Read Hrangkhol ISAIA 48 Bible Online

ISAIA 48 - Hrangkhol bible

ISAIA 48

¹Jakoba in mihaio, irngai roi, Israel Pathian irhming chu nin irlama, chi ta tak loiin ni itho mai mai a ni.

²Khopui irthiang mi kin nih nin irtia, Israelhai Pathian iamtu nin irtia, ama irhming chu itinrêng RENGPA a ni.

³A phut ata tianlaia thil nangni ki hril pea, Ki hrilin kin sîrsuaka, ki iti chu ki itho ngai a ni.

⁴Nin tukul a liana, nin ring chu thîr anga ngar a ni. Nin michal laka thîr irbun anga ngar a ni.

⁵Nin chungchâng thuhai ki len sîr tâka, a hong tung mân nangni ki len hril ngaia. khano’nchu, “Kin millim siam, ki innâm le suang millimhai thu thua om a ni; la ti pal nin ti.

⁶Ama hi nin hmua, nin inhriat ta, A dik ti mak chêi mo? Atûn ata thil thar nangni inhril ta ki ti, nin inhriat loi thilhai chu.

⁷Atûn khan kin omtira, matona khan chu inhre ngai mai chêi, om tâk lei ni sian chu, “Kin inhriat sai kêng,” ti nin ti.

⁸Nin la inhriat ngai loi, nin la ihmu ngai loi, matona khan mikuar khoma nin inhriat thei loi, mi huang ngai ni nih ti kin hriat, nin suak ata tehel lei zong ngai mi nin nia.

⁹Ki’rhming sikin ki ningmurna chu insum ki tuma, an nin pâk theina hrangin ki insum ngai a ni, lan hektir ual no ning.

¹⁰Tangkaruahai chu irtapa an hâl irthiang ngaia, Nangnihai khom hi intakna ata nangni fia ki ti.

¹¹Keima sik ringota tho ki ni, ki’rhming insiat khom nuam ma unga, ki roiinpuina chu tûte ni irkoppui nuam ma ung.

¹²O ki ikoi ngai Israel, O Jakoba ki thu hi irngai ro, kei hi a bul le a mongna ki ni.

¹³Irnêng irnghatna, ki kuta ki isiam a ni, Ki kut chang tiang irvân khi ki kaiphara, ki hong koia, an lei iom ngai a ni.

¹⁴Hor buk ving unglân, irngai roi, tu takin moh hi thil hi lei hril ngai? RENGPA lungthungpu’n Babulon mi’n a nuam lam tak zuang tho a ti, Kaldai mihai chunga a kut thâk a ti.

¹⁵Keima’n ki lei ihril sai a ni, ki ikoi a ni, ki hong hruaia, a itho hrang chu irnghil ki ti.

¹⁶Hong nâi unglân, ama hi inhre roi, a phut ata a rûkin thu ki hrila, thil hong tung hranga hin om mai ki ti. RENGPA Pathianin a ni tîra, Irtha khom a ni ipêk a ni.

¹⁷Nangma inthangtu, Israel mi irthiang, RENGPA’N hiang hin a ti: ‘Keima hi RENGPA ni Pathian chu ki ni. Ni hranga sin sa nang ki’rchutira, ni fena hranga lampui chu nang irhmutir ki ti.

¹⁸Ki thupêkhai inhre mai ngai unglân chu o! Tuipui kang ngai loi angin satvurna zuang luang a ta, Tuiirsokhaiin muang a hong itôn ngai angin, hlochukna khom ni ta hrangin zuang tung a ti.

¹⁹Ni’rchihai chu hnuaia vâiphin anga tam ni a ti, ni tû le nâihai chu tep zoi loi ni an ti. Ki makunga chu hek ual no nihai.

²⁰Babulon khua ata fesuak unglân, Kaldai ram hi rotsan roh. Râifân taka khêkin ki thu hi inpuang unglân, hmun tinrênga hril mai roi, RENGPA’N a siahlo Jakoba chu ar tansuak ta,’ tiin khêk roi.

²¹Ramchârna hmuna a hruai khomin a tuiinhrâl loiin, lungpui sûng ata an hrangin tui a luang suaka, Lungpui rîl ata tuiphûl a hong suaka.

²²Mi sualhai hrangin irtharngamna rêng om no ni,” RENGPA’N a ti.