Read Hrangkhol ISAIA 43 Bible Online

ISAIA 43 - Hrangkhol bible

ISAIA 43

¹Atûn chu, RENGPA’N hiang hin a ti: “Jakoba nang ki siam, Israel nang ki inding a ni, chi no ro, nang a’rtantu ki ni, Ni’rhming irlamin nang ki koi, ki ta ni nih.

²Tui inthûk ni pal lai khomin nang ompui ki ta, Tuilian khomin nang ngîm thei no ni, meipui laia fe khomin lân nang kâng no ni, Meidôn khomin nang hliai innatir thei no ni.

³Kei RENGPA hi ni Pathian chu ki ni, Israel mi irthiang ni saninhringtu chu, nangma irtanna’n Aigupta ki pêka, nangma le irthûlin Ethiopia le Seba ki pêka.

⁴Nang ki’rngaiinhlu ngôi ngôia, nang irngaiirsângin lung nang ki thunga, Nangma sikin mi dang ki hnôlhaia, Mi tamtak ki ihnôlhai a ni.

⁵Chi no ro, nang ompui ki ti, Nisua tianga nir chi omhai hong hruaihai ki ta, Nitâk tianga omhai bukkhômhai ki ti.

⁶Suak ving hrangin hmâr tiang hrilhai ki ta, kalkhumhai hrai loi hrangin sim tianga omhai hrilhai ki ti, ki nâipasalhai ram hlatak ata hong hruai unglân, ki nâinuhai kôlkung ata hong hruaihai roi.

⁷An rêngin ki’rhming irput an ni, ki roiinpuina inlangtir hranga ki isiam an nia, Ki kut suak zit an ni.

⁸Mit nei chaka mitchô le, mikuar nei chaka, kuarsêthai chu hong bukhai roi.

⁹Nam tinrêng irbukhai sianlân, chi tinrêng hong ri sehai. An laia hi hih tu mo a hril, tianlai ata lei insîr ta sai, an hril indik inhriatpuitu hong hruaihai sian, mihai inhriatin “A dik,” hong ti ri se.

¹⁰Ki thu inhriattu ni nih RENGPA thusuakin a ti. Ki siahlo nang ki inthang ni ni, nin hre hrang le ni iam hrangin keima hi Pathian omsun ki nih ti inhriatpui hrangin. Ki om mâna om Pathian dang om mahaia, ki hnunga khom om ta no nihai.

¹¹Keima vai hi RENGPA chu ki ni, saninhringtu dang tûte om ta no nihai.

¹²Thil hong om hrang lam ki len sîr ngaia, Saninhringtu chu keima hi ki ni, keima vaiin nangni ki hril pe ngai a ni, hihai hi nam dang pathianhaiin tho thei mahai. Ki thu inhriattu ni nih RENGPA thusuakin a ti: Keima vai hi Pathian chu ki ni.

¹³Irnêng irsiang mân ata Pathian ki ni, ki kut ata tûte’n ni la pe thei no nihaia, ki iti tâk chu tûte a sût thei hrang om mahai.

¹⁴Nangma irtantu Israel mi irthiang, RENGPA’N hiang hin a ti: “Nangnihai sikin Babulon doi hrang mi tîr ki ta, an kul kalnahai chu suk insiat pehai ki ta, Kaldaihai chu chap khub khub an ti.

¹⁵Keima hi, mi irthiang RENGPA ki ni, Israelhai siamtu nin rêng ki ni.

¹⁶Tuipui irkân theina lampui ki siama, tui irsok but but laia fena lampui ki siam a ni.

¹⁷Sakor le tâli ki hruaihaia, sipai rual hrâttak ki ikoihai kha. An thal zoia, a thoi thei nôk om loiin, meiser thatpai rip angin an inthim zoi ta.

¹⁸Tianlai thilhaia irnghat ta no roi, A fe tâk thil ngaitua ta no roi;

¹⁹Thil thar ki itho hrang hi thîr ual ta roi, A hong tung vâng ta, nin ihmu loi ma ni? Ramchâr hmuna lampui siam ki ta, ramchârna hmuna tuipui inluangtir ki ti.

²⁰Ram sâhaiin ni chôiindôm an ta, Sihalhai le Ostrich vâhaiin nin pâk an ti. Ki mi irtanhai in hrang ramchârna hmuna tui irtingtir ki ta, ramchâra tui kin luangtir tena chu,

²¹Keima hranga ki isiam an ni. Ni lan pâk ngêt an ti.

²²Jakoba, nangma’n chu ni koi mak chea, O Israel ni ni hnông ta.

²³Hâlirvômna hrangin kêlbelra ni pe mak chea, irbôlnahaiin ite ni chôiindôm mak che. Nin laia thil inhlan chu nangni inphût ma unga, mirimhoi khom nangni insôltir ma ung.

²⁴Thil mirimhoihai ni pe ngai mak chêia, Irbôlna hrangin nin sial sahai leh nin thâi mak chêi. Nin sualna sikin nin ni hnônga, nin sinsiatnahai hi ki hnông zoi ta.

²⁵Keima hi ki nih nin sual ngaidam theitu chu, keima sikin kêng nangni ki ingaidam, Nin sualnahai inhre mai loia ki iom a ni.

²⁶Ni doi hrangin hong unglân, nin thiam thu hong hril roi.

²⁷Nin pa matontakpu khan thilsual a thoa, nin hruaituhai lak tehel an ni zong pea.

²⁸Khanchu, ki hmun irthianga hruaituhai porinchetirin, Jakoba chu khosâltongin siam ki ta, Israelhai chu irsêlna bûra siam ki ti.