Read Hrangkhol ISAIA 9 Bible Online

ISAIA 9 - Hrangkhol bible

ISAIA 9

¹Chardong taka omhai hrangin chu ngûina rêng rêng om ta no nia. Tianlai khan Zebulun le Naftali ram chu, hnuaisia om tak a nia, zoro hnungkhôna chu la roiinpuitir a ti, tuipui kôl ata Jordan varâl Galili ram, Jentailhai omna ram chu.

²Inthim hnuaia omhai namin chu, vâr roiinpui tak an hmu tâka, raminthim taka omhai hrangin khua a hong vâr ta.

³Kha namhai kha nin punghaia, an raifânna khom nin pung pehaia, bu ât le râllâk sum sem laia an raifânna angin, ni makunga hin an râi a ifân a ni.

⁴An puak pêlna ringkolhai le an thil inkhôna funghai chu, irdô tuanga vîkna hmolhai leh khan, Midian-hai an inhnê nikhua ang khan, ni tho pehaia.

⁵Sipai hongna rup rupa kekokhai chu, an tukfam thisen kâi neng nungin hâl a nia, a kâng zoi ta.

⁶Ei ta hrangin nâi a zuang suaka, nâipa pêkin ei oma, a dârsuama roirêlna irnghatin, A’rhming khom Irkhêl, Irfûktirtu, Pathian Hrât, Kumtuang Pa, Irngeina Rêng ti an ti.

⁷A ram irzat thiai a ta, a ram sûnga irngeina’n hek nî nei no ni. Thudik hmanga fel taka roirêlin Davida Rêngtoihmuna toi a ta, indettir a tih, atûn ata kumkhontuangin. RENGPA sathnem irngaina khan, kha kha a itho hrang a ni.

⁸RENGPA’N Jakoba irchihai demin thu a hrila, Israel mihai khom a huap sa a ni.

⁹“Efraima le Samari mihai khomin, hi hi a itho a nih ti lan hria an ti. Lârirpâkin an irsong khak ngaia.

¹⁰Pilrôngar bang chim khom sianlân, lung ngar sinsiamin irchuanhai ei ti, theipui thinghai kha sâtpaiin om khomsian, Sidar thinghaiin thûlpai ei ti,” tipuhai khan lan hriat an ti.

¹¹RENGPA’N râl an phûthaia, anni irhual hranghai khom.

¹²Nisua tianga Suria, nitâk tianga Filistia Israelhai doi hrangin an bâi an âng khumhaia. Kha dôr khom khan RENGPA ningmurna hek maka, a kut a la irlek mai a ni.

¹³Israel namhai chu anni soisaktuhai tiang kîr nuam loiin, itinrêng RENGPA kuang tiang fe nuam mahai.

¹⁴Khasikin kêng Israelhai lu le irmei chu sûn khat sûngin RENGPA’N a itanpai pehai a ni. An tûm ôn le hnâhai khom a lâkpai pehai,

¹⁵an luhai chu an ulian songhai an nia, an irmei chu deipu minlak tho ngaihai hi an ni.

¹⁶An nam hruaituhai hin an hruai insualhaia, an ihruaihai khom an irhmang zoi tâk a ni.

¹⁷Pathian inhre loiin, thil sual an thoa, an thu phorsuakhai lak, a nikhua ni pehai maka; khasikin an ruathartehai khom a ihôihai loi, farahai le meithâihai khom inrenhai loiin, kha dôra ni khomin RENGPA ningmur chum maka, a kut a la inlek mai a ni.

¹⁸Sual hi hloitharpa le ilhlingnei kâng theitu mei ang a ni. Rampui hnuaia sûlhai khom a kâng theia, a ikhu hlut hlut ngai a ni.

¹⁹Itinrêng RENGPA ningmurna khan, ram chu an kângtira, mihriamhai chu hâl hranga irtikkhôm mai mai an ni. Tûte mâni urênghai khom san thei loiin;

²⁰an chang tianga mihai huangin fâk an zonga, an phîng a la châm pehai mai ngai. An vei tianga mi khom an fâka, khop inhre ual mahai, an nâihai khom an fâka.

²¹Manasea le Efraima mi an irdoia, Juda irchihaiin an tuang uala, khaang dôr a ni tâk khomin RENGPA ningmurna chum loiin, a kut a la inlek mai a ni.