Read Hrangkhol ISAIA 30 Bible Online

ISAIA 30 - Hrangkhol bible

ISAIA 30

¹RENGPA thusuakin hiang hin a ti: “Tehelzong nuam nâihai hi chu na! ki inuam loi lamin sin an thoa, keima thu ni loiin an chonga an sual chunga sualna an irbel zoi ta.

²Ni’rdon loiin Aigupta rama an fea, Faroa chu an zôkna hrangin an delnghaa, Aigupta lômna irfûkin an fea, mualphoi irla an ti.

³Khasikin, Faroa hrâtna chu nin mualinphoina ni ta a ta, Aigupta raifân nin itûng hih nin inzakna ni ta a ti.

⁴An hruaituhai chu Zoan an tunga, an palaihaiin Hanes khua an tung tâka.

⁵An irrualpui thei loihai nam sikin inzak tuang an ta, changpui thei loi, irzukom loihai sikin inzakin mualinphoi an ti,” a tia.

⁶Sim tianga ramsa chungchâng chu: Ram intak le ichiom, kâmkeibaknei nu le pa omna ram, rûlngannei le rûlvânkâi tamna rama, an irchômhai chu sakuartung an inpêltirhaia, a sumhai chu saringsei vuna an thuna. An irngeipui thei loihai nam an pêk hrang a ni.

⁷Aigupta chu ite ni ual maka, changpui thei ite nei no ni, khasikin, “Rûlpui omchian,” nang ki iti a ni.

⁸Fe’n lân, an mit hmu ngêta irziakna khan irziak ro: kumtuanga inhriat maina hrangin lekha bua irziak lût roh.

⁹Tehelzong ngai nam an nia, nâi milak thei tak an ni, RENGPA thupêk irngai nuam loi nâihai an ni.

¹⁰A hmutuhai kuang, “Hmu no roi,” deipuhai kuang, “Nin ihmu angin nin hril no roi, irngaihoihai kai nin hril ngai roi. Kin irtharngamna hrang vai nin hril hen roi.

¹¹Ni kiang pe unglân, kin kôla om ta no roi, Israel mi irthianghai thu hih hril mai ta no roi,” an tia.

¹²Khasikin, Israel mi irthianghaiin hiang hin an ti: “Ki thu hih nin hnôla, nghaltôk songa vâr taka tho nin inthanga, nin irsongpui tak a ni ta.

¹³Hi thil sual hi nin tho tâk sikin lung bang irsâng tak, a chim va vâng tâk, hong puara chim ta hrang ang nin ni ta.

¹⁴Irdîn viat loia pilbêl vuak inkhoi, mei irling thun theia indom ngai angin, tui thâlna hrang khom om loi raka, vîk indi ni hrang nin ni ta,” a tia.

¹⁵Itinrêng RENGPA’N Israel mi irthiangin hiang hin a ti: “Hong kîr unglân, omchian ta roi, khanchu saninhring ni nin ti, chardong loiin iam unglân, kha kha nin hrâtna hrang a ni. Khannisian nuam mak chêia.

¹⁶Nuam ma ung, sakor chunga chuang kin ti,” nin tia, chuang ta unglân rot ta roi, Sakor intân hrât chunga chuang kin ti, nin tia. Kha nêka hrâtin nangni irzûl an ti.

¹⁷Inkhat hroka hruihrual thungin, âibanga nangni innôt pol an ti. Tâng sîp irsinsiana puan nin itârhai kha masan ving nin ti.

¹⁸RENGPA inrenna’n nangni a la nghâka, a khonzâna’n nangni a la hrung lai hin, RENGPA’N diktakin roirêl a ti. Ama nghâktuhai chu hoi pehai a ti.

¹⁹Nangni Zion tânga mi Jerusalem khuaa omhaio, chap nôk ta no chin ni; changpui innanga nin khêk irhâi an hriatin chu nangni inren a ta, nangni donsui a ti.

²⁰RENGPA’N intakna le chardongna nangni intuangtir khom sianlân, nangni irchutu chu hla ual no nia, hmu thei zel nin ti.

²¹Chang tiang mo, vei tiang mo nin fe hrangin chu, “Ama hi lampui dik chu a ni, hi hin fe roi,” nin hnunga hong thiai thiai a ti.

²²Nin tangkarua tuamna le rângachak inluan millimhai chu intirom ti nin ta, pai nin ti, pai zoi a ni tah la ti nin ti.

²³Loia nin chimûhai chu rua inphâtir a ta, a ra satakin hong tam a ti.

²⁴Kha ni tena chu nin sa vâihaiin sûlhring tamna hmuna om an ta, sehrâtchal le sakuartung, sin zonga nin ihmanghai chu, fapôl izen infâi, michi-al angin inliak an ta,

²⁵Nin râlhai isem an nia, an kulhai a chim zoiin chu, tâng irsâng le mual pônga tui luang loina hmuna luang a ta.

²⁶A mihai sâbe tuam pehai a ta, an popnahai a dam zoi tena chu, tha khi misa nêkin vâr a ta, misa khom vâr irkhêlin hapta khat vâr irthûl sûn khatin vâr hrât a ti.

²⁷Hlatak atakhom nangni a en thei, en mai roi, RENGPA sinthotheina a hong inlang ta so, a ningmur meikhu angin ar zâm, milung chuk loiin a nuar so. A thu suak chu meiri-al kâng irhmang thei hrang angin a om.

²⁸A phûk irhâi chu tuilian lêt angin, ring tena tuia lût ang hi a ni. Nam tin theithâkin insiattir a ta, an bâia sakor thîrkam sê an ta, hruaihai a ti.

²⁹Nangni chu kût irthiang hmang phut tâk angin lômin zâi nin ta, Israelhai lungpui, RENGPA tâng panna, irhâihoi tuma an ife ang hin om nin ti.

³⁰RENGPA’N ar hâihoitak chu insuak a ta, a kut thâk chu mi tinin hmu an ti. A ningmur meiri-al chu kâng irhmang hrang anga irthokin phâivua rua hor soia irial tâk ang hin zuang tung a ti.

³¹Assuria-haiin RENGPA irhâi an inhriatin chu chipumin inthing an ta, a ningmur chu tuang an ti.

³²Irngam viat loiin RENGPA’N hruaihai a ta, Assuria vîk murdihai chu a mihai irbukin perkhuang le’rfûktir an ti. Assuria chunga a kut thâk hrang a ni.

³³Assuria rêng hâlna hrang meipui irsiam sai a ni tâka, thing tamtak an thîn sa maia, a kâng hrangin RENGPA’N mei le kât ir-al tui angin zuan luangtir a ti.