰Ki mihaio, in sûnga lûtin, in irkhâr khum unglân, Pathian ningmur a chum mâka chu lei irbi viat hi roi.

²¹A omna irvân ata RENGPA chu zuang a ta. an sual sikin hnuai mihriamhai hremhai a ti. Inrûka mi thathai irphuang an ta, an ruakhai khom pil irkhu zoi ta no nihai.