Read Hrangkhol ISAIA 8 Bible Online

ISAIA 8 - Hrangkhol bible

ISAIA 8

¹RENGPA’N ki kuang, “Irziakna hrang a phêk liantaka lan lân, mihai tep thei hrangin ‘Maher-salal-Khas-Baza hrang’, ti thîr irzum leh irziak ro,” a tia.

²An hriatpui hrangin mi iamom inhni ochai Uria le Jeberakia nâipa Zakaria ki koia.

³Khan, deipunu kuang ki fea, khanchu, nâi a vonga, nâipasal a neia, RENGPA’N a’rhming hrangin, “Maher-salal-khas-Baza” ti roh.

⁴Nâisen khan, “Ka nu, ka pa a ti thei mân Damaska irchongna le Samari khua ata râllâk sum an lâk hrang chu Assuria rêng kuanga tung a ti,” a tia.

⁵RENGPA’N a ni hril nôka,

⁶Hi mihai hin Silo tui, dam tui in nuam loiin, Rezina le Remalia nâipa an lei lôma,

⁷Keima RENGPA hin Assuria rêng le a sipaihai chu, tuilian angin inpunghai ki ti.

⁸A kuang bit a ta, liam irhlei ni a ti. Judai ram tiang panin, dîlhai a ti. An ring phâkin a ram pumpui dîlhai a ti. Ni ram chunga a mitha phar duai a ti. O! Immanuel ni ram irzat rêng rêng chu boi ving a ti.

⁹Mihaio, inhre roi, irzal nin ti, ram hlataka omhaio, nin mikuar sung roi, a ni irsiam unglân, a sân chi roi.

¹⁰Rot zoi tum unglân, hlochuk ual no ni. Nin nuam dôr ti khom unglân, ite ar fêna om no ni, kin Pathian kin kuanga a om sikin.

¹¹Hi mihai lampui hro hi, hro ta loi hrangin RENGPA’N ngar takin a ni hrila.

¹²“Hi mihai leh hin inrualpuihai no ro, an ichi ang khomin chipuihai no roh.

¹³Itinrêng RENGPA hi a nih nin inza hrang chu. Ama vai hi a nih nin chia nin itho pe hrang chu.

¹⁴A’rthiang hrai sikin Israel in sûng mi inhnihai hrangin irfûina hrang lung, irfûia irtetna hrang chu a ni. Jerusalema omhai hranga tâkna hrang khur an khitna hranga châng a ni.

¹⁵Mi tamtakin irfûi an ta, khit an ta, inôk mai an ti,” a tia.

¹⁶Ki irchutirhaio, thu nangni ki irchuhai kha, inhre maiin, vong insa roi.

¹⁷Keima’n chu RENGPA hi ki nghâk maia, Jakoba irchihai laia a ni la irbîk pe viat a ni hi; keima’n chu ki sabeina hi ama vai hin ki’rnghat maia.

¹⁸En ro, keima le RENGPA ni ipêk nâipanghai hi, Zion tânga om tinrêng RENGPA’N Jerusalem mihai hranga irsinsiana thil irkhêl tak ni hrangin a ni ti a ni.

¹⁹Mithi chongpui theihai, dôi theihai, itin anga irkhek hranga a theihai irdon hrangin nang ti a ti. Ama’n chu, “Irthahai hi irdon hrang a nia, a thihai khom hi a la damhaiin irdon hrang an ni,” lei ti an ti.

²⁰Irchutirna thu nangni ki ihrilhai kha irngaitua sabak roi, anni thuhril chu omzia nei mah.

²¹Chardong le phîngchâmin ram chu irfang an ta, an phîngchâm ningmurin irvân enin an rêng le an Pathian chu khuasâl an ta.

²²Hnuai tiang an enin chu chardongna le inthim irkhêl tak, an itong ngêt hrang inthim chu hmu an ti.