Read Hrangkhol ISAIA 52 Bible Online

ISAIA 52 - Hrangkhol bible

ISAIA 52

¹O! Jerusalem, har ro, har ro, O Jerusalem, hong thoi inhar ta ro, khopui irthiang Jerusalem, roiinpui takin hor sinsiam ro, sertan loihai le porinche hai, hong lût ta no nihai.

²Jerusalem, nêngpil ata thoiin lân irbên infâiin lân, Rêngtoihmuna toi roh. Zion khopui nâi le te sala intânghaio, nin ringa hrui kha sûtpai roi.

³RENGPA’N hiang hin a ti: “Man pe loia suaka izuar nin nih, tangka sum boiin irtan ni nin ti.

⁴RENGPA PATHIANIN hiang hin a ti: Tiana ki mihai chu an bingin Aigupta rama an irthona. Assuria haiin ite ual ni loiin an soisakhai nôka.

⁵Atûn hin imo ki iti ta hrang? RENGPA thusuakin a ti. Ki mihai chu Babulon-a man boiin suaka an hruaia, an chunga roirêltuhaiin en nuam loiin, ti hi RENGPA thusuak a ni. Sûn so sôt ki’rhming an insiat ngai a ni.

⁶Khasikin ki mihaiin ki’rhming inhriat thei an ta, kha tena chu keima ihril a nih ti inhre thei ta an ti,” ti hi ki ihril a ni.

⁷Zion kuang, “Ni Pathianin roi a rêl ta,” a tia. Suaka zôkna thu lômom hmun tina inpuanga, irngeina Thurchi Sa intungtuhai ke chu en a hoi vang na!

⁸Zion khuaa RENGPA hong an mit ngêtin an hmu chit sikin, ni râl hrungtuhai chu raifânin an khêk sup supa.

⁹Jerusalem kho chîntea omhaio, raifân takin khêk unglân; RENGPA’N a mihai chu lungngam sakin, Jerusalem chu ar tan ta.

¹⁰Mi tin mithmua RENGPA’N a bân irthianga khan a râi an fân ta, rammual pumpui khom hin, Pathian saninhringna chu hmu thei an ti.

¹¹Suak roi, suak roi, Babulon hi suaksan roi; thil porinchehai hi inthem viat no roi, RENGPA timmatua pêlhaio, irthial irthiang unglân, suaksan roi.

¹²A rothai anga fe hrang ni mak chêia, Râl irzûl anga irhnot zât khom ni mak chêi; RENGPA’N nangni hruai a ta, Israelhai Pathian chu nin hnunga hrungtu ni a ti.

¹³Irngai ro, ki siahlo chu a sinthoa ir-iampui a ta, mihaiin chôiindôm an ti.

¹⁴Ama an hmu tena chu mi tamtakhaiin, ar khêl ti tak tak an ti. A hmêl an insîr insiat tak taka, mihriam hmêl lua irput mah.

¹⁵Nam tamtak chu a thisenin a’rsûkinfâia, Renghai khomin ar khêl ti pumin an bâi phong ngam no nihai; an la ihril ngai loi thil hmu an ta, an la inhriat ngai loi thil lan hre thei an ti.