Read Hrangkhol LEVI DÂN 17 Bible Online

LEVI DÂN 17 - Hrangkhol bible

LEVI DÂN 17

¹RENGPA’N Mosia kuang,

²Arona le a nâihai le Israel mihai kha hril ro, hi hi RENGPA thupêk a ni.

³“Israel mi’n riak hmuna khom dâi pên tiang khom sehrâtchal mani, belra mani, kêl mani a thata,

⁴RENGPA kuang inhlan hrang tia irtongna puan in mikota a that no’n chu thisen a insua a ni, thisen insua anga bê hrang a ni, a’rchihaiin an iensan hrang a ni.

⁵Ram irhonga thilinhlan that an ivarh ngai hi RENGPA kuang an hong inhlan tâkna hrangin ochai kuang irtongna puan in mikota an hong ichôi hrang a ni, RENGPA makunga irhîlhai thilinhlana an hong inhlan hrang a nih tihna a ni.

⁶Ochai khan a thisen kha irtongna puan in lûtna kôla maichâma inthek a ta, a thâihai kha a ihâlirvôm hrang a ni, kha kha RENGPA nuamlam tak a ni.

⁷Kêl lu nei ramilhli an ibiak hrang ni ta ma; khaang biak chu RENGPA ata an iuire a ni. Hi dân hi Israel mihaiin kumkhua’n an izôm hrang a ni.

⁸“Israel mi mani, nam dang an laia om mani, tukhomin RENGPA kuang hâlirvôm thilinhlan khom, thilinhlan chi dang rêng rêng khom,

⁹irtongna puan in mikot kôla vai an inhlan hrang a ni; hmun danga inhlan chu Pathian mihaiin an iensan hrang a ni.

¹⁰“Israel sûngkua laia mi mani, an laia nam dang om mani, a thisen le ileh sa fâk tâk ka chunga, RENGPA ningthik chum a ti. Pathian mihai lai ata inhnotsuak hrang a ni.

¹¹Thilhring rêng rêng, an hringna kha an thisena a oma, khasika khan kêng RENGPA khan mihai sual lapai hrang a ti, thisen kha maichâma bunthuan hranga ti a ni; thisen kha hringna a nia, kha khan sual kha a lâkpai a ni.

¹²Khasikin kêng, RENGPA’N Israel mihai le an laia nam dang omhai khan sâ a taksa le thisen le ileh fa hrang ni mah a itihna a ni.

¹³“Israel mi’n mani, an laia nam dangin mani, sa irthiang khom, va irthiang khom ramchainaa man sianlân, a thisen kha irnênga inzung inkangtir a ta, vâiphinin a isirpol nôk hrang a ni.

¹⁴Thilhring tinrêng hringna chu a thisena khan a iom a ni; khasikin RENGPA’N Israel mihai kha a thisen le ileh a hme ite faloi hranga ti a ni, tukhom, nakhrâta fâk chu Israel lai ata ensan hrang a ni.

¹⁵Israel mi mani, an laia om nam dang mi mani, tukhomin sa thi sai hme mani, sa isethat sai hme mani a fâkin chu an sil le kai irsu an ta, tui an irsil ngêt hrang a ni, khohloi dênin porinche an ta, kha tena kêng an hong irthiang hrang a ni.

¹⁶Irsûk nuam loi mani, tui irsil nuam loi mani chu tuang an ti,” a tia.