Read Hrangkhol LEVI DÂN 6 Bible Online

LEVI DÂN 6 - Hrangkhol bible

LEVI DÂN 6

¹RENGPA’N Mosia kha a chongpuia.

²A’rchi Israelhaiin a kuanga thil a inkoltirhai, a ihlephai, pêk kîr nuam ta no sian, inrûkpai pên mani huang ta sianlân;

³khan, thil irhmang hrûta hrût loi angin khomâk a sâmin chu,

⁴hiang thilsual, a i ang khom hi tho sianlân, a inrûkhai a ihuanghai, a ihlep inkhîr nuam loihai, thil irhmang hrûthai, milak khomâk a isâmkhum thilhai chu, a rêngin a ithuan zit hrang a ni; khabana hmun ringa ata hmun khat a ipêk belsa hrang a ni; thilsual a tho ti hmusuak nia a neitu kuang a ipêk hrang a ni.

⁶Tho’nsual man RENGPA kuang inhlan hrangin ochai kuang belra mani kêl mani, a chal, hmêlveiloi a hong ikai hrang a ni; ama’n chu hmun irthianga hmang lai sum insâpa sût hrang a ni.

⁷Ochai khan RENGPA kuang sual irbôlna chu inhlan pe a ta, a sualna chu ngaidam ni ta a ti, a tia.

⁸RENGPA khan Mosia kha a chongpuia:

⁹Arona le a nâihai chu hâlirvôm thilinhlan chungchânga tho hrang dân hi hril roh. Hâlirvôm thilinhlan chu zânkhovârin maichâma khan a isia hrang a ni, mei chu inchok mai hrang a ni.

¹⁰A tûka chu ochai khan a puanchek irphân songkol le tuman hnuai innghâkin lungthua thil rô irvâmhai kha hrût a ta, maichâm sîra khan a isia hrang a ni.

¹¹A puandiar chu thûl a ta, riakhmun dâi pên tiang hmun sera irvut kha a ipai hrang a ni.

¹²Maichâma mei kha som inhring mai hrang a ni, a ithi hrang ni mah. Ochai khan a ni tin thingtua bel mai a ta, hâlirvôm thilinhlan hranghai kha hâl a ta; irpôlkhôm thilinhlan thâihai khom kha hâlirvôm zôi zel a ti.

¹³Maichâma mei kha som inhring mai hrang a ni, a ithi lik hrang ni mah.

¹⁴“Hiang hi bu le bâl thilinhlan tho hrang dân chu a ni: Arona irchi ochaiin bu le bâl thilinhlan kha maichâma, RENGPA makunga an inhlan hrang a ni.

¹⁵Baidi le sahriak kha a chimrip thâr a ta, bero leh maichâma hâl a ti, kha kha a rêngin RENGPA kuang inhlan a nih ti entîrna a ni, RENGPA lôm lam tak a ni.

¹⁶Inhlan ban chu ochaihai fâk hrang a ni, irbiakna puan in tual hmun irthianga chol kop loia fa hrang a ni,

¹⁷chol le inhmet pola inzêi hrang ni mah. Bu le bâl thilinhlan ata an dongtum hrangin ki ipêk a ni. Sual irbôlna le tho’nsual man thilinhlan anga thil ser, a sân ser irthiang tâk a ni.

¹⁸Arona irchi pasalhai ka kaiin fa thei an ti. RENGPA kuang fâk hrang inhlan kumkhuaa an dongtum hranga inkung a ni. Mi dang tukhomin fâk hrang thilinhlan chu an tônin chu an irthiang loi zôi zel a ni,” a tia.

¹⁹RENGPA’N Mosia a chongpuia:

²⁰“Arona le a nâihai sahriak pol an niin chu RENGPA kuang baidi sa zât her khat, a nitina bu le bâl thilinhlan inhlan sa dôr, zînga her kecher, khohloia herkecher hong inhlan seng ri sehai.

²¹Oliv hriak leh inhmet irzêla thîrtûla em inhmin hrang a nia, irsik indi’n bu le bâl thilinhlan anga inhlan hrang a ni.

²²Arona irchi, a âiôtu hranga sahriak pol, ochai inlaltak khan hi thilinhlan hi a inhlan hen hrang a ni; hi hi kumkhuaa tho hrang a ni, RENGPA hrangin hâlirvôm zit hrang a ni.

²³Ochaiin bu le bâl thilinhlan a inhlan hi fa hrang ni ma, hâlirvôm zit hrang a ni,” a tia.

²⁴RENGPA’N Mosia kuang,

²⁵Arona le a nâihai kha hril roh. Hiang hi sual irbôlna thilinhlan inhlan hrang dân chu a ni. Hâlirvôm thilinhlan hrang thatna hmuna sual irbôlna thilinhlan chu RENGPA makunga that hrang a ni, thil ser irthiang a ni.

²⁶An hlantu ochaiin, a hme hi puan in irbiakna tual hmun irthianga fa hrang a ni.

²⁷Hi hme hi a tôn murdi chu an innim zôi zel a ni. Sil le kai khom a thisenin an thekin chu hmun irthianga a irsûk hrang a ni.

²⁸A hme suangna bêl kha pilbêl a ni’n chu inkhoi hrang a ni; thîrbêl a ni’n chu inlap infâi vinga irsûk hrang a ni.

²⁹Ochai irchi pasal rêng rêng chu a hme fa thei an ti, thil ser a ni.

³⁰Irbiakna puan in hual sûng hmun irthianga thisen chu sual irbôlna hrangin lâk lût a niin chu a hme chu hâlirvôm zit hrang a ni.