Read Hrangkhol JEREMIA 1 Bible Online

JEREMIA 1 - Hrangkhol bible

JEREMIA 1

¹Hi lekhabu hi Benjamina ram sûnga Anathot khuaa ochaihai laia inkhat Hilkia nâipa Jeremia thu’nsîr chuangna a ni.

²Judai rama rêng Amona nâipa Josia an lal lai kum sômhleithumna khan RENGPA’N Jeremia a chongpuia.

³Josia nâipa Jehoiakima rêng chang lai khomin a chongpui nôka, kha hnung khomin RENGPA’N zoro tamtak chu, Josia nâipa Zedekia kum sômhleikhat an lal kum, a tha ringana khan Jerusalema mihai chu sala hruaiin an iom tâk a ni.

⁴RENGPA’N hiang hin a tia,

⁵“Phîng sûnga nang ki siam mân rengin, nang kin hriata, sul ata ni suak mân rengin nang ki lei inthang sai a ni, nam danghai laia deipu hrangin nang ki lei inkung tâk a ni,” tiin.

⁶Keima’n, “O RENGPA Pathian, nâipangte kêng ki la nia, thu hril khom thei ma ung,” ki tia.

⁷Khannisian RENGPA’N ki kuang, “Nâipangte ki ni irti ual no ro, nang ki itîrna mipuihai kuang fe’n lân, hril hranga ki thu nang pêkhai chu hrilhai roh.

⁸Annihai khom chihai no ro, ni kuang om ki ta, nang hrung mai ki ti, keima, RENGPA’N ki iti tâk a ni,” a tia.

⁹Khanchu RENGPA’N ki kut a hon tûka, ki hmûr a hon thema, ki kuang, “Irngai ro, thu ni inpuang ngêt hrang nang ki ipêk a ni.

¹⁰A vuan hin namhai le rêng ram chunga hin ircham ni inei tâk a ni, phâi hrang le insimpai hrangin, insiatchit le indok hrangin, sin inding hrang le phun nôk hrangin,” a tia.

¹¹RENGPA’N ki kuang, “Jeremia imo ni hmu?” tiin a nir dona. Khan keiin, “Almond thingchâr ki hmu,” tiin ki sâma.

¹²RENGPA khan ki kuang, “Ni sâm indik thap, ki thuhai an zôm theina hrangin ki ien mai kêng,” a tia.

¹³RENGPA’N a ni chongpui nôka, “Imo ni la ihmu sa?,” tiin a nir dona. Keiin, “Hmâr tianga bêl irchuan rum ki hmua, hi tiang an zuar let vâng,” tiin ki sâma.

¹⁴Ama’n, “Hi ram sûnga om murdi chunga hmâr tianga irthokin siatchit theina hor soi buan buan a ta;

¹⁵hmâr tianga nam tinhaiin hitaka hong hrangin ki koi sikin. An rênghai hong an ta, Jerusalem kotbâihai le kul bang irhualin an rêngtoihmunhai dong an ta, Judai ram khopui danghai khom hual sa an ti.

¹⁶Ki mihai chu pathian danghai kuang irbôlna inhlanin an ni huanga, millim an isiamhai chubai an mûka, thil sual an tho tâk sikin, anni chu dûk ki inthotirhai hrang a ni.

¹⁷Irsiam ro, Jeremia; fe’n lân, hril hranga nang ki itihai kha hrilhai roh. Atûn hin anni chu chihai no ro, khano’nchu an makunga thâidôpin nang ki isiam hrang kêng.

¹⁸Irngai ro, Jeremia, hi rama mi tukhom, Judai rama rênghai, hruaituhai, ochaihai a rama mipuihaiin nang an idoi hrang a ni. Khan, a vuan hin keima’n anni dan theina hrangin hrâtna nang ki ipêk a ni; khopui kul det tak, thîr chopui, dârsen bang nei ang ni an ti. Nang inhnê thei no nihai, ni kuanga omin nang ki ihrung hrang a ni sikin,” ti hi keima RENGPA thu suak a ni.