Read Hrangkhol ISAIA 3 Bible Online

ISAIA 3 - Hrangkhol bible

ISAIA 3

¹RENGPA, itinrêng RENGPA’N Jerusalem le Judai ram ata, an irnghatna tinrêng a lâk thiai a ni ta, An itûng bu le tuihai khom,

²An pasal sahai le an mi hrâthai khom, roirêltuhai, deipuhai, kutzia entheihai le sipaihai,

³sômringa hruaituhai le an isong ualhai khom, ni ihmanghai le dôi theihai, tasân theihai a lâkhai thiai ta,

⁴An hruaitu hrangin nâipang sia ki ta, an chunga nâipanghaiin roirêl an ti.

⁵Mipui ir-ep sup sup an ta, pasal le pasal irsual an ta, rual le rual irdoi an ti. Ruatharhaiin an ulianhai chitna nei no nihaia, mi chîntehaiin mi inzakomhai ite bêin bê no nihai.

⁶Mihaiin an urêng an pa ina om chu chel an ta, “Nang chu sil le kai chu ni neia, kin hruaitu ni chang pe’n lân, hihai ang hi, ni kuta om ri se,” la ti an ti.

⁷Kha ni tena chu ama’n sêlhai a ta, “Hihai hi ensuihai thei no ning, bu le sil le kai nei ual ma ung, mipuihai hruaitua chu ni siam no roi,” la ti a ti.

⁸Jerusalem chu a ichim a ni ta hi, Judai ram khom a isiat zoi a ni ta. RENGPA doiin an chonga, sin an tho ngai a ni, a roiinpuina an êsêl sikin.

⁹A nuama omin, an thei loina an langa, Sodom mihai angin an sualna mualinphoitirin, irthup thei ta mahai. An chung a rikin, a binga siatna an intungtir a ni.

¹⁰Mi sahai laia chu, “Nin tho insa, nin sinthôna ra ât nin ti,” ti unglân;

¹¹Mi sualhai chung chu a rik, an siat hrang sikin. An itho angin an chunga khom tho ni a ti.

¹²Ki mihai hrungtu chu nâipang an nia, nupanghaiin an chunga roi an rêla; an ihruai irhmangtir a ni, fena hrang lampui inhre loiin, nin ibuai a ni ta.

¹³A mihai sual târinlang hrangin RENGPA ar siam ta, an chung thu rêl hrangin a ngîr ta.

¹⁴RENGPA’N an ulianhai le an hruaituhai chung thu a hong rêla. Nangnihai hi grep irhuan inram zoitu nin ni, mi inrianghai thil nin lâka, nin ina nin bukkhôma.

¹⁵Ithoa mo hianga ki mihai nin isoisakhai, mi inriang an ineisun nin lâk pehaia? RENGPA, tinrêng RENGPA thu suakin a ti.

¹⁶RENGPA’N hiang hin a ti: Jerusalem nupanghai chu an irpâk bâka na! ir-ân otin an fea, an mit leh mi an kâp thiaia, silniang irhâi sirim sirim tiin an ke an thîna.

¹⁷RENGPA’N Zion nupanghai lu inpântir a ta, RENGPA’N korongin inomtirhai a ti.

¹⁸Kha ni tena chu RENGPA’N an tukfam sahai kha la pai pehai a ta; an irtheihai, an samkhithai, an samkilhai,

¹⁹an kuarkâihai, an hmâi huinahai

²⁰samkhit, bânhrial, kongkhitnahai rimhoi sianahai, an tâbithai,

²¹kutsabihai, hnâr irvônahai,

²²songkol irfualhai, puanhai, songkolphal le kuta chôi zât,

²³hlîmenhai, puan irphânhai, diarkai zât hai, le irvôna danghai sutpaihai a ti.

²⁴Mirimhoi irthûlin mirimsia, kongkhit irthûlin hruihrual, sam tam irthûlin sam kol, tukrivo sa irthûlin bora puan, hmêlsa irthûlin hmêlsia an dongtum ni a ti.

²⁵Ni mihai chu khandaia tuk that ni an ti, ni mi hrât inthanghai khom irdoina hmuna thi an ti.

²⁶Kho sûnga hruaituhai khom chap khêka inrûmin om an ta, kho sûnga mihai khom korongin toi ta an ti.