Read Hrangkhol LEVI DÂN 10 Bible Online

LEVI DÂN 10 - Hrangkhol bible

LEVI DÂN 10

¹Nadaba le Abihua, Arona nâihai khan, an mei lâkna khan meiri-al an lâka, mirimhoi hâl zât an phula, RENGPA makunga mei irthiang loi kha an hmanga. Khaanga hmang kha chu RENGPA’N a khap a ni.

²RENGPA kuang ata mei a zuang suak zoka, RENGPA makunga an inhni khan a kâng thathai ta.

³Mosia’n Arona kuang, “RENGPA’N hi chungchânga hin hiang hin a ti; ‘Ki sinthotuhaiin chu ki irthiangna hi an iuksak hrang a ni. Ki mihai makunga ki roiinpuizia inlangtir ki ti,’ a ti lele kha te,” a tia. Arona chu a dâihreka.

⁴Mosia’n Misaela le Elzafan, Arona pa urêng Uziela nâihai kha, a koia, an kuang, “Hong unglân, nin urênghai ruak hi in irthiang ata hi la suakhai unglân, riak hmun pên tiang sepaihai roi,” a tia.

⁵Khanchu, an honga, Mosia iti angin an ruakhai kha an ochai songkol irfual khan riakna hmun pên tiang an irzôn suakpaihai ta.

⁶Mosia’n Arona le a nâipa Eleazara le Ithamara kuang, “Lu nin irsûkin nin sam intha no unglân, nin puan khom ir-ek thêr sa no roi; khaang khan nin tho’n chu nin ithi ngêt hrang a ni, RENGPA chu nam pumpui chunga a ninginmur a ti, RENGPA meiin a ikâng thathai kha nin urêng Israel danghai khan châ thei an ti.

⁷Nangni’n chu irtongna puan in hi suaksan no roi, thina nin ti, RENGPA sahriak pol nin ni tâk kêng,” a tia. Mosia iti angin an tho tâka.

⁸RENGPA’N Arona kuang,

⁹“Irtongna puan in nin hong lût hrangin nang le ni nâihai hin uain le zu nin i-in hrang ni ma, nin inin chu thi nin ti. Hi hi nin irchi murdi’n an izôm hrang a ni.

¹⁰Thil ser le serloi, irthiang le irthiang loi nin isen thiam hrang a ni.

¹¹Mosia kuang dân nangni ki ipêk murdi Israel mihai kha nin irchutir hrang a ni,” a tia.

¹²Mosia’n Arona le a nâipa inhni la dam, Eleazara le Ithamara hai kuang, “Bu le bâl thilinhlan ata RENGPA kuanga inhlan ban kha la unglân, maichâm kôla fa roi, ser irthiang a ni tâk sikin.

¹³Hmun irthianga khan fa unglân, RENGPA kuang fâk hrang inhlan ata nin nâihai leh nin dongtum a ni. Hi hi RENGPA thupêk a ni.

¹⁴A mier le a mal, RENGPA makunga ngaihoi kha chu hmun irthianga khan nin nâipahai le nin nâinuhai leh fa nin ti. Hi thilinhlanhai hi nin nâihai le nin fâk hrang, irpôlkhômhai thilinhlan ata nin dongtum hrang chu a ni.

¹⁵A mal le a mier hi RENGPA makunga an ivôk kha fâk hrang thilinhlan RENGPA kuanga a thâi an hong inhlan laiin an hong ichôi hrang a ni. RENGPA thupêk angin hihai hi nin nâihai leh kumkhuaa nin dongtum hrang a ni,” a tia.

¹⁶Mosia’n sual irbôlna thilinhlan kêl chungchâng thu kha ngûk takin a’rdona, an lei hâlpai tah ti an hriata. Eleazara le Ithamara chunga khan a sân a ning an mur tâka.

¹⁷“Ithoa mo hmun irthianga sual irbôlna thilinhlan, kêlchal hme kha nin ifâk loi, ser irthiang zit tâk a ni kha; mipui sual irbôlna ata nin dongtum hrang RENGPA nangni ipêk kha,

¹⁸Irtongna puan ina thisen kha lâk lût ni maka, nangni ki ihril ang khan kha khan a hme chu nin ifâk hrang a ni kha te,” a tia.

¹⁹Arona khan a sâma, “A vuan khan irbôlna hme chu fa inlân, RENGPA’N a sa mo ti ni? mipuihai khan RENGPA kuang sual irbôlna kha an hong inhlana, kha tena khom khan hi thilirkhêl tak hi ki chunga a itung a ni,” a tia.

²⁰Khahai kha Mosia’n a hong inhriatin chu, a milung a chuk tâka.