Read Hrangkhol ISAIA 38 Bible Online

ISAIA 38 - Hrangkhol bible

ISAIA 38

¹Kha lai khan rêng Hezekia chu thi vângin a naa, Amoza nâipa Isaia’n a hong pana, a kuang khan, RENGPA’N hiang hin a ti, “Ni in sûngkua thu rêlinfel roh, thi hrang ni nih sikin, dam suak ta no chi ni,” a tia.

²Hezekia chu bang tiang a’rheia, RENGPA kuanga a chongchaia,

³“O RENGPA ni makunga diktakin ki om ngaia, lungrîl irthiang irputin ni mithmua thil sa ki tho ngaia, khasikin lungkham takin nin hre maiin lân,” tiin a chapa.

⁴RENGPA’N Isaia a hong chongpuia:

⁵“Thoiin lân Hezekia va hril ro, RENGPA’N hiang hin a ti: ni chongchaina ki len hriata, ni mitrithi khom ki hmu, irngai ro, kum sômhleiringa nang lan damtir nôk ki ti.

⁶Assuria rênga irthokin hi khua hih san ki ta, a khopui hi hrung khak ki ti.

⁷RENGPA’N a thuhril hi tho ngêt a tih iti RENGPA kuang ata nangma hranga irsinsiamna hrang chu hi hih a ni.

⁸Reng Ahaza dâr tena irkhîna chu danh sômin intômtir ki ti,” a tia. Khanchu sûn dâihlîm chu sûn sômin an kîrtir nôka.

⁹Judai rama rêng Hezekia dam loi hong damtu khan hiang hin a’rziak:

¹⁰Tar kûna dam suak loiin, ki vânglai sûn mithi khua ki ihmang hrang ma ni ta, ki tia.

¹¹Mihring rama RENGPA hmu loiin, rammuala omhai hi irsabei ta ma unga.

¹²Belrapuhaiin an puan in an isetpai ang hin, ki omna in an ni setpai pea. Puan không an phoi zoia an inzuat nôk angin ki hringna hi an nin zuatpai pea, a ni tin ki irzal si sit hrang ma nih ki tia.

¹³Kôlvâr sûng chu changpui zongin ki khêka. Ki ruhai khom hi kâmkeibaknei isê khiak ang hin a oma. A ni tin irzalin ki’rzal si sita.

¹⁴Vangalsâng angin kin hrâm ngaia, vasu angin kin kur long long ngaia. Chung tianga thîrin ki mit an vûng zoi ta. RENGPA imanêpa ki om hi, a bul zuang tum ta roh.

¹⁵Imo ki itho ta hrang? ni ihril angin a hong tung ta, Ki tuangna sikin, ki dam sûng chu irlôi de det ki ti.

¹⁶RENGPA ni hrangin hring ki ta, Nangma hrang vaiin hring ta ki ti. Nin hrâttirin lân, nin damtir ta roh.

¹⁷Ki ituangnahai hih ki satna hrang a lei ni, A nin rena, siatna khur ata a ni kêlsuaa, ki sual murdi a ni ngaidam ta.

¹⁸Mithi khua ata lômthu hril thei ni ma, A thi tâkhaiin chu inpâk thei ngai mahai, nêngpil inthûka tâk chu nang iam thei mahai.

¹⁹A hring a dama la omhai vai hin nang an inpâk thei. Keima atûna nang ki inpâk ang hin, pahaiin an nâihai thudik an inhrilhai angin.

²⁰RENGPA’N a nin dam ta, perkhuang sukin ama inpâkna hla sak ki ta, ki dam sûng chu RENGPA ina Ama inpâkna hla sak ki ti.

²¹Isaia’n, “Theipui ra inhmet indi unglân a sakhuai bêa khuap roi, dam zôi a ti,” a ti kha.

²²Hezekia’n, “RENGPA ina fe thei ki ta, ti irsinsiana imo a inei hrang?” a tia.