Read Hrangkhol ISAIA 51 Bible Online

ISAIA 51 - Hrangkhol bible

ISAIA 51

¹Sansuak nuama RENGPA zongtuhaio, ki thu hi irngai roi. Nin suakna lungpui hi en unglân, nin hong isuakna lungpui hi en roi.

²Nin irchi bul Abrahama kha irngaitua roi, Sari, nangni neitu kha inhre mai roi. Ki koi lai khan chu nâi nei mahaia, Sat ki vura, an ipung ok a ni ta.

³RENGPA’N Zion khua chu lung a thunga, A khua chîn sûnga omhai irtharngam a sakhaia; a ram ite sa thei ta loihai khom, Eden irhuan angin siam a ta, a ram siat tâk chu RENGPA’N irhuan inchangtir a ti. Kha khan râifânna le lômna om a ta, lômthu hrilin inpâkna hla sak an ti.

⁴Ki mihaio, ki thu hi irngai unglân, ki nam chanpuihai hi an mikuar sung ri sehai, dân thu ki kuang ata a hong suaka, ki mihai vârna hrangin roirêlna dik siam pehai ki ti.

⁵Kin hnêna hrang zoro anai ta, keima ngêtin ki mihai chunga roirêl ki ta, ramhaiin ni thîr an ta, ki kut nghâk an ti.

⁶Irvân tiang nin mit inlêngtir unglân, Hnuai tiang irnêng hi en unglân, irvân khi meikhu angin irzâm zoi a ti, puan angin irnêng hi milui a ta, a sûnga omhai khom thoivâi angin, thi pher phurin om an ti. Ki saninhringna hi chu, kumtuanga hrang a ni, ki inhnêna khom hek thei no ni.

⁷Thudik inhriattu, lungrîla ki dân vonghaio, ki thu hi irngai roi, Mihriamhai demna irngai no unglân, nangni an manêpnahai chardong irlapui ual no roi.

⁸Puan irthiin a ifâk insiat angin, irnge’n samul puanhai a ifâk thei angin annihai khom la fa an ta, keima kuang chu kumtuanga hrang a ni, ki saninhringna khom kumtuanga hrang a ni.

⁹RENGPA, harin lân, harin lân, thoi ro, tianlai mihai kuanga ni hrâtzia ni inlangtir angin, hong inlangtir nôk ta roh. Nang hi ni mak che moh Rahab tuk india, tuipuia dragon sun that theitu kha?

¹⁰Tuipui inkanga, ni mi inthang saihai irkânna hrang, tuikhangliana lampui siamtu kha ni mak che mo?

¹¹RENGPA irtanhai chu hong an ta, Hla sakpumin Zion tâng hong tung an ta, Kumtuanga lômna khum an ta, raifân le lômna’n sip an ta, beidong irtha’nvâi om ta no ni.

¹²Keima hi ki nih irtharngamna intungtu, a thi thei mihriam, pârhai anga mihring nâihai hi, ithoa mo nin la ichihai mai?

¹³Irvân kaiphar theia, irnêng irnghatna phûm theitu, nangni siamtu PATHIAN hi nin irnghil ma ni ta? Dengintheitirtu ningmurna le an siat tumtuhai chi di dîpa nin iom mai hi? An ningmurna chu tuang zoi no chin ni.

¹⁴A kûn tôk tôka om tâkhai khom hong ngîrsuak ta an ta, thi no nihaia, phûm khom ni no nihaia, fâk hrang khom irsam ngai no nihai.

¹⁵Kei hi RENGPA nin Pathian chu ki ni, Tuikhanglianhai ki’rsôntira, tui a irsok but but ngai a ni, ki’rhming chu itinrêng RENGPA a ni.

¹⁶Irvân khi ki kaiphara, irnêng irnghatna ki phûma, Zion mihai kuang, “Ki mihai nin ni, nin hmûra ki thu ki sia ta, ki kut zapha laia ki sia insa ta,” ki iti kha.

¹⁷Harin lân, harin lân, Jerusalem thoi ro, RENGPA ningmurna uain chu ni in ta, inrui thei dôrin ni iin a ni ta.

¹⁸Nang a hruai hrangin nâi tûte nâi mak chea, nang a kai hrang khom tûte mihriam hmu ual mak che.

¹⁹Siatna thua voihni ni tuang ta, tu mo nang a châ ta hrang? Ni ramhai chu insiat a nia, a chuai zoi ta; ni mihaiin châm an tonga, khandai an ituang a ni ta, Itin mo irtharngam nang ki la isak thei ta hrang?

²⁰Ni nâihai chu kholaidung hmun tina irzalin an irtet phura, Lên leh sa ai khum angin, RENGPA ningmurna an tuang ta, an Pathianin a ihnôl a ni.

²¹Nangni soisakna tuanghai, zû in loia, an ruia khêkhaio, hi hi lei irngaitua roi:

²²RENGPA PATHIAN a mihai sanpu; nin Pathianin hiang hin a ti: “Inrui nghek hnunga khilât dêngzuan, RENGPA ningmurna khilât chu, nangni in intir ta ngai no ninga, la pai ta ki ti.

²³Dengintheia, kholaidunghaia, inbok ro, kin râkphâ theina, tia ni hnung zâng tianga inrâk vêlhai kuang pehai nôk ki ti.