Read Hrangkhol LEVI DÂN 7 Bible Online

LEVI DÂN 7 - Hrangkhol bible

LEVI DÂN 7

¹Hi hi tho’nsualna man thilinhlan tho lam hrang chu a ni.

²Hâlirvôm thilinhlan, sa thatna hmuna sa chu that hrang a ni, a thisen chu maichâma inthek hrang a ni.

³A’rmei takhai, a rîl thâihai,

⁴a kalhai le a taksahai a mithin hlap tuam sa lai takhai kha

⁵ochaiin maichâma a hâlirvôm hrang a ni, tho’nsual man thilinhlan a ni.

⁶Ochai irchi, pasal kakaiin a hme kha fa thei an ti, a sâna ser a ni sikin hmun irthianga fa hrang a ni.

⁷Sual irbôlna thilinhlan le tho’nsualna man thilinhlan hi an hlan dân a ir-ang mai hrang a ni; an hlantu ochai hin a hme hi an ifâk hrang a ni.

⁸Hâlirvôm thilinhlana hmang savun kha an hlantu ochai idong hrang a ni.

⁹Bu le bâl thilinhlan lungthua rô innhminhai, thîrtûla rô inhminhai, thîrbêla inzêihai kha an hlantu ochai dongtum hrang a ni.

¹⁰Bu le bâl thilinhlan la’nhmin loi, sahriak kop le koploi khom Arona irchi ochaihai dongtum hrang a ni, an irsem thiai hrang a ni.

¹¹RENGPA kuang irpôlkhôm thilinhlan chu hianga inhlan hrang hi a ni.

¹²Irpôlkhôm thilinhlan chu Pathian kuang lômthu hrilna hrangin mi’n a hong inhlanin chu, sa an hlan laiin bai chol kop loi le oliv hriak leh inhmet mani, bai irphân oliv hriaka nâl mani, oliv hriaka inzêi mani a hong inhlan sa hrang a ni.

¹³Khabana chol kop baitang rô inhmin a ipêk sa hrang a ni.

¹⁴Bai chi dang dang a inhlan laia inkhat chu RENGPA hrangin a ipêk hrang a ni, maichâma sa thisen inthektu ochai dongtum hrang ni a ti.

¹⁵A hme chu an hlan nia fa zoi zit hrang a ni, a tûka hrangin sia hrang ni mah.

¹⁶Irpôlkhôm thilinhlan chu chonginkung hlochukna sika mani, mâni nuam thua thilinhlan rêng rêng mani chu, a hme kha an hlan nia fa zit ual hrang ni ma, a tûka khom la fa thei a ni.

¹⁷Fa zoi loi, sûn thum ni tena khom la om chu hâlirvôm hrang a ni.

¹⁸A sûn thum nia la fâk chu Pathianin a thilinhlan kha pom no nia, an hlantu thil tho kha a saa pom nêkin porinchea bê ni a ta, a fâktu khom mophur a ti.

¹⁹A hme thil porinche a kopin chu fa hrang ni ma, hâlirvôm hrang a ni. Mi porinche loiin chu a hme kha fa thei an ti.

²⁰Mi porinche laiin irpôlkhômhai thilinhlan hme hi a fâkin chu ensan hrang a ni.

²¹Mihriam mani sa ata mani thil porinche suak tôntu chu hi hme hi a fâkin chu ensan hrang a ni, a tia.

²²RENGPA’N Mosia kuang,

²³“Israel nâihai chu hril ro: belra mani, sehrât mani, kêl mani, a i anga mar khom nin ifâk hrang ni mah.

²⁴Sa thi mani, sa ise that hme chu nin ifâk hrang ni ma, thil danga chu hmang thei ni a ti.

²⁵Fâk hrang thilinhlan RENGPA kuang sataka inhlan tâk fâk chu ensan hrang a ni.

²⁶Israel nâihai chu khoa khom omhai sian sa thisen mani va thisen mani an ifâk hrang ni mah.

²⁷Hi dân insiat murdi chu ensan hrang an ni,” a tia.

²⁸RENGPA’N Mosia kuang:

²⁹“Israel mihai chu hril roh. Irpôlkhôm thilinhlan RENGPA kuanga inhlantu chu senkhat RENGPA kuang thilpêka an ipêk hrang a ni.

³⁰Ama ngeiin fâk hrang thilinhlan chu a hong inhlan hrang a ni. Sa taksa le a mithin chu sen a ta, RENGPA kuang a hong inhlan hrang a ni.

³¹Ochaiin a taksa chu maichâma hâl a ta, a mithin chu ochai dongtum a ni.

³²Irpôlkhôm thilinhlan chu a chang tianga mal chu ochai dongtum a ni,

³³Irpôlkhôm thilinhlan taksa le thisen inhlantu ochaiin chu, a mal chang tianga chu dong a ti.

³⁴Israelhaiin RENGPA kuang irpôlkhôm thilinhlan an inhlanin a mithin senkhat le a mal hi itiklai khom ochai kuang an ipêk hen hrang a ni,” a tia.

³⁵Hi hi fâk hrang RENGPA kuang pêkna ata Arona le a nâihai, ochaia inkung indet hnunga an dongtum hranga pêk hrang chu a ni.

³⁶Kha nikhua khan RENGPA’N Israel mihai kuang, hi irthâr thilinhlan hi an kuang pe hen hranga thupêk a ni. Hi dân hi Israel mihaiin itiklai khom an izôm hen hrang a ni.

³⁷Khanchu, hâlirvôm thilinhlan hai, bu le bâl thilinhlan hai, sual irbôlna thilinhlan hai, tho’nsual man thilinhlan hai, ochai namindet thilinhlanhai le irpôlkhôm thilinhlanhai chu khaanga inhlan hen hrang chu a ni.

³⁸Ramchâra Sinai tânga Israelhai thilinhlan hrang dân a hril laia Mosia kuang RENGPA thupêkhai kha chu a ni.