Read Hrangkhol ISAIA 47 Bible Online

ISAIA 47 - Hrangkhol bible

ISAIA 47

¹O nang dôngmate Babulon khua nâinu, Zuang suakin lân, nêngpila hin toi roh. Rêngtoihmun ata kha Kaldai nâinu irnênga hin toi ro, a’rnoi nêngnuang nang ti ual no nihai.

²Bu sukna khôl intûkin lân, bu chu suk ro, Ni hmâi irkhuna hlîkpaiin lân, ni puanbom kha irfîng ualin lân, ni mal ten lîmin lân tui kha irkân ta roh.

³Korongin omin lân, ni ser khom inlang ri se. Phubâ la ki ta, tûte irkhol no ning.

⁴Israel mi irthiang a ni’rtantu a nia, A’rhming chu itinrêng RENGPA a ni.

⁵Nangni Kaldai nâinuhaio, dâihrekin inthim laia khan toi hluk ta roi. Nam tin nâinu nang vîk ta no nihai.

⁶Ki mihai chunga hin ki ning an mura, ki mi inthanghai ki soisakhaia, ni kuta ki hong pêk tâka, lung len kham mak chea. Putarhai khom irdîn viat loiin ni hmanghai maia.

⁷Rêngnu, ni kumtuang in hrang irngaiin thil hong tung hrang thîr loiin, Ni mongna hrang khom inhre loiin.

⁸Nuamninga om nuam ngainu; irngaitua ro, Lungirngam takin ni om ngaia, “Keima ti no hi tu dang moh a la om? ni ti ngaia. Meithâi ni no ning, lusûn tuang viat no ning,” ni ti ngaia.

⁹Voikhat rengin, sûn khat sûng zelin, hi thilhai hi tuang ni ti. Minlak tho thei zap khomin lân, lusûn tuang ni ta, meithâiin om ni ti.

¹⁰Ite bêa bê loiin thil sual ni tho ngaia, Tûte’n nang hmu no nihai tiin, ni vârna khan nang a hruai insual zoi ta, “Keima ti no chu tu dang mo om?” ni lei irti ngai kha.

¹¹Minlak thoa zôk thei loina, sin saloiin nang de hrang a ni ta. Tuang zoi zât loi vânduainahai ni chunga hin hong tung hrang a ni. Ni lei inhriat thei loi siatna hong tung thut ta a ti.

¹²Ni dôi theina hai, ni dôi bûrhai, Ni nâipang lai ata ni ihmang ngai kha masan no ro, tuhai lai ata mani chu sin sain lan lâppui thei ni ti.

¹³Nang ar don an itam ngai tia le teh, ite tho thei loiin irvân tung mâna, ârsi suihai ngai le a tha tin thil hril ngaihai hong tuanghaiin lân, vânduai irti an ti.

¹⁴Mei ikâng irhmang thei fapôl ang ma mai ni an ti, meichok lai ata irsansuak thei loiin, anni hrangin lum pehai a ta, mei irvâm uat hrang om loi angin om a ti.

¹⁵Ni nâipang lai ata ni irthoppuihai le ni ihmanghai ngai, khaanga omchian an lei ni tâka, an nuam tika nang rotsan an ta. Tûte’n nang san thei no nihai.