Read Hrangkhol LEVI DÂN 21 Bible Online

LEVI DÂN 21 - Hrangkhol bible

LEVI DÂN 21

¹RENGPA’N Mosia kuang, “Arona nâi, ochaihai kha hril ro, an laia mihai chu tukhom an chipuihai ruak tônin an iporinche hrang ni mah.

²Ama nu mani, pa mani, nâipa mani, nâinu mani, sangpa mani,

³farnu mani pasal neiloi inkhata ompui ruak chu tôn thei a ti.

⁴A dôngma sûngkuahai ruak khom tônin a iporinche hrang ni ma.

⁵Ochai tukhomin lusûn entîrna hrangin a lu kiangkhat a ivoi inkol hrang ni ma, a hnerkamul a ivoi hrang ni ma, a ir-ât irphop hrang ni ma.

⁶A irthiang hrang a ni, ki’rhming a insiat hrang ni ma; hâlirvôm hâltu a nia, ki kuang fâk hrang inhlantu ni sa a ta, a irvong irthiang hrang a ni.

⁷Ochai chu a’rthianga, notizuar tâkhai, mi imâkhai, ruatharte irditpui tâkhai dôngma’n a inei hrang ni ma.

⁸Nin Pathian kuang fâk hrang inhlantu, ki mihai lai ata ki indang a ni.

⁹Ochai nâinu notizuar khan a pa a mualinphoitira, hâl that hrang a ni.

¹⁰Ochai inlaltak chu sahriak pol a nia, ochai puandiar irbel hranga ser bîk a ni; khasikin, lusûn entîrna hrangin a sam khûi loiin a intha hrang ni maka, a puan a inpotthêr hrang ni ma.

¹¹Mithi ruak omnaa a ife hrang ni ma; a nu le a pa ruak ngei khom tônin a iporinche hrang ni mah.

¹²Khaanga tho hrangin ki hmun irthiang a suaksanin a iporinche hrang ni ma, keima hranga ser indang tâk, sahriak pol tâk a ni, kei hi RENGPA ki ni.

¹³Dôngmate irthiang vai dôngma’n a inei hrang a ni.

¹⁴Pasal sûnhai, imâk tâkhai, ruatharte le irdit tâkhai, notizuarhai dôngma’n a inei hrang ni ma, ama chipui laia om dôngmate irthiang a inei hrang a ni.

¹⁵khano’nchu, a nâihai porinche an ti, anni khom an irthiang hrang a ni. RENGPA ki ni hi, kei hin ki ochai inlaltak kha ki ser indang tâk a ni.

¹⁶RENGPA’N Mosia a hrila:

¹⁷“Arona hril ro; nin irchi laia nâi suakinsual tukhomin fâk hrang thilinhlan hi, itiklai khomin an hong inhlan hrang ni mah.

¹⁸Suakinsualna nei chu thilinhlan a hong inhlan hrang ni ma; mitcho, ke’nbâi, hmêl insiat, ru’rbun danglam bîk irput hai,

¹⁹kut bûi, ke bûi,

²⁰ke’rval, phûkirsam, mit hêk, uithak irvei, hlip neihai le tilru koihai khan thilinhlana’n inhlan hrang ni mah.

²¹Ochai Arona irchi, takpuma suakinsualna nei chu hâlirvôm thilinhlan hâl hrangin mani, fâk hrang thilinhlan hâl hrangin mani a ihong hrang ni ma.

²²Khaang mi chu Pathian hranga thilinhlan irthiang le ochai dongtum thil irthiang kha fa thei a ti.

²³Suakinsualna a nei sikin hmun irthiang tak puanzâr kôla a ihong hrang ni ma, maichâm a hong inâi hrang ni ma. Hi thil irthiang hi a iporinchetir hrang ni ma, kei hi RENGPA ki ni, ki’rthiangtak a ni,” a tia.

²⁴Hi thu hi Mosia’n Arona le a nâihai kha a hrila, Israel mihai khom a hril a ni.