Read Hrangkhol ISAIA 58 Bible Online

ISAIA 58 - Hrangkhol bible

ISAIA 58

¹RENGPA khan hiang hin a ti: “Khêk ra rakin lân, irdîn viat no ro, bekul irhâi angin ni hnuk insuak ro, ki mihai thil tho’nsual, Jakoba irchihai chu hrilhai roh.

²A ni tin irzôm natin an ni zonga, ki inuam lam chu inhriat an nuama, diktaka sintho ngai nam ni irhoi an tuma, Pathian thilpêk zôm irkip chu tum ual loiin, diktakin roirêl lam an nir dona, Pathian nâi nuam tak anga inlang pumin.

³‘Bu kin ngheia, itina moh ni ihmu loi? Ni ni’rngaitua pe no hrangin chu, itho moh phîngchâm tuang kin ta?’ nin tia. Nin bu nghei hi a hoihôkin nin hmanga, nin sinthotuhai chu nin râi phiarhai ngai.

⁴Bu nin ngheiin, nin ning an mura, nin inbuaihaia, irsual nuamin, kuttum nin thâk ngai. Hi nikhua nia nin chongchaina chu chunga mi’n inhre ri se, nin iti ma ni?

⁵Khaanga bu nghei kha ki nuam lam nin isôn ma ni? Denginthei nikhua nia nin irsiampuihaia, sûlhna a ichuai angin nin kûn chiana, nêngpil laia bora dâpin nin zâl ngai. Khahai ang khan kêng bu nghei hi nin itho? keima hrangin lômomna moh ni ni pe ni?

⁶“Bu nghei hrang dân ki inuam lam chu, dik loitaka mi dang nin intumnahai mâksana, an ringkol hrui insatpaia, mi dengintheitirhai ngai irletna le, an puak rik murdi inzângtirna hi kêng a ini.

⁷Phîngchâmhai chu nin bu semhai unglân, a chai inlênghai chu nin in sûnga hruai inlûthai roi; korongboia nin ihmuhai chu sil le bom pehai unglân, nin urênghai masanhai no roi.

⁸“Khanchu, zîng vâr angin vâr nin ta, nin natnahai chu dam lat a ti. RENGPA, mi dikin nangni hruai a ta, a roiinpuina khan nin hnung tiang ilhli a ti.

⁹RENGPA koi nin ta, nangni lei don a tih koi nin ta, nangni lei sâm a ti, nin laia irnuisônahai mâksana, chong saloia nin irkoinahai nin mâksana.

¹⁰Phîngchâmhai hrangin nin irpêka, inrianghai nin vâi inkhophaiin chu, inthim laia a vâr angin vâr nin ta, nin ngûinahai khom sûn vâr angin har ta nin ti.

¹¹RENGPA’N nangni hruai mai a ta, misa lum hnuaia nin dangchâr chu hek a ti. Nin irzuk murdi nangni pe sa a ti. Nin taksahai nangni inhrâttir a ta, tui tamna hmuna irhuan angin le tuikuang kang ngai loi angin ni nin ti.

¹²Zoro sôttaka lei siat zoi tâk nin khuahai chu, nin mihaiin lungphûm saina hmuna inding thar nôk an ta, “Kul bang le a sûnga in siam insa nôktu,” nangni ti an ti.

¹³Ki sûn irthiang sabat nin ser nôka, nin inhoina hai, nin mâksana, RENGPA sûn sabat hi nin inhlua, sintho hrangin fe mak chêia, mâni nuam lam irzûla nin tho mai mainahai, hmang viat loia nin chôiindômin chu,

¹⁴RENGPAA khan lômna hmu nin ta, rammuala hin chôiindôm ni nin ta, nin pu Jakoba irchon nangni pe ki ti, RENGPA bâiin a ti.