Read Hrangkhol LEVI DÂN 26 Bible Online

LEVI DÂN 26 - Hrangkhol bible

LEVI DÂN 26

¹“Ite ni ual loi, millim sinhai, lung millimhai, chubai mûk hrangin nin isiam hrang ni ma, kei hi RENGPA nin Pathian ki ni.

²Irngam hrang ki iti nikhuahai ser unglân, chubai nin ni imûkna hrang hmun chu inza roi, kei hi RENGPA ki ni.

³Ki dânhai hi nin zôma, ki thupêkhai tak nin sônin chu

⁴a zoro taka rua inthotir ki ta, nin loi inlâp a ti, nin theihai khom ra nuam a ti.

⁵Grep ra irhmal zoro dênin bu ât nang a ti, bu tû zoro dênin nin grep ra irhmal nang a ti. Nuam do dôra fâk hrang nei nin ta, nin rama khan irtharngam takin om nin ti.

⁶Nin rama irngeina inlêngtir ki ta, chitna om loiin zâl nin ta, ram sahrânghai irzûlpai ki ta, râlin nangni hong doi no nihai.

⁷Nin râlhai chu irzûlhai nin ta, khandaiin that nin ti.

⁸Mi pangaiin mi irzakhat inhnê nin ta, mi irza’n chu mi sîngkhat inhnê thei nin ti.

⁹Sat nangni vur ki ta, nâi le te nangni pe nghek ki ta; ki thuthung angin keiin ki itho hrang chu nangni tho pe thiai ki ti.

¹⁰Bu milui nin nêk zoi loi chu a thar siana hrangin pai nang a ti.

¹¹Nin laia om ki ta, nangni intha viat no ning.

¹²Nangni ompui ki ta, nin Pathian ni ki ta, ki mihai ni nin ti.

¹³Kei RENGPA, nin Pathian hin, suak ni ta loi hrangin Aigupta ram ata nangni hruai suak ki ta, nin ringkolhai kha nangni inkhiakpai pea, irthiphiaiin nin lêng thei ta a ni.”

¹⁴“Ki thu nin irngaitua nuam noa, ki thupêkhai nin zôm nuam noa,

¹⁵ki dânhai nin hnôla, omdân hrang ki iti nin hnuaisiaa, tho hrang ki itihai nin tho nuam noa ki thuthung nin tho’nsualin chu,

¹⁶hiang hin nangni hrem ki ti: chamairakin nangni inomtir ki ta, inkhurpui, dam thei loi hri irvei nin ta, nin mit dolde suak a ta, hring suakpui no chin ni.

¹⁷Nangni irheisan ki ta, nangni khôkmâktuhai chu nin chunga roirêltuhai ni an ta, irzûl loi khomin intâ tânin om nin ti.

¹⁸Khan khomin ki thu nin la’rngai mai no’n chu a bâk sari’n nangni hrem ki ti.

¹⁹Nin isong tak tak, nin hrâtna chu, nangni insiat pe ki ta; nin ta hrangin irvân chu thîr anga rua insum loiin nangni siam ki ta, nin loihai khom dâr angin châr a ti.

²⁰Môk sin sosôl ni nin ti, nin loia ât hrang om no nia, nin thei kunghai khom ra ual no ni.

²¹“A ni doi lamin nin oma, ki thu nin la uksak nuam mai no’n chu nin sual nêka irphu bâk saria irkhêlin hri nangni irveitir ki ti.

²²Ramsa hâitak tak hong tîr ki ta, nin nâihai le nin sahai hong sê an ta.

²³“Hi hremna nin tong hnung khoma ki tiang nin irhei noa, nin ni doi maiin chu,

²⁴nangni irkalpui lamin om ki ta, a bâk saria nain nangni hrem ki ti.

²⁵Nin laia râl hong tîr ki ta, thuthung nin itho’nsiatna phuba nangni hong la an ti. Nin khopui kul sûnghaia nin irbîk khomin hri inlêngtir ki ta, râlhaiin hong la dên an ti.

²⁶Nin fâk irvaina inpingtir ki ta, lungthu sôm hmanga fâk le nêk suang nuhai khan lungthu inkhat vai hmangin fâk le nêk suang ta an ti. Sem viviat a ta, an dongtum an fâk zoi hnung khom an phîng la châm dên a ti.

²⁷“Khaang dôr tena khom ki thu nin irngai nuam noa, nin ni la doi maiin chu,

²⁸ningmurin nin chunga insum ki ta, a bâk saria nain nangni hrem ki ti.

²⁹Nin nâipahai le nin nâinuhai hme fapuina rak nin ti.

³⁰Nin millim pathian biakna hmun irsânghai kha insiatpai ki ta, nin mirimhoi hâlna maichâmhai kha insiat ki ta, nin ruakhai chu nin millim biakhai chunga pai ki ta, ki hringna khan nangni khôkmâk a ti.

³¹Nin khopuihai kha insim ki ta, nin pathian biakhai kha inramtir ki ta, nin irbôlnahai kha nangni lei pom pe no ning.

³²Nin ram inkoltir zit ki ta, a luatu nin râlhai khan, a’rkhêl ti tak tak an ti.

³³Irdoina hong tung a ta, nam dang rama nangni hruai indarh an ta, nin khopuihai kha chim remrum a ti.

³⁴Nin râlhai rama nin om sûngin nin ram chu irngam a ti.

³⁵Nin om sûngin nin ram kha inôltir nuam mak chêia, nin om no sûng chu a irngam ta hrang a ni.

³⁶Nin râlhai rama hruaihai chu chi tak tak an ta, sûlhna inlêng maia luan intân an ta, khandaia irzûl ang dênin tûte irzûl loi khomin tûk an ti.

³⁷Khandaia irzûl ang dênin irpalthût irhlôm an ta, râl doi nôk hrang tûte om no chin ni.

³⁸Mi rama thi nin ta, kha khan nangni phûm an ti.

³⁹Nin râlhai rama la dam sun omhai khom nin sualna sik le nin pahai sualna sikin zui irhmang nin ti.

⁴⁰“Nin ni doia, nir heisanin kha mihai khan an pahai leh thilsual an tho a nih ti inhre suak an ta,

⁴¹anni sikin ki’rheisana, an râlhai rama kin hnotsuak a nih ti irhriat an ta; khanchu, an lungrîl irhnuai an ta, an sual man an pêl hnung chu,

⁴²Jakoba, Isaka le Abrahama hai kuang ki chonginkung kha inhriat mai ki ta, ki mihai chu, hi ram hi ki pêk hrang nôk thu hril thar nôk ki ti.

⁴³Aniachu, ram chu a’rngam theina hrangin ram ata mihai kha lâk suak bak hrang a ni. Ki dânhai le ki thupêkhai hnôla an thilsual tho man kha an ituang bak hrang a ni.

⁴⁴Khaang tak khan hrem khom inlân an râlhai rama an om kha, sehai rak no ninga, inboipaihai zit ual no ning.

⁴⁵An irchibulhai leh ki thuthung kha inthar nôk ki ti. Aigupta ram ata khan nam tin hmua ki mihai kha, kei RENGPA hi an Pathian ni hrangin ki ihruai suak an ni kha te. Kei hi RENGPA ki ni,” a tia.

⁴⁶Hi hi Sinai tânga Mosia kuang RENGPA dân le a thupêk, Israel mihai hranga pêk kha a ni.