Read Hrangkhol LEVI DÂN 20 Bible Online

LEVI DÂN 20 - Hrangkhol bible

LEVI DÂN 20

¹RENGPA’N Mosia kuang,

²“Israel mihai hril ro; Israel mi’n mani, nin laia om, ram dang mi’n mani, Moleka kuang mani, nâi an hlanin chu that hrang a ni, pungkhômhaiin lungin an idêngthat hrang a ni.

³Mâni nâi Moleka kuang inhlana ki hmun irthiang porinchetira, ki’rhming irthiang insiattu chu irheisan ki ta, ensan ki ti.

⁴Israel mipuihaiin kha thil kha a’rnghil om tho’n, an that nuam no’n chu,

⁵keima ngeiin kha mi chunga le a in sûng mihai chunga insum ki ta, Moleka biaka keimaa iamom loihai murdi chu ki mihai laia inkhop ta no ning.

⁶Ramilhli ikop le dôi thei pantuhai chu irheisan ki ta, ki mihai laia inkhop ta no ning.

⁷RENGPA nin Pathian ki ni sikin irvong irthiang roi.

⁸Ki dânhai hi zôm unglân, tho ngai roi. RENGPA nin Pathian kha ki ni, nangni indangtu ki ni.

⁹Mâni nu le pa khosâltu chu that hrang a ni; a thisen mô chu ama’n pêl a ti.

¹⁰A Israel chanpui dôngma uirepuitu chu a nupang leh khan that hrang an ni.

¹¹Mi’n a pa dôngma laia inkhat khom a lei pôlin chu a pa a imualinphoitir a ni, a nupang leh khan that hrang an ni, sûngsuak irnai irdit an nia, an thisen mô chu anni’n pêl an ti.

¹²Mi’n a moinu a zâlpuiin chu that ngêt hrang an ni; porinchena sual tho an nia, an thisen mô chu anni’n pêl an ti.

¹³Pasalin pasal dang a pôlin chu thil inzakom tak an itho a ni, an inhni’n that hrang an ni, an thisen mô chu anni’n pêl an ti.

¹⁴Mi’n nulefa dôngma’n a neiin chu thil inzakom tak an itho a nia, an inthumin hâl that hrang an ni, hiang thil hi nin laia, a tho an iom hrang ni mah.

¹⁵Mi’n sâ a pôlin chu a sâ leh khan that hrang an ni.

¹⁶Nupang khom sâ pôl tuma zâlpui chu a sâ leh khan that hrang an ni, an thisen mô chu anni’n pêl an ti.

¹⁷Mi’n a farnu, nu dang inei mani, pa dang inei mani dôngma’n a neiin chu vântâng laia mualinphoitir hrang a ni; khua ata inhnotsuak hrang a ni. Mâni farnu an dit sikin, a mô chu ama’n a ipêl hrang a ni.

¹⁸Mi’n nupang thinei laia a pôlin chu an inhni’n ensan hrang an ni, porinche lai chungchânga dân an tho’nchâi a ni.

¹⁹Mi’n, mâni nî mani, a nu nâipangnu zuarpuinu mani a pôlin chu an inhni’n an sual mô chu pêl an ti.

²⁰Mi’n a pa urêng dôngma a pôlin chu a pa urêng chu a mualinphoitir a ni, a nupang leh khan an sual mô chu pêl an ti, nâi zel nei no nihai.

²¹Mâni sangpa dôngma irchupuitu chu nâi zel nei no nihai, thil porinche tak a itho a ni, a sangpa a imualinphoitir a ni.

²²Ki dân le ki thupêk murdihai hi zôm unglân, tho ngai roi; khanchu, nin omna hrang ram nangni ki hruai intung tika chu kha ram ata kha hnôlin om no chin ni.

²³Kha hmuna lei om, nangni ki inhnotsuak pe hranghai om dân la no roi; hiang tho hi an uar ngai, ki intir lam tak a ni.

²⁴Hi ram, khuaihlutui le dût tui luangna ram hi, nin ilua hrangin nangni pêk hrang kin kung tâka, nangni pe ngêt ki ti; RENGPA nin Pathian ki ni, nam dang lai ata nangni ki ilâk indang a ni.

²⁵Khasikin, sâ le vahai chu a’rthiang le irthiang loi theithâk intam unglân, sâ irthiang loi mani, vâ irthiang loi mani fa no roi; irthiangloi ki iti nin fâkin chu irthiang loi ni nin ti.

²⁶Ki ta bîk hrangin nin irthiang hrang a ni, ki ta nin nina hrangin nam dang lai ata nangni ki inthang suak a ni.

²⁷“Pasal khom, nupang khom, ramilhli ikop le dôi uar chu lunga dêng that hrang an ni, an thisen mô chu anni’n pêl an ti,” a tia.