Read Hrangkhol ISAIA 66 Bible Online

ISAIA 66 - Hrangkhol bible

ISAIA 66

¹RENGPA’N hiang hin a ti: “Irvân ki rêngtoihmun a nia, irnêng hi ki ke irnghatna a ni; i anga in moh nin ni isin pe hrang, khôn mo ki iom hrang?

²Thil tinrêng hi keima kut ngêia ki isiam an nia, khanchu an hong oma, RENGPA thusuakin a ti. Ki ihmu nuamhai hi tuhai moh an ini? Lungrîla irngaiintôm le irsîra ki hê lâkhai hi kêng an ini.

³Khannisian, hi mihai ta hrang hin chu sehrât thata inhlan mani, mihriam thata irbôl mani danglam ual mah. Belra inhlan mani, ui thata inhlan mani baidi irhlan mani, vok thisen inhlan mani, mirimhoi an hâl khoma, millim an biak khomin, anni hrangin danglam ual ma. An nuam lam takin sin an zonga thil intirom biak an nuam ngaia.

⁴Keima’n anni hranga thilirkhêl tak tho pehai ki ta, an ichitak thil intungtir pehai ki ti; ki khêk lai khan ni lei sâm mahaia, ki hrilhai lai khan irngai mahaia, ki mithmua ki inuam loi thil an thoa. Ki ilôm loi hrang thil tho an inthanga.

⁵RENGPA chia, a thu lâkhaiin chu, a thuhril hi irngai roi, nin u le sanghaiin nangni en nuam mahaia, RENGPA roiinpuina chu hor lang ri se, nin lôm ngân moh inhre thei kin ti! an la ti mai mualphoi irla an ti.

⁶Khopui sûnga irhâi om chu, Tempil sûnga irhâi chu imo a inih ta? RENGPA phuba lâk irhâi a ni, a râlhai a ithuanna a ni.

⁷Nâiha irvei loia nâi nei ang hin, kha khopui khom khan lei irvei loi rengin nâipasal a nei tâka!

⁸Khaanga thil kha tu moh inhriat ngai? Tu moh a lei hmu om tâk? ramhai hi sûn khat kâra a iom thei ma ni? Nam khom hi a hong isuak thut thei moh nin isôn? Zion khua hin chu a hor vei phut chak a nia, nâipasal a nei zôia.

⁹Suak zoro ni loiin ki insuaktir thei loi hrang mo? RENGPA’N a ti. A nei vâng tâk hi chu ki inkîrtir hrang ma ni? Nin Pathianin a ti.

¹⁰Jerusalem tuangpuituhaio, lômpui unglân, hi khopui indittuhaio, lôm ving roi.

¹¹Nâiin irhnu bit a inêk ang hin, a roiinpuinahai hi nin nuam dôrin hmang roi.

¹²RENGPA’N hiang hin a ti: Tui kang loi angin irngeina pe ki ti, nam dang irchongna murdihai hi, tuilian angin zuan lûttir ki ti. Nu’n a nâi irhnu pêkin a ipom ang hin, a mal chunga inper ot ot a ti.

¹³Nâi a in-ôi ang hin keima’n nangni in-ôi ki ti, irtharngam takin Jerusalema khan om ta nin ti.

¹⁴Ama kha nin hmu tena chu lômin hong har thei nin ta, ilhling incher thar angin irnoi nutin om nin ti. Kei RENGPA hin ki siahlohai ki changpuihai ngaia, ki râlhai chunga ki ning an mur ngai ti inhre ta nin ti.

¹⁵Irngai ro, mei leh RENGPA chu zuar thok a ti, kêllaiher tâlia hong chuangin a ningmur chu meichok angin kângin innatirhai a ti.

¹⁶RENGPA’N mei hmangin roirêl a ta, mi tin chunga a khandai irlek a ta, RENGPA’N thathai rem rum a ti.

¹⁷Irthiang infâi hranga tui irsila, nam dang pathian biak hranga honghai vok le châichek hmê fâka, intirom fâkhai ngai chu, an irhmang zoi vâng a ni; RENGPA thusuakin a ti.

¹⁸An sinthohai le an irngaituanahai kin hriat; nam tinrêng le chong chi tinrêng hmanghai chu hruai khômhai ki ta, hong an ta, ki roiinpuina hmu an ti.

¹⁹Annihai kha irsinsiana inentirhai ki ta, an laia senkhat chu hôihai ki ti, nam dang laia, Tarsis, Pul, . Luda haia tîrhai ki ta, thal kâp theihai chu Tubala, Javan-hai chômbung hlataka ki’rhming lan hre ngai loihai laia le ki roiinpuina la hmu loihai laia tîrhai ki ta, nam tinrêng laia ki roiinpuizia lan puang an ti.

²⁰RENGPA hranga thil inhlan hrang an hong ichôi ang hin nam tinhai laia urênghai chu hong hruaihai an ti. Sakor chunghaia chuang an ta, tâli chunga toi an ta, a’rzônna fonga toi an ta, sakuartung le saringsei chunga chuangin. Israelhaiin khêng irthianga thil inhlan hrang an hong ichôi ang hin, ki tâng irthiang Jerusalema hong an ti, RENGPA’N a ti.

²¹An laia mi senkhat chu ochai, Levi irchiin siamhai ki ta, RENGPA’N a ti.

²²“Irvân thar le irnêng thar ki isiam hrang chu, ki kuanga om mai a ta, khaang ngêt khan nin irchihai le nin irhminghai om mai a ti.

²³Tha thar le Sabat nî rikipin, chubai ni mûk hrangin mi tin ni hong pan an ti,” RENGPA’N a ti.

²⁴An suak tiang chu keima ni doia tehelzong ngaihai ruak kha hmu an ta, a thua irlung omhai chu thi zoi zât ni no ni, a kâng hrang mei khom chuai no ni, mi murdi’n intirom ti ok an ti.