Read Hrangkhol LEVI DÂN 16 Bible Online

LEVI DÂN 16 - Hrangkhol bible

LEVI DÂN 16

¹Arona nâihai inhni’n RENGPA makunga mei irthiang loi hmanga mirimhoi an hâl sikin an thi zoi hnungin RENGPA’N Mosia a chongpuia:

²“Ni upa Arona kha hril roh: Thuthung bôm sîng chunga sûma ki zuang ngai sikin hmun irthiang tak tentan zâr sûnga a hong ilût papai hrang ni ma, kha kha a uksak no’n chu thi a ti.

³Hmun irthiang taka chu sehrâtchal tuai, sual irbôlna thilinhlan le belra hâlirvôm hong inhlan hrangin chu hong lût thei a ti.

⁴Tui irsil bak a ta, sil le kai irthiang a irbel hrang a ni; puan irnêm songkol hai, tumante kai a ta, puan irnêm kongkhitin khit a ta, puan irnêm diarin a ikai sa hrang a ni.

⁵Israel pungkhôm khan sual irbôlna thilinhlan hrang kêlchal inhni le hâlirvôm thilinhlan hrang belrachal inkhat an ipêk hrang a ni.

⁶Arona’n sehrâtchal kha ama le a in sûng mihai hrangin sual irbôlna’n sual irbôlna thilinhlana inhlan a ti.

⁷Irtongna puan in lûtnaa kêl inhni kha kai a ta,

⁸a kho tak mo RENGPA hrangin ni ni, a kho tak mo Azazela hrangin a ini hrang ti inhriatna hrangin tâ an sâna,

⁹RENGPA inthang ual chu sual irbôlna thilinhlana inhlan a ti.

¹⁰Azazela hrangin inthang kêl kha RENGPA kuang a hring puma inhlan phot hrang a ni, sual irbôlna hrangin Azazela kuang ramkâra insua hrang a ni.

¹¹Arona’n sehrâtchal kha inhlan a ta, ama le a in sûng mihai sual irbôlna hrangin sual irbôlna thilinhlana inhlan hrang a ni.

¹²Mei lâkna’n maichâma meiri-al kha lâk a ta, mirimhoi hâl zât hap hni le hmun irthiang taka a hong ichôi hrang a ni.

¹³RENGPA makunga mirimhoi kha meia phul a ta, mirimhoi khu khan thuthung bôm sîng kha a inhli hrang a ni: khanchu, hmu thei no nia, a ithiloi hrang a ni.

¹⁴Sehrâtchal thisen kha a kut chalin thuthung bôm makunga khom voisari a inthek hrang a ni.

¹⁵Kha zoi tika chu kêl kha mipui sual irbôlna thilinhlana that a ta, a thisen kha hmun irthiang taka khan hong chôi a ta, sehrâtchal thisen a iti ang thuthung bôm maton tianga le a sîngnaa a inthek hrang a ni.

¹⁶Khaang khan hmun irthiang tak kha Israel mipuihai tho’nchâina le an sualna ata a thâr irthiang hrang a ni. Irtongna puan in riakhmun kôl zela om a nia, riakhmun porinche sikin khaanga irthiangtir kha a inang a ni.

¹⁷Hmun irthiang tak thâr irthiang hranga Arona a lût le a hong suak nôk kâra irtongna puan in sûnga tukhom an iom hrang ni mah.

¹⁸Ama le a in sûng mihai sual le Israel pungkhôm sual irbôlna a tho zoiin chu pên tiang hong suak a ta, maichâma hâlirvôm thilinhlan inhlan a ta, thâr irthiang a ti. Sehrâtchal thisen le kêl thisen senkhat kha maichâm kila irkihaia khan a pol hrang a ni.

¹⁹A kutchalin thisen chimrip kha maichâma voisari inthek a ta, Israel mihai sualna sikin a thâr irthiang hrang a ni.

²⁰Hmun irthiang takhai, irtongna puan in sûng murdihai, maichâmhai a thâr irthiang zoiin chu Azazela hranga kêl kha RENGPA makunga inhlan a ti.

²¹Kêl lua khan a kut kianghni’n irnghat a ta, Israel mihai thil saloi le sual an ithohai le an pualoina murdi kha phuang a ta, kêl lua khan irnghat a ti; a itho hranga inkung khan ramchâra kêl kha fepui a ta,

²²Kêl khan an porinchena murdi kha pêl a ta, ramchâra khan insua a ti.

²³Kha zoi tena Arona kha irtongna sûnga lût a ti, hmun irthiang taka a lu doa ochai songkol innghâkhai kha hlîk a ta, masan a ti.

²⁴Hmun irthianga khan tui irsil a ta, ama puandiar irbel nôk a ta, hâlirvôm thilinhlan, ama dongtum le mipui dongtum inhlan a ta, ama sual le mipui sual kha a irbôl hrang a ni.

²⁵Sual irbôlna thilinhlan, sa marhai kha maichâma hâl a ti.

²⁶Ramchâra Azazela hranga kêl va insuatu khan in tiang a hong kîr tika a puandiar irsu a ta, tui a irsil sa hrang a ni.

²⁷Sehrâtchal le kêl, sual irbôlna thilinhlan hranga that, hmun irthiang taka sual lapaina hrang an thisen lâklût sai kha a vunhai, a sûngkuahai le dâi pên tiang hâl zit hrang a ni.

²⁸Va hâlirvômtu’n chu a sil le kai irsu a ta, irtongna puan in tiang a hong kîr mân tui a irsil hrang a ni.

²⁹Hi dân hi kumkhuaa zôm hrang a ni. Tha sarina tarik sûn sôm niin chu Israel mi murdi le an laia nam dang om sahai khan bu nghei an ta, sin an itho hrang ni mah.

³⁰Hi nikhua hin a ni, an hong irthiang theina hrangin an sual murdi irbôlna thilinhlan an inhlan a ni.

³¹Hi nikhua hi nikho ser, ser ir-up khak hrang a ni, bu ngheia sin khom tholoi hrang a ni. Hi dân hi kumkhua’n zôm hrang a ni.

³²“Ochai inlaltak hranga sahriak pol le a pa irthûl hranga namindetin hi thil hi a itho hrang a ni, ochai songkol irthiang a innghâk hrang a ni.

³³Hmun irthiangtak, irtongna puan in sûnghai, maichâmhai, ochaihai le pungkhômhai thâr irthiangna sin kha a itho hrang a ni.

³⁴Hi dânhai hi kumkhuaa zôm hrang a ni. Israel mihai kha kum khata voikhat, an sual an irthâr irthiangna sin hi tho pe ngêt hrang a ni,” a tia. Mosia’n RENGPA thupêk ang khan a tho tâka.