Read Hrangkhol ISAIA 41 Bible Online

ISAIA 41 - Hrangkhol bible

ISAIA 41

¹Chômbunga omhai irngai roi, Nin mihai le’rsiam ri sehai, hong unglân hril sa roi, ni roirêl sai angin.

²A fena hmun tina a hrât maia, Nisua tianga nang a koitu hi tu moh a ini? rênghai, namhai a inhnêhaia, khandaiin nêngpil an changhaia, Phâivua’n bu’rsi a isêm invuang angin, a thal hmangin a’rzûl indarhai ngai.

³A’rzûlhai maia, ite pop viat loiin a’rzûl zoia, irnêng sir dop loi ang dôra hrât a ni.

⁴Hi hi tu moh a phut ata lei rêl, Thoitharhai chunga thil hon tungtirtu hi? Kei RENGPA hi a bul tumtu ki ni, a mongna khom keima ngêt ki ni.

⁵Chômbunghaiin ki sintho hmu an ta chi an ti, Kôlkunga omhai chu chi an ta inthing an ti. An irbuka, an hong irthok ta.

⁶An rual sahai chu an irchutirhaia, Mâni urênghai khom, “Chi no roi,” an ti.

⁷Thil incher mihaiin rângachak chunga buak inpuarin, an millim siam innâmtirhai khan, “A siam insa,” tiin a siamtu khan ar chutira, an hnîng loina hrangin thîr kalna leh an kal khaka.

⁸O Israel nang chu ki siahlo ni nia, O Jakoba ki irtan ni ni, ki rualpa Abrahama inei ni nih.

⁹Kôlkung ata ki ilâksuak ni nia, A kil hlatak ata nang ki ikoisuak a ni. “Ki siahlo ni nih,” nang ki ti mai kha, Nang kin thanga nang hnôl viat no ning.

¹⁰Chi no ro, nang ompui mai ki ti, Ni charindong viat no ro, ni Pathian kêng ki ni, hrâtna nang pe ki tia, nang san ki ti. Ki kut chang tianga hrât tak leh hin nang chel ki ti.

¹¹Ni chunga ningmur inlâkhai ngai inzak an ta, mualphoi inla an ti. Nang a doitu khom ite ni ual no nia, irhmang ving an ti.

¹²Nang a doituhai chu zong mai ni ta hmu ual no chi ni, nang a doituhai chu an irhmang zoi hrang a ni.

¹³RENGPA ni Pathian hin nang chel mai ki ta, “Chi no ro, nang san ki ti,” Keima’n ki iti a ni.

¹⁴Israel mi, O Jakoba mi chînte ni khomin lân, “Chi no ro, nang san ki ti,” RENGPA thusuakin a ti. Israel mi irthianghai, irtan hrangtu ki ni.

¹⁵Irngai ro, bu chîlna khôl thar a ha ngaih tak nei angin, nan changtir ki ti. Tânghai chîl ni ta, indi chit a ta, mualhai khom vâiphin chang zoi a ti.

¹⁶Zâp ni ta vuang inlêng a ta, kêllaiherin sêm irhmang zoi a ti. RENGPAA khan lôm ni ta, Israel mi irthianghai chu chôiindômin om an ti.

¹⁷Inrianghai le invâihaiin tui in hrang zong an ta, An hmu no khomin an dangchâr chu kei RENGPA hin sâmhai ki ta, Israelhai Pathian hin masan no ning.

¹⁸Mual le tângdunghaia tui inluangtir ki ta, irhôra tuihnâr inomtir ki ti, tâng chârna hmuna dîl siam ki ta, ramchârna khom tui luang a ti.

¹⁹Tâng chârna Sidar thing hai, thingri le irhmûi, oliv thinghai phun ki ta, ramchârna khan meisâr thinghai, khiangzâihai phun ki ti.

²⁰Kha kha mihaiin hmu an ta, kei RENGPA hin ki iti a nih ti inhria an ti, RENGPA Israel mi irthiang kutsuak a nih ti inhre ving an ti.

²¹Nangni, nam tinhai pathian, thiamthu hril hrang nin inei chu hril roi, RENGPA Israelhai rêngin a ti.

²²Hong hril unglân, thil hong tung hrang nin hril roi, a hong tung hrang kin len hriat theina hrangin, thil lei fe sai khom itina mo, hril infelin, lei ngaitua kin ti.

²³Thil hong tung hrang lei hrilna ni sian, Pathianin sûn maton nih ti len hriat kin ta, A siat moh a sa moh tho phot unglân, chi kin ta, nangni chi thei kin ti.

²⁴Ite ual chu ni mak chêi duah, ite thothei khom nei loiin, nangni chubai mûkhai khom intirom an ni.

²⁵Nisua tiang ata mi kin pungtira, Ki’rhming sâmin, hmâr tiang ata khom mi hong an ti. Bêl vuaktu’n pil a isir chîl angin roirêltuhai chu dialdôka sirchîlin.

²⁶Hi thil hong tunghai hi, “Ni tho’n dik,” kin ti theina hrangin, tu tak hin moh nangni lei hril? Tûte lakin hril mak chêia, tûte hril loi zelin. Tûte’n nin thurchi lak inhre mahaia.

²⁷Zion mihai hril masataktu chu keima ki ni, “En roi nin mihriamhai hong so,” tiin, thu lômom Jerusalem hriltu ki ni.

²⁸Millimhai chu ki hong enhaia, Thu ni hrilpui thei hrang ite hmu ma unga, ki irdonhai khom ite ni sâm thei mahaia.

²⁹An rêngin ite hmang zât om mahai, Ite tho thei khom nei mahaia, an millim sorhai hi ite an ini loi a ni.