Read Hrangkhol ISAIA 36 Bible Online

ISAIA 36 - Hrangkhol bible

ISAIA 36

¹Hezekia kum sômhleiminli an lal kumin, Assuria rêng Senakeriba’n Judai ram khua, kul neihai murdi a doihaia, a lâkpai ta.

²Assuria rêngin Lakis khua ata Jerusalem rêng Hazekia kuang, sipai tamtak le Rab-sakea tiang a tîra; dîl sakinta ual ata tui lampui kôla puan irsûkna hmuna lamlian kôla a ngîra.

³Reng sûngkua enkoltu Hilkia nâipa Eliakima irziaktu Sebna thurchi inhriattu Asapa nâipa Joa hai an va suaka.

⁴Rab-sakea khan, Hezekia hong hril roi; rêng roiinpui Assuria rêngin hiang hin a ti, “Imo ni irnghatna bul ni inei, hiang dôra ni irsût nuam loi!

⁵Nang ki hril hmûrthiam ngot hin râltukfam le sipai hrâtna inlang thei ngai mah. Tu ngân mo ni la inghâk, hiang dôr ni ni tehel pe tâk?

⁶Hi lailuang khianghrol hi, a sintu kut sun hrangin Aigupta rêng Faroa chu a iamtuhai hranga khianghrol intung ang hi a ni.

⁷RENGPA kin Pathian kêng kin irnghat, ni itih mah ni? Ama biakna hmun irsâng le maichâmhai hih Hezekia nuam lam takin a son thi thiaia, Jerusalem le Judai ram mihai laia, hi maichâm vai hin ama ni ibiak hrang a ni, a iti Pathian kha moh nin la iiam mai?

⁸Ka pu Assuria rêng kuang chonginkung roh, atûn khom hin keima’n chu a chuang hrang mi ni hmu photin chu sakor sânghni nang pe ki ti;

⁹Aigupta sakor tâli leh sakora irnghat ni ni’n chu itin mo ka pu sipai hrât loihai ni idoi thei hrang?

¹⁰Hi ram insiat hrangin RENGPA thu ni loia a zuar thon mo ni ni isôn? RENGPA’N chu hi ram hi hong beia insiatpai ving hrangin thu a ni ipêk a ni, tiin hril roi,” a tia.

¹¹Eliakima hai, Sebna hai, Joa haiin Rab-sakea kuanga, “Lungkham takin Aramaik chongin ni siahlohai laia hin thu hril roh, kin inhriat thei ving kul kôla Juda omhai inhriat thei loi hrangin,” a tia.

¹²Rab-sakea rêkin chu, “Ka pu’n hi thu hi nin rêng le nangni laia hril hrang vaiin ni hong tîr mah. Nangni ang dêna mâni êk fâka, an mizun in hrangin kul kôla omhai inhriat hranga a ni hong itîr a ni,” a tia.

¹³Rab-sakea chu a ngîra Juda chongin inring takin a khêka, “Reng roiinpui Assuria rêng thu hi irngai roi.

¹⁴Rengin hiang hin a ti: Hezekia hin nangni huang sianlân, nangni san thei no ni.

¹⁵RENGPA’N ni hong san ngêt a ti, Assuria’n rêng khua hi zuang la viat thei no nih tiin Hezekia’n RENGPA hi iam hrangin nangni a ngên khomin iam no roi.

¹⁶Hezekia thu hi irngai no roi. Assuria rêngin hiang hin a ti:

¹⁷Hong suak unglân irngei ei ti; mi tinin mâni grep fa nin ta, mâni theipui man nôk nin ti, mâni tuipanga tui in ni ti. Zuang ki ta, nin ram anga ram sa bu le uain tamna ram, bu le grep hmun sana tiang nangni hruai ki ti.

¹⁸RENGPA’N ni san a ta tiin Hezekia hin nangni huang no ri se. Nam danghai hi enhai roi; an pathianhai hin Assuria kuang ata hi an san theihai mo?

¹⁹Hamath le Arpad pathianhai chu khôn mo an om zoi ta? Sefarvaim pathian khom khôn mo a om ta? Samari khua lua keima ata a sansuak thei mo?

²⁰Anni pathianhai khan hi ramhai hih an san thei no’n teh RENGPA nin itih khom hin Jerusalem khua hi inzôk thei ni mo?” tiin a tia.

²¹Rengin ite sâm no roi a ti sikin an dâihreka, ite ti pe mahai.

²²Khanchu, rêng sûngkua enkoltu Eliakima, Hilkia nâipa ziaktuhai, Sebna hai, thurchi inlêntu Asafa nâipa Joa hai chu puan thêr silin Hezekia kuang an fea, Rab-sakea thu chu an hrila.