Read Hrangkhol ISAIA 44 Bible Online

ISAIA 44 - Hrangkhol bible

ISAIA 44

¹Atûn hin chu, nang ki siahlo Jakoba, ki mi inthang, O Israel irngai roh.

²RENGPA’N hiang hin a ti: Nangni siamtu ki nia, sul sûnga nangni inngîrtirtu ki ni, Ki siahlo Jakoba nang ki changpui maia, ki inthang sai, Jesurun chi no roh.

³Ramchârhai tui buak ki ta, ramna hmuna tui inluangtir ki ti. Ni’rchihai chunga ki’rtha sem ki ta, ni tû le ni nâihai satvur ki ti.

⁴Tui tamna hmuna phâiram a ihring nuam ang hin le tuipui kôla sûl hringhai ang hin.

⁵“RENGPA ta kin ni,” mihaiin ni hong ti thei an ta, Jakoba irhming hong irphua sa an tia; senkhathaiin chu an bâna, “RENGPA ta,” ti irziak an ta, senkhathaiin Israel irhming irput an ti.

⁶Itinrêng RENGPA, Israelhai rêng, anni irtanpu RENGPA’N hiang hin a ti: ‘Kei hi a bul le a mong ki ni,’ Keima ti no hi Pathian dang om mahai.

⁷Keima ang hi tu mo la om? hong hrilhai sian, hong târinlang infel ri sehai. Tianlai mihai ki indinghai moh ni ma, thil hong tung hrang le, thil hong om hrang chu hon puang ri sehai ba.

⁸Inlâi no unglân chi viat no roi, tianlai ata nangni ki lei insîr pe sai mo ni ma? Ki thu inhriattu nin ni, keima ta no hi Pathian dang moh an la om? Ki inhriat zoi loi Pathian roiinpui an la iom ma ni?

⁹Millim siamtuhai hi ite ual ni mahaia, an thil siam an inhluhai laka ite hmangna boi. Ama biaktuhai hin ite inhre infel thei loiin lan zak an ti.

¹⁰Pathian irlim siamin, millim songhai ngai hin ar fêna om loiin an ibiak hrang ma ni?

¹¹Ama biaktu murdihai chu mualphoiin la om ving an ti. Mi theithiamhai khom hi mihriam ma mai an nia, honghai sianlân ki makunga hong ngîr ri sehai, inthing an ta, mualinphoi ok an ti.

¹²Thîrsu’n meiir-ala hâlin hrei a suka, sekchôi le thei dôrin a suka. A phîngchâmin a sôla, tuiinhrâlin a isôl ngai a ni.

¹³Thing mistiri’n bakot siam hrangin a’rkhia, pensil leh an danga, mihriam dûr a hong changa; a in sûnga se hrangin mihriam dûr satak a ni tâka.

¹⁴Sidar thing ama hrangin a phûra, Ise thing le sesua thinghai phûrin, ram hnuaia thing sa chi ama hrang bîka an danga,

¹⁵Kha hnunga chu mi hrangin meia tua ni ta a ta; khataka kha lâk a ta, a iuat ngai; a ni, meia a sêma, bai a siam ngai a ni, pathian a siama, a biak ngai; kha thing kha millim siamchopa a siama, kha kha khûksadelin chubai a mûk ngai.

¹⁶senkhat chu thingin a tuaa, a uata, ar al leh bu a phoia, senkhat chu millim siamna hrangin a hmanga, sa a roa, a fâk khopa, meilum uat pumin, “A lum hrai ta, a chok nuam zap,” a tia.

¹⁷A zôkhai leh khan pathian dûr a siama, chubai a mûk ta. A chongchaia, “Ki pathian ni nih ni saninhring ro,” a tia.

¹⁸Annihai anga mihai kha chu an inmôl hrai ta, ite inhre loi an ni; an ihmuhai an chia, an mit an insîng ngaia, an inhriat thei loina hrangin lungrîl pe ngai mahai.

¹⁹Senkhat chu thingtuain ki hmanga, bu ki phoinaa, sa ki roa, ki fâka, senkhat chu millim ki siamnaa, thingtum bong kôla kûnin chubai ki imûk a ni hi, ti inhriat zel om mahaia, a hmu thei khom om mahai.

²⁰Nêngpil fâk anga ite nangloi a nia, an sâpna saloi khan a hruai insuala, sansuak thei ni ta ma, “Ki millim chôi hin ite tho thei mah,” tihna châng zel inhre thei mah.

²¹Jakoba, hi hi inhre mai ro, Israel, nangma hi chu ki siahlo ni ni, ki siahlo ni hrangin nang ki siama, O Israel, nang irnghil ngai ma ung.

²²Phâivua’n sûm a isêmpai angin ni sin insiatna ki’rnghila, phâivua’n sûm a isêm irhmang angin nin sualnahai ki sêm irhmangtir ta, khasikin ki kuang hong kîr ta roi, nang a’rtantu ki ni.

²³Irvânhaio, lômin zâi roi, RENGPA’N sin a itho a ni ta, irnêng rîlhai khom khêksuak unglân, Ram le thing om murdihaio, khêk murin om ta roi. Jakoba chu RENGPA’N a’rtansuaka, Israelhai laia nin chôiindôm sa tâk.

²⁴Sul ata nangni siamtu, nang a’rtantu RENGPA’N hiang hin a ti: “Itinrêng siamtu, keima hi RENGPA chu ki nia, ki binga irvân kaiphar theitu ki ni, irnêng ki siam lai khan tu moh om sa?

²⁵Deipu dolhai thu hlochuk loiin tasân theihai mualinphoitirin, mi vârhai thu ki thuan paihaia, an inhriatna chanlamboi kin hriattirhaia,

²⁶ki siahlohai thu kin detpuihaia, ki tîrtônhai iti hlo kin chuk pehai ngai. Jerusalem khua chu lua nôk an ta, Judai rama khuahai khom inding nôk an ti, a siathai khom siaminsa nôk ki ta,” ki tia.

²⁷Tuikhanglian khom kangchat hrangin thu ki pêka, a tuihai a kang ta.

²⁸Kura kuanga khan, “Ki belra enkoltu ni ni, ki thiltum chu hlo nin chuk pe ro, Jerusalem siaminsa nôk sianlân, Tempil sinna hrang lung inphûmtir ro,” ki ti saa.