Read Hrangkhol ISAIA 34 Bible Online

ISAIA 34 - Hrangkhol bible

ISAIA 34

¹Nam tinrênghai hong nâi unglân, irngai hrangin hong roi. Irnêng le a sûnga omhai hong unglân, nin rêngin irngai roi.

²Nam tin chunga RENGPA ning an mura, an sipaihai laia a ning an mur pe a ni. Thathai ving hrangin a siahai ta, that hrangin ar fûktir zoi ta.

³An ruakhai chu pai hrang a nia, phûm hrang ni mah, thululin om a ta, tânghaia an thisen chu luang zuakin om a ti.

⁴Irvâna omhai khom khi râl angin, lekha angin irvân khi inzuatin om a ta, irvâna om murdi khi tâ an ti. Grep le theipui hnâ a ichil ang hin.

⁵Irvâna ki khandai chu ar siam zoi ta, that hranga inkung sai Edom mihai chunga a zuang tunga,

⁶An thisenin RENGPA khandai chu irbual a ti, an thi kâi nuangin om a tih. Belra le kêl thisenhai, kêlchal thâi leh irbôl angin Bozra khuaa RENGPA irbôl a ti. Edom mihai thathai hluk a ta,

⁷anni pâla khan Sele-hai khom that sa ni a ti, sehrâtchal le a’rlâhai khom that sa ni a ti. An ram chu thisenin sip a ta, nêngpilhai khom a thâiin zô a ti.

⁸RENGPA’N phuba a lâk zoro a chuk ta, Zion ta hranga thuan nôkna zoro a phâk ta.

⁹Edom rama tuihai chu âlkatara chang zoi a ta, nêngpil khom kât mei chang a ti. A ram pumpui âlkatara kâng angin kâng a ta,

¹⁰sûn zân that thei ni no ni, khu hlut hlutin om a ti. Thoithar om thei loi rakin ram zoi a ta, tûte’n va hro nuam ta no nihai.

¹¹Tuivaârngoi le sarku om an ta, simbu le vaâkhai om an tih. Irnêng siam man a ta, RENGPA’N insiathai ta a ti.

¹²Reng chang nuam om no nihaia, hruaitu chang nuam khom om ta no nihai.

¹³Reng inhai chu ilhlingin bôm a ta, irkul sûng khom hloi hruirâng bit zoi ta a ti, sialhai omna ni a ta, fapitenu bu bukkhômna hmun ni a ti.

¹⁴Sanghar le Ine irsual mai an ta, sangharin a rualhai koihai a ta, kha khan sa’rkhêlnu lût a ta, irngamna hmu a ti.

¹⁵Mirûl vuang theiin irbu nei a ta, irtui a ta, op inkêi a ti. A têhai op inlumhai a ta, râikosohai khom an chanpuinuhai leh omsuam an ti.

¹⁶RENGPA lekha bu zongin lân tep ro, inkhat khom irhmang no ni, chanpui an inei ving hrang a ni. RENGPA’N thu a pêk tâka, a’rtha’n hruai khôm a ti.

¹⁷An hrangin tasân an fel zoi tâka, ram indang infelin a om ta, kha kha an kumtuang hmun hrang chu a ni, an irchihai khomin lua mai an ti.