Read Hrangkhol ISAIA 42 Bible Online

ISAIA 42 - Hrangkhol bible

ISAIA 42

¹En ro, ki siahlo nang ki chel mai, ki indittak kin thang a ni; a chunga ki’rtha kin sipa, nam tinrênghai chunga diktakin roirêl a ta,

²khêksuak no nia, a hnuk inring no ni. Kholaidunga ar hâi inhre no nihai.

³Lâiluang châng no nia, meiser chok vi viat khom sêmthat ual no ni, diktakin roirêl a ti.

⁴Rammuala hin roirêlna diktak a om mân hin, sôl no nia, a bei khom indongtir no ni. Ram ronghai hin a thu an inghâk mai a ni.

⁵Pathian, irvân siamtu le kaiinphartu hin, Irnêng le a sûnga om indingtirtu, hringna phûk le irtha pe theitu, RENGPA’N hiang hin a ti:

⁶“Kei hi RENGPA chu ki ni, diktaka rêl hrangin nangni ki koisuak, ni bân irnak hrâtin nang ki san. Nangma hmangin mi tinhai laia thu ki thung ta. Nam tin invâr hrangin nang ki sia ta.

⁷Mitchôhai mit invâr hrang le, rôl sûnga om insuak hrangin, inthim laia om sansuak hrangin.

⁸Kei hi, RENGPA nin Pathian chu ki ni. Tûte’n ki roiinpuina nir koppui thei no nihaia, an nin pâkna khom millim irkoppui phal ma ung.

⁹Irngai roh thu lei hril ngaitu a hong tung ta, Thu thar inpuang ki ta, a hong tung mân nang ki lei ihril a ni.”

¹⁰RENGPA inpâkin hla thar ngêt sak unglân, rammual pumpui hin inpâk ri sehai; Tuikhangliana fehai le a sûnga omhaiin, chômbunga omhai le a sûnga omhai khomin inpâk ving ri sehai.

¹¹Ramchâra omhai le a sûnga kho omhaiin inpâk ri sehai, Kedara hai omna khuahaiin, ama chu inpâkhai sian, tâng sîpa irvâkin khêk ri sehai.

¹²Chômbunga omhaiin RENGPA chu inpâkhai sian, chôiindôm ri sehai.

¹³Irdoi hranga mi hrâthai irdoipui thei dôrin RENGPA chu a hor thokin a hong khêka, a hnuk a suaka, a râlhai lai ata a hrât lam chu an langtir ta.

¹⁴Sôttak sûng ti ual loiin, ki mihai ki dâisanhai hreka, atûn chu nâihâ irveiin kin hrûma, kin milung a na ta.

¹⁵Tâng le mualhai insiathai ki ta, sûlhring inchâr ki ta, lungpuihai chu insimhai ki ta, dîlhai khom inkangtir ki ti.

¹⁶Mitchohai chu inhre ngai loi lampuia hruaihai ki ta, an fe loina hmuna fepuihai ki ti. Inthim chu sensâi ki ta, lampui irrual loihai irrualtir ki ta, annihai kha ki itho hranghai chu a ni, insel viat no ning.

¹⁷Millim iama, “Kin Pathian ni nia,” tituhai chu, duai an ta, mualphoi irsak an ti.

¹⁸Kuarsêthaio irngai roi, mitchohaio irhei unglân, en roi!

¹⁹Ki siahlo anga mitchô hi tu moh om, ki mi tîr anga kuarsêt hi tu moh om hrang? RENGPA siahlo le a mi indang anga mitcho tu moh om?

²⁰Thil tamtak a hmua, khannisian zôm loiin a oma, mikuar a doa, khannisian inhre thei mah.

²¹RENGPA’N a dikzia inlangna hrangin A dân chôiindôma roiinpui a inuam a ni.

²²(Khannisian hi mihaiin rokna le longhai an tonga, Sirhupa an tâka, intângna ina an intâng zoia; Sala hrangin chel an nia, a san hrangtu tûte om mahai.

²³Nin laia tu’n moh ama hi inhre nuam? Ngûktaka irngaitua hrang tu moh om?

²⁴Jakoba chu tu mo hrâtlâksonghai kuanga pêk, Israel chu tu mo hrâtlâksonghai kuanga pêk? RENGPA mo ni ma? A chunga khan thil sual an thoa, a lampui zui loiin a dânhai khom zôm loiin an oma.

²⁵A ningmurna chu a chunga an sum pehaia, Irdoina irkhêltak an tuang ta. Israel chunga ningmurna chu ar al tâka, an kâng innahaia, inhre mahaia, ite uksak nuam viat loiin an oma.