Read Hrangkhol ISAIA 32 Bible Online

ISAIA 32 - Hrangkhol bible

ISAIA 32

¹Irngai roh rêng dik inkhat hon lal hrang a ni. A ulianhai khomin diktakin roirêl an ti.

²Phâivuapui a tho khoma an irbîkna hrang, ruapui lai ata an hul theina hrang, ramchâra tui luang le tângchâra lungpui raifân angin om an ti.

³Ngûk takin thil thîr an ta, ngûk takin an mikuar sung an ti.

⁴Irhnot loiin rêl an ta, itinrêng eninfel zoiin, chong nang loiin thu hril infel an ti.

⁵Mi sualhai chu tûte inza hlo no nihaia, mi huatirham chu irngaiirsâng hlo ngai no ni.

⁶Mi sualin chu thu siat a ngaituaa, thil saloi tho hrang ar ngaitua ngai. A sintho le a bâi suak chu RENGPA êsêl lam a ni; phîngchâmhai fâk hrang a lâkpaia, tuiinhrâlhai in hrang a bunpai ngai.

⁷Mi huatirhamhai huatirhamna chu an thûk bâka! Thil sual tho an tum maia, minlakin inrianghai insiathaia, invâihai dika omhai khom insiat an tum ngai.

⁸Mi dikhaiin chu sin sa an ngaitua ngaia, Ama kha an isong ngam a ni.

⁹Khonupui om chianhaio. thoi unglân ki thu hih irngaitua roi. Nangni dôngmate, irtharngama omhaio, ki ihril hi irngaitua sabak roi.

¹⁰Zoro sôtnote zoia chu, nangni lêng irngam taka omhaio lan thing nin ti. Grep ra irhmal hrang nei no chin ni, thei ra irhmal hrang ite nei no chin nih.

¹¹Nuama lômhaio, chi ta roi, lungirngam taka zâlhaio, inthing ta nin ti, irkhek unglân korongin om roi, nin konga khan bora puan bom roi.

¹²Nin irhuan irzukom, chîmu sana ngaihai kha, a siat tâk sikin nin rôp irchûmin chap ta roi.

¹³Ki mihai loi le an sahai chu hruirâng le hloitharin a sip zoi ta. Khopui hoitaka an omna ngai inhai khom, a siat zoi tâk sikin chap chian ta roi.

¹⁴Reng in an inronga, khua inlaltak chu a ram zoi ta. A mualhai le a irhrungna ngai in irsânghai chu rama sakuartunghai lêngna a chang zoi ta sikin ramsâ lêng ta an ti.

¹⁵Chung tiang ata irtha kin sip tena chu ramchârna hmunhai chu ram hring chang ta a ti, theikung irnoi nutin om a ti.

¹⁶Ramchârna hmuna diktakin roirêl an ta, ram satnahai khan diktakin sintho an ti.

¹⁷Diktaka thil an tho sikin, râl irvei loiin om thei ta an ti. Irtharngam takin kumtuangin om an ti.

¹⁸An in le loia ki mihai chu irtharngam takin, omna iamom lungngam takin om mai thei ta an ti.

¹⁹Kha tena chu rampuihai kha dâiruamin om a ta, khopui khom hmun hoitaka om thei ta a ti.

²⁰Tui hnâra thil phun ngai angin, sehrât le sakuartung inlêngtirhai chu hoi pehai a ti.