Read Hrangkhol LEVI DÂN 19 Bible Online

LEVI DÂN 19 - Hrangkhol bible

LEVI DÂN 19

¹RENGPA’N Mosia kuang,

²“Israel mipui pungkhômhai kha hril roh: nin irthiang hrang a ni, kei RENGPA nin Pathian hi ki’rthiang sikin.

³Mâni nu le pa mahrip nin itho seng hrang a ni, ki thupêk angin ki sabat nikhua nin iser hrang a ni, RENGPA nin Pathian ki ni.

⁴Millim tiang irhei no roi, biak hrangin millim pathianhai irsiam ual no roi: kei hi RENGPA nin Pathian ki ni.

⁵Irpôlkhômhai thilinhlan RENGPA kuang nin hlanin tho hrang lam ki iti ang khan tho’n lân, lei pom ki ti.

⁶A sâ kha nin thatin mani, a tûka mo fa zoi hrang a ni,

⁷a sûn thum ni’n nin fâkin chu a porinchea, thilinhlan kha pom no ning.

⁸Khaang fâk chu thil irthiang a porinchetira, a mô a ipêl hrang a ni, a mihai khan an iensan hrang a ni.

⁹Bu nin âtin faôi tena ât no roi, nin ilâk irhmâi ât hrangin fe nôk no roi.

¹⁰Grep voikhat lâk zoi mani, a ra tâk mani, irvai ta no ro, mi’nrianghai le nam danghai hrangin masan ro, kei hi RENGPA nin Pathian ki ni.

¹¹Inru no ro, mi huang no ro, milak hril no roh.

¹²Ki’rhming sâmin milak tho no ro, ni Pathian irhming insiat no ro, RENGPA ki ni hi.

¹³Ni bômhai huang no’n lân, an thil nei irchûpuihai no ro, ni kuanga irhlo chu zân khat khom a hlo khap pe no roh.

¹⁴Kuarsêt khuasâl no ro; mitcho matona tûkna thil se no roh. Ni Pathian chi ro, kei hi RENGPA ki ni.

¹⁵Dik takin ni tualbômhai thu rêl pe ngaiin lân, mi’nriang ditsak bîk no’n lân, mi’rchong chi ual hliak no roh.

¹⁶Mi chungchâng, milak chong inzaptu ni no ro: thi zôi thei ngîrhmuna ngîr kha san hrangin ni thu inhriat ang ang hril irdîn no ro; RENGPA ki ni hi.

¹⁷Tukhom khôkmâk lungrîl irput no ro, irhong pharin thu insîr suakin nin kâr thu infeltir ro, khanchu thilsual ni itho loi hrang a ni.

¹⁸Tu chunga khom phuba la no ro, khôkmâk no ro; lung ni irthung angin ni bômhai kha lungthung roh. Kei hi RENGPA ki ni.

¹⁹Ki thupêkhai hi zôm roh. Ni sâ vâi kha chi dang dang irzêltir no roh. Loi inkhata chîmu dang dang song no roh. Thil chi hni puankhông sil no roh.

²⁰Suak dôngmate kha, mi’n dôngma hrangin hual sianlân, a man la pe loi mani, la’nsualoi mani a ni’n chu mi dangin lei châipui khomsian, suak mamai a nia, that hrang chu ni ma, hrem hrang chu a ni.

²¹Pasal khan tho’nchâi man thilinhlan, irtongna puan ina a hong inhlan hrang a ni.

²²Kha pa sual irbôlna hrang irthârna kha ochaiin lei inhlan pe a ta, Pathianin ngaidam a ti.

²³Kanaan ram nin hong tung tika, thei nin iling rêng rêng a ra phut ata kum thum sûng chu porinchea bê hrang a ni, fa no roi.

²⁴A kum minlinaa thei ra murdi chu RENGPA, nin Pathian kuang lômthu hrilna hrangin nin inhlan hrang a ni.

²⁵A kum ringanaa thei ra chu fa thei ta nin ti; khaang khan nin tho’n chu nin thei kha a sân ra nuam a ti; RENGPA nin Pathian ki ni.

²⁶Sa rêng rêng a thisen le ileh fa no roi, mitvai dôihai, tasânhai, uar no roi.

²⁷Nin michal ata a vêlin nin sam voi inkol mani, hnerkamul voihai mani nin itho hrang ni ma.

²⁸Mithi sûn sikin nin taksa rêng rêng khom nin irziak inchialhai, ir-âtkhok mani uar no roi. Kei hi RENGPA nin Pathian kha ki ni.

²⁹Ni nâinu chu tempil notizuara pêkin thanginse no ro; nam dang pathian tiang irheina lik ni ti, ram chu pualoina’n sipna ni.

³⁰Sabat nî serin lân, chubai ni ni mûkna hmun chu inza ro, RENGPA ki ni hi.

³¹Ramilhli ikop mani, mithi kaithoi thei mani irdon hrangin fe no ro; khaang kha ni tho’n chu porinche ni ti. RENGPA nin Pathian ki ni hi.

³²Tar luchuak tâkhai makunga ngîrna châng inhren lân, ulianhai chu inza roh. Nin Pathian chi roi, kei hi RENGPA ki ni.

³³Nin rama nam dang om saihai chu dengintheitir no roi.

³⁴Nin Israel chanpuihai angin bê unglân, mâni lung nin irthung angin lungthunghai roi. Nangni khom Aigupta rama mikhual nin ni ngai kha inhre mai roi. Kei hi RENGPA nin Pathian ki ni.

³⁵Irtêna dik loihai, varna lung dik loihai, phalla dik loihai hmangin mi huang no roi.

³⁶Irtêna diktak, varna lung diktak, phalla diktak hmang ngai roi. Aigupta ram ata nangni hruaisuaktu RENGPA nin Pathian ki ni.

³⁷Ki dân murdi le ki thupêkhai hi zôm roi, RENGPA ki ni.