Read Hrangkhol ISAIA 61 Bible Online

ISAIA 61 - Hrangkhol bible

ISAIA 61

¹RENGPA PATHIAN irtha chu ki chunga a oma, Hriak a ni’rthûtira, RENGPA’N a ni itîr a ni. Invâihai laia Thurchi Sa hrila, nun beidong takhai inhar nôk hrangin, suaka intâng suak nôkna hrang thuhai, intângna ina omhai zalênna pe hranga inkung ki ni.

²RENGPA’N a mihai an zôk hrang zoro le a râlhai; a ni pêk hrang zoro a tung tâk ti inpuang hranga a ni itîr ki ni. Lusûnhai kha irtharngam sakhai hranga a ni itîr ki ni.

³Zion khua beidonghai inthâi hrang le an beidongnahai ata inhartirhai hrangin, porche taka om inhartirhai nôkna hrangin, a lei ngûi tâkhai inpâkna hla insaktirhai nôk hrangin tîr ki ni. RENGPA’N ama chôiindôm hranga a iphun thing inditom taka an nih ti thu hril hranga ki ni.

⁴Matona khua lei ramhai chu inding thar nôk ki ta, a lei chim siat zoihai khom sinsiam nôk ki ta, zoro sôttaka khopui lei ram tâk khom siam insa nôk an ti.

⁵Nam danghai chu hmanghai nin ta, nin sa vâihai enkol an ti, ram dang mihaiin nin loi phol an ta, nin grep irhuanhai chuan an ti.

⁶Nangni hi chu ‘RENGPA Ochai’ tih ni nin ti. Pathian sinthotuhai nangni ti an ti. Nam tinhai irchongna chu fa nin ta, an roiinpuinahai leh irvô nin ti.

⁷Nin inzakna le mualinphoina om ta no nia, nangni ram ngêta om nin ta, lêt hniin nin irchonhai pung a ta, kumtuanga lômna chang nin ti.

⁸Kei RENGPA hi diktaka roirêltu chu ki ni, Hâlirvôm hranga inhlan sa inrûk hi chu ki itheimâk a ni. Diktakin an sinthôna lômman chu pehai ki ta, kumtuanga thuthung siampuihai ki ti.

⁹Nin irchihai chu nam tin laia inlâr an ta, an laia nin nâi omhai an hmu’n chu RENGPA indit bîk nam nin nih iti inhre thei an ti.

¹⁰RENGPAA khan lôm tak tak ki ta, ki Pathian chunga hin lôm ok ki ti. Moineitu ochai anga irvô le moi a irvô ang hin, Jerusalem khua chu saninhringna le inhnêna puanin a hong ituam tâk a ni.

¹¹Irnênga chîmu a hong ikêi ang hin, Irhuana thil phun a hong incher ngai ang hin RENGPA kin PATHIANIN inhnêna intungtir a ta, Nam tinrêngin inpâk an ti.